Մերի Այդինյանը երգեց «Մերի»

Ռուսաստանի Եկատերինբուրգ քաղաքի ամենասիրված հայ երգչուհի Մերի Այդինյանը նոր տեսահոլովակ է ներկայացրել: Այն կոչվում է շատ պարզ` «Մերի»: Այս առիթով էլ զրուցեցինք երգչուհու հետ:

-Ռուսաստանում լայն ճանաչում ձեռք բերած երգչուհին ինչո՞ ւ որոշեց հերթական` նոր տեսահոլովակի պրեմիերան անցկացնել Երևանում:

 -Իմ գրեթե բոլոր տեսահոլովակների պրեմիերաները տեղի են ունեցել Երևանում, որովհետև ես գերադասում եմ դա անել իմ հայրենիքում` Հայաստանում, մանավանդ որ երգերիս մեծ մասը հայերեն է: Առաջին երգս և տեսահոլովակս ռուսերեն էր, այդ պատճառով պրեմիերան արեցինք Մոսկվայում`  МУЗ TV -ում:

- Ո՞ւմ հետ եք համագործակցել տեսահոլովակի շրջանակներում:

- Երգի հեղինակը Ռիչարդ Մադլենյանն է, խոսքինը` Գրիգոր Կյոկչյանը: Երգը գործիքավորել է Մարտին Միրզոյանը: Տեսահոլովակի ռեժիսորը Ժոռ Մելոյանն է, գաղափարն ու սցենարը իմն են, ոճով նույնպես ինքս եմ զբաղվել, իսկ պարերը բեմադրել է Հովհաննես Հովհաննիսյանը:

- Հաճա՞խ եք լինում Երևանում, ի՞նչն է այստեղ Ձեզ դուր գալիս:

- Այո, ամեն տարի լինում եմ Երևանում, սիրում եմ այն ամենը, ինչ կապված է ոչ միայն Երևանի, այլև ողջ Հայաստանի հետ:

- Երբևէ մտածե՞լ եք հայրենիքում երաժշտական նախագծերին մասնակցելու մասին:

-Գուցե մի օր որոշեմ մասնակցել որևէ մրցույթի, կլինի դա Հայաստանում, թե այլ երկրում` չեմ կարող ասել:

- Իրավաբանի մասնագիտությամբ երգչուհին դժվարություններն ինչպե՞ս է հաղթահարում:

- Շատ հեշտ. իրավաբանի մասնագիտությունն ինձ օգնում է այն առումով, որ ես այս գործի մեջ նույնպես գիտեմ բոլոր գրված ու չգրված օրենքները, գիտեմ ինչպես պաշտպանել իմ շահերը, քանի որ հստակ գիտեմ, թե ինչ եմ ուզում:

- Գեղեցիկ ձայնային տվյալներ, աշխատասիրություն. Ի՞նչ ծրագրեր ունեք:

- Ես ընդհանրապես չեմ սիրում ծրագրել: Ամեն առավոտ արթնանում եմ նոր մտքերով ու ցանկություններով: Ես չեմ երգում ինչ-որ մի ծրագրի կամ նպատակի համար: Երգում եմ, քանի որ անչափ սիրում եմ երգն ու երաժշտությունը ու չեմ պատկերացնում ինձ` առանց երգի:

 - Հնարավո՞ր է մի օր երևանյան հանդիսատեսը Ձեզ հանդիպի մենահամերգով:

- Մենահամերգը պահանջում է մեծ աշխատանք, բայց նախ և առաջ դա հանդիսատեսի սերն է, որը ես զգում եմ ամեն տեսահոլովակից հետո: Շնորհակալ եմ բոլոր նրանց, ովքեր ինձ միշտ ոգևորում են իրենց մաղթանքներով, բարի և լավ խոսքերով, բազմաթիվ նամակներով: Կգա նաև մենահամերգի ժամանակը:

 

Աղբյուրը՝ TV Մոլ