Ինչ կապ ունի Սալվադոր Դալին «Չուպա Չուպս»-ի հետ. «Փաստ»

«Փաստ» օրաթերթը գրում է 

Ամենահայտնի սառնաշաքարի՝ «Չուպա Չուպսի» պատմությունը սկսվել է 1958 թվականից: Հենց այդ ժամանակ ի բնե հրուշակագործ Էնրիկ Բերնաթը հիմնել է քաղցրավենիքի արտադրության ընկերություն, որը հետագայում ստացել է Chupa Chups Group անվանումը: Էնրիկ Բերնաթը ծնվել է Բարսելոնում (Իսպանիա): Իր նախնիներից նա ժառանգել է Granja Asturias անունով քաղցրավենիքի արտադրամասը: Գործերը լավ են ընթացել, և 1958 թվականին ձեռնարկատերը որոշել է ուսումնասիրել գնորդների կողմից իր արտադրանքի սպառողական նախապատվությունը, պարզել, թե որ տեսականին ամենամեծ պահանջարկն ունի:

Բերնաթի հանձնարարությամբ մարքեթինգային հետազոտություն է անցկացրել մի ֆրանսիական ընկերություն: Արդյունքները շատ են զարմացրել հրուշակագործին: Ապրանքաարտադրության մեջ հաշվի են առնվել մեծահասակների հետաքրքրություններն ու նախասիրությունները, սակայն ուսումնասիրությունը ցույց է տվել, որ նրա արտադրանքը գնել են հիմնականում մինչև 16 տարեկան երեխաները: Այդ փաստն էլ նպաստել է, որ արտադրվի այնպիսի քաղցրավենիք, որը կգնեն և՛ փոքրերը, և՛ մեծերը։ Բացի այդ, որոշվել է օգտագործել հատուկ փաթեթավորում` նոր արտադրանքն ավելի հարմարավետ դարձնելու համար։

Չէ՞ որ բոլորը գիտեն, որ երեխաները հաճախ կեղտոտում են իրենց, ծնողներին և այն ամենը, ինչին ձեռք են տալիս շոկոլադ, կոնֆետ և այլ քաղցրավենիք ուտելիս: Այսպիսով, «Չուպա Չուպսի» ստեղծողների գլխում միտք է հղացել քաղցրավենիքը դնել փոքրիկ պատառաքաղի վրա, որը հարմար կլինի բռնելու համար: Հետագայում այն փոխարինվել է պլաստմասե փայտիկով: Այսպիսով, հրուշակեղենի պատմության մեջ հայտնվել է լեգենդար «փայտիկով սառնաշաքարը»: Այն սկզբում կոչվել է Gol (գոլ), քանի որ ֆուտբոլային գնդակի նմանություն է ունեցել: Ընկերության սեփականատիրոջն այդ անունը դուր չի եկել, և նա որոշել է վերանվանել այն CHUPS («chupar» «ծծել»), իսկ հետո Chupa Chups: Անվան և ապրանքանիշի պաշտոնական գրանցումը կատարվել է 1962 թվականին: Իսկ 1964 թվականին ընկերությունը հայտնի է դարձել որպես Chupa Chups, որի հիմնական արտադրությունը եղել է Բարսելոնի մոտ գտնվող Սան Էստեբան դե Սասրովիրաս քաղաքում:

«Չուպա Չուպսի» պատմության մեջ ամենահիշարժանն այն է, որ Սալվադոր Դալին ինքն է մշակել ապրանքանիշի լոգոն: Ժամանակի ընթացքում փոխվել է դիզայնը, բայց, այնուամենայնիվ, հիմնական գծերը մնացել են: Լեգենդար նկարչի հետ հանդիպելու համար Բերնաթը 1969 թվականին գնացել էր Ֆիգերաս: Նա խնդրել է Սալվադոր Դալիին որոշակի գումարի դիմաց «Չուպա Չուպսի» համար լոգոտիպ նկարել: Մի քանի ժամ անց ամեն ինչ պատրաստ էր: Արվեստագետի ստեղծած լոգոտիպը նման էր երիցուկի: Աշխատանքը լիովին բավարարել է Բերնաթին, իսկ Դալիի մասնակցությունը նպաստել է սառնաշաքարի ավելի մեծ ճանաչմանը ողջ աշխարհում:

Ներկայումս կա այդ սառնաշաքարի ավելի քան 100 տեսակ։ Արտադրության տեխնիկական նորարարությունների, ինչպես նաև իր վառ փաթեթավորման և ճաշակի բազմազանության շնորհիվ այսօր Chupa Chups-ը ամենատարածված սառնաշաքարն է աշխարհի բոլոր երկրներում, այն սիրում են և՛ երեխաները, և՛ մեծահասակները:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում