«Մի ներկայացման մեջ 6 դեր եմ խաղում, վայրկյանների ընթացքում եմ կերպարանափոխվում». Էվա Խաչատրյանը՝ «Լավագույնը» ճանաչվելու և իր մեծ սիրո մասին

ЛАЙФ 30 Март, 2022 16:52

Թատրոնի գործիչների համար «Արտավազդ» թատերական մրցանակաբաշխությունը տարվա կարևոր օրերից մեկն է, քանի որ հենց այդ օրը գնահատվում են նախորդ տարվա թատերական աշխատանքները: «Լավագույն երիտասարդ դերասանուհի» անվանակարգում այս տարի հաղթող է ճանաչվել Կամերային թատրոնի դերասանուհի Էվա Խաչատրյանը: Tert.am Life-ի հետ զրույցում դերասանուհին պատմել է այդ օրվա հույզերի, հետագա ծրագրերի, թատրոնի և դերասանական ոլորտի դժվարությունների մասին:

«Ցանկանում էի ստանալ մրցանակն ու սպասումով էի գալիս մրցանակաբաշխությանը՝ չնայած չգիտեի կստանա՞մ մրցանակ, թե՝ ոչ,- ասաց դերասանուհին և շեշտեց, որ չնայած սպասումների, միևնույն է, զարմացած էր: - Աննկարագրելի է. կանգնած ես այդքան դերասանների առաջ, երբ ճանաչվել ես լավագույնը: Հաճելի է, երբ մարդիկ նկատում են տարիների աշխատանքդ ու արժամավույն գնահատում: Թատրոնում աշխատելիս դու թողնում ես այնտեղ բոլոր էմոցիաներդ, հույզերդ, զգացմունքներդ, առողջությունդ ու ապրումներդ, բայց գալիս ես մի կետի, երբ գնահատված ես»:

Էվայի խոսքով՝ մրցանակաբաշխության վերջնարդյունքը երբեք կանխատեսելի չէ: «Ներկայացված դերասաններից շատերն ունեն անցած ուղի, ստեղծվում է հանձնաժողով, որը կայացնում է վերջնական որոշում: Գուցե, դու ինքդ քեզ համարես լավագույնը, բայց դա որոշում են այլ մարդիկ: Թատրոնում ևս այդ մասով չի եղել առանձնահատուկ վերաբերմունք իմ անձի նկատմամբ»,- ասաց նա:

Դերասանուհին նաև պատմեց, որ միայն մի մարդ է կանխատեսել, որ մրցանակն իրենն է լինելու։ «Երբ «5 պատմություն սիրո մասին» ներկայացումը նոր էր ստեղծվում, ռեժիսոր Դավիթ Աբրահամյանն ասում էր, որ պետք է անեմ այն, ինչ պահանջվում է ինձնից, և կդառնամ մրցանակակիր,- ասաց Էվան և նկատեց, որ այս ներկայացումն իր ձևաչափով շատ հոգեհարազատ է իրեն: -Այստեղ ես մարմնավորում եմ 6 կերպարի, որոնք տարբեր ժամանակաշրջաններից են: Ես և Մխիթարը հաշված վայրկյաններ ունենք կերպարանափոխվելու համար»:

Խոսելով ներկայացման ձևաչափի փոփոխության մասին՝ նա շեշտեց, որ նոր ձևաչափին հանդիսատեսը ևս դրական է արձագանքել: «Համավարակով և պատերազմով պայմանավորված ներկայացումն ընդմիջում ունեցավ, բայց ունեինք աշխատանքը շարունակելու մեծագույն ցանկություն: Ներկայացումը վերափոխվեց և դարձավ «5+1 պատմություն սիրո մասին»: Դավիթը գրեց 6-րդ պատմությունը, որը շատ սիրվեց մեր կողմից։ Ինչպես մյուս հինգը, սա էլ դիպավ մեր հոգուն, քանի որ շատ էմոցիոնալ էր»,- ասաց նա:

Դերասանուհին ընդգծեց, որ թատրոնն իր կյանքի կարևորագույն բաղադրիչներից մեկն է: «Թատրոնն իմ սերն է ու ճախրելու ուժը։ Ես չունեմ թևեր, բայց թատրոնը տալիս է դրանք: Կամերային թատրոնն էլ իր հերթին այլ աշխարհ է ինձ համար, երջանիկ եմ, որ հենց այստեղ եմ աշխատում, քանի որ այստեղ կարելի է անվերջ սովորել»,- ասաց դերասանուհին:

Էվայի խոսքով՝ մասնագիտությունն ինքնին դժվար է և շատ խոչընդոտներով: «Դերասանի մասնագիտությունն ինքնին բարդ է, մեծագույն նվիրում կա այս ոլորտում․ տուժում են մի շարք հարաբերություններ, ընտանիք, անգամ, առողջությունդ դառնում է երկրորդական, բայց միևնույն է դու շարունակում ես հաճույքով ու նվիրումով աշխատել,- պատմեց դերասանուհին և հավելեց, որ ազատ ժամանակ ունենում է միայն ուշ գիշերը, երբ ավարտում է աշխատանքը: -Երբեմն սկսում ես ճնշվել, որ չես հասցնում ժամանակ տրամադրել քեզ, բայց երբ դու գտնում ես քո սերը (իմ պարագայում դա թատրոնն է, որին ես սիրով եմ մոտենում), ցանկության դեպքում հասցնում ես համատեղել կարևոր բաները: Մարդը միշտ ընտրելու հնարավորություն ունի ու ընտրում է այն, ինչ իսկապես իրեն է, ինչի կարիքն ունի»:

Դերասանուհին շեշտեց, որ հանդիսատեսի համակրանքը շատ ավելի կարևոր է, քան մրցանակները: «Միայն մրցանակի առկայությամբ չէ, որ հաջողության զգացում կա, չնայած «Արտավազդակիր» դառնալով դու այդ թատերական ընտանիքի մի մասնիկն ես, բայց ամեն ներկայացումից հետո այլ ապրումներ ես ունենում, որոնք անփոխարինելի են։ Երբ հանդիսատեսը բավարարված է լքում դահլիճը, դա արդեն իսկ հաղթանակ է և ձեռքբերում: Ես ուզում եմ, ինձնից հետո որևէ արժեք թողնել, որով կհպարտանան մարդիկ»,- ասաց դերասանուհին:

Խոսելով հեռուստանախագծերի մասին՝ նշեց, որ բաց է համագործակցությունների և նոր նախագծերի համար: «Արյունոտ խաղադրույք» հեռուստասերիալի ավարտին եղել են առաջարկներ, բայց համագործակցությունս չստացվեց: Ես շատ եմ սիրում նկարահանումները: Այժմ ևս կան առաջարկներ, լիահույս եմ, որ հետագայում կլինեն նոր համագործակցություններ»,- ասաց նա:

Թերեզա Հովհաննիսյան