«Բա ուրիշ օր ինչի չեք գալիս մեր գյուղ». ՏԻՄ ընտրություններ Վեդիում
ОБЩЕСТВО«Էս բա ինչի եք մեր գյուղ եկել էսօր, ուրիշ օր ինչի չեք գալիս»,-տեսախցիկն ընտրատեղամասի մուտքի մոտ տեսնելով` ասում է Վեդու ավագանու ընտրություններին մասնակցող պապիկը:
Խնդրում ենք մի քանի հարցի պատասխանել, բայց ձեռքով է անում և հեռանում: Հետո մեկ ուրիշ ընտրող է դուրս գալիս ընտրատեղամասից, լրագրողների հետ խոսք ու զրույցի է բռնվում, ասում է` մեղավոր են նախկինները, քանդեցին, հիմնահատակ քանդված տունը հնարավոր էր արդյոք այդքան կարճ ժամանակում ոտքի հանել, ընտրողներից մեկը, կարծես թե, նրա խոսքին արձագանքելով, պնդում է` դու խաղողի մթերման մասին խոսի, ուրիշ բան չէ, խաղողի մթերումից խոսի: Տղամարդիկ, սակայն, տեսախցիկի առաջ լուռ են, ասելիք չունեն: Վեդիում շարունակվում են ավագանու ընտրությունները:
Այն տեղամասերում, որտեղ Past.am-ը հասցրել է լինել, ընթացքը խաղաղ է: Ընտրողներն իրենք էլ են արձանագրում, որ ընթացքը հանգիստ է, բոլորը հետևում են կանոններին:
«Այս ընտրություններում ցանկանում եմ, որ հաղթի արդարությունը, այն թեկնածուն, որը կստանա ընտրողների մեծամասնության քվեն: Մեկ էլ խաղաղություն լինի»,-ասում է մի կին:
Մի տղամարդ էլ շարունակում է` հույսով քվեարկել եմ, որ ամեն ինչ լավ է լինելու, բոլորն էլ գիտակցաբար են եկել ընտրության: Մեր այն հարցին, թե ինչ ակնկալիքներ կան այս ընտրությունից և դրա արդյունքներից, ուսուցչուհին, ով ես ընտրատեղամասերից մեկում իր քաղաքացիական պարտքն էր կատարել, ասաց` որ թեկնածուն էլ հաղթի, պետք է մտածի երկրի ու ժողովրդի մասին:
«Պետք է առաջ գնանք, փոխվենք, աշխարհում այսքան բան է փոխվում: Ակնկալիքներս լավն են»,-նշում է նա: