Կոտայքի մարզպետն անցնող տարին արդյունավետ է որակել

Կոտայքի մարզպետ Կարապետ Գուլոյանը, ամփոփելով անցնող տարին, ընդգծել է, որ արդյունավետորեն կյանքի են կոչվել մարզի զարգացման 2015-2018 թվականների ծրագրով նախատեսված տարեկան միջոցառումները: Ինչպես «Արմենպրես»-ին տեղեկացրին ՀՀ Կոտայքի մարզպետարանի տեղեկատվության և հասարակայնության հետ կապերի բաժնից, նա տեղեկացրել  է, որ ՀՀ Նախագահի ու Կառավարության հանձնարարությամբ իրականացված բազմաթիվ գերակա նախաձեռնությունների շնորհիվ՝ մարզային տարբեր բնագավառներում ու ենթակառուցվածքներում գրանցվել են նկատելի դրական զարգացումներ:

Անցնող տարվա ընթացքում մարզի ղեկավարի՝ համայնքային  այցելությունների և բնակիչների հետ պարբերական շփումների ընթացքում հանգամանորեն դիտարկվել են մարզի համայնքների հիմնախնդիրներն ու վերջիններիս լուծման հնարավորությունները:

Մարզի համայնքներում առանցքային կարևորություն ունեցող բազմաթիվ հիմնախնդիրներ իրենց լուծումներ են ստացել ՀՀ Կառավարության կողմից տրամադրված V1 հրատապ ծրագրերի  շրջանակներում, որի արդյունքում կատարվել են առողջապահական և կրթական օբյեկտների վերանորոգման, ճանապարհների ասֆալտապատման, համայնքներում ջրամատակարարման համակարգերի կառուցման և համայնքային կենտրոնի հիմնանորոգման աշխատանքներ:

Ընդհանուր առմամբ` 2015 թվականի ընթացքում մարզպետարանի պատվիրատվությամբ վերանորոգվել են 2 առողջապահական և  8 կրթական հաստատություններ, 8 համայնքներում  կատարվել են  ասֆալտապատման և 3 համայնքներում՝ ջրամատակարարման համակարգի բարելավման աշխատանքներ:

Կոտայքի մարզպետն իր խոսքում նշել է, որ «Հայջրմուղկոյուղի» ՓԲԸ-ի կողմից 2015 թվականին «Ասիական զարգացման» բանկի վարկի միջոցներով նախատեսված է մարզի՝ Հրազդան, Աբովյան, Չարենցավան, Ծաղկաձոր, Սոլակ, Քաղսի և Ակունք  համայնքների ջրամատակարարման  համակարգերում իրականացվել են զգալի աշխատանքներ:

Ընթացքի մեջ է Հրազդան քաղաքում մարզային նշանակության  կոշտ կենցաղային թափոնների  աղբավայրի կառուցման  ծրագիրը: Մարզպետի կողմից հրապարակված տվյալների համաձայն` 2015 թվականին մարզի  մի շարք համայնքներում տեղական միջոցներով իրականացվել են տարբեր ենթակառուցվածքների բարելավման ծրագրեր:

Խոսելով ճանապարհաշինության բնագավառում կատարված աշխատանքների մասին՝ Կարապետ Գուլոյանը նշել է, որ 2015 թվականի ՀՀ պետական միջոցների հաշվին 193,7 միլիոն դրամ ընդհանուր գումարով հիմնանորոգվել է Մրգաշեն-Նոր Արտամետ մարզային նշանակության ավտոճանապարհի 3.05 կմ հատվածը:

Համաշխարհային բանկի միջոցներով` ընթացիկ տարում հիմնանորոգվել են Հ5-Կարենիս-Չարենցավան ճանապարհահատվածը` (5.3կմ) և Աբովյան-Նոր Գեղի-Եղվարդ ավտոճանապարհի 12 կմ հատվածը:

Մարզային տնտեսական ցուցանիշներում հատկանշական է նաև այն հանգամանքը, որ մարզի հանքագործական արդյունաբերության ոլորտում գրանցվել է աճ  624 միլիոն դրամի չափով  կամ  թողարկվել է 2.4 միլիարդ դրամի արտադրանք:

Լրագրողների հետ հանդիպման ընթացքում Կոտայքի մարզպետը կարևորել է մարզի գյուղատնտեսության բնագավառի գործունեությունը և անդրադարձել այս ոլորտի մի շարք ցուցանիշների ևս:

2015 թվականին կատարվել է 18 հազար 020 հա գյուղատնտեսական մշակաբույսերի ցանք (աշնանացան` 6 հազար 144 հա, գարնանացան` 11 հազար 876 հա) կամ օգտագործվել է վարելահողերի 47.7 տոկոս` նախորդ տարվա 45.1 տոկոսի դիմաց: Նախորդ տարվա համեմատ ընդհանուր ցանքատարածությունները ավելացել են 959  հեկտարով:

Մարզում ակտիվորեն իրականացվում են առկա ջերմոցային տնտեսությունների ընդլայնման և նոր տնտեսություններ հիմնելու ծրագրեր, որոնք նպաստում են ինտենսիվ գյուղատնտեսության զարգացմանն ու նկատելի առաջընթացին: Մարզի ղեկավարը խոսել է նաև կրթական և առողջապահական բնագավառների գործունեության մասին:

Մարզպետարանի ենթակայությամբ  գործում են 91 կրթական հաստատություններ, որոնցից 59-ը` միջնակարգ հանրակրթական, 31-ը` հիմնական հանրակրթական, 1-ը` հատուկ (օժանդակ), ինչպես նաև՝ ՀՀ Կրթության և գիտության նախարարության ենակայության 11 ավագ դպրոցներ, 2 կրթահամալաիրներ, 6 պետական քոլեջներ, 5 արհեստագործական ուսումնարաններ:  

2015-2016 ուսումնական տարում մարզային ենթակայության ուսումնական հաստատություններում սովորում են 30 հազար 345 աշակերտներ, իսկ ՀՀ ԿԳ նախարարության ենթակայությամբ ուսումնական հաստատություններում՝ 4 հազար 483 աշակերտներ:  Ընդամենը մարզի դպրոցներում սովորում են 34 հազար 828 աշակերտներ: Առաջին դասարան են հաճախում 3 հազար 998 աշակերտ: Մարզի  պետական  հանրակրթական ուսումնական հաստատություններում աշխատում են  2 հազար 845 ուսուցիչներ:

Մարզում գործում են  4 բժշկական կենտրոններ, 26 առողջության առաջնային  պահպանման հաստատություններ: Առողջապահական համակարգում աշխատողների թիվը 2015 թվականի տարեվերջին կազմել  է 1660: Մարզի առողջապահության համակարգի հիվանդանոցային ծառայության մահճակալային ֆոնդը 258 է:

Մարզում անցնող տարվա ընթացքում իրականացվել են մշակութային, մարզական ու սոցիալական համակողմանի ծրագրեր՝ այս ասպարեզներում ևս գրանցելով դրական ցուցանիշներ:

Պատասխանելով լրագրողների կողմից տրվող տարբեր հարցերին` Կոտայքի մարզպետ Գուլոյանն անդրադարձել է նաև 2016 թվականի համար նախատեսված որոշակի գործընթացների և փաստել, որ արդեն իսկ մշակվել  են մարզային տարբեր ոլորտների շարունակական զարգացումն ապահովող հստակ ծրագրեր, որոնց իրականացման պարագայում նախատեսվում են ինչպես նոր աշխատատեղերի ձևավորման, այնպես էլ մարզի տնտեսական աշխուժացման հնարավորություններ:

Մամուլի ասուլիսի ավարտին Կոտայքի մարզպետ Կարապետ Գուլոյանը շնորհավորել է Ամանորի և Սուրբ ծննդյան տոների կապակցությամբ: