Բեյսբոլ. որտե՞ղ է այն սկզբնավորվել՝ ԱՄՆ-ո՞ւմ, թե՞ Մեծ Բրիտանիայում. «Փաստ»

«Փաստ» օրաթերթը գրում է

Բեյսբոլը (անգլ.՝ baseball, base - բազա, հիմք և ball - գնդակ), թիմային խաղ է բեյսբոլային գնդակով և մականով։ Խաղին մասնակցում է երկու թիմ, յուրաքանչյուրում՝ ինը (երբեմն տասը) խաղացող։ Ամերիկյան ֆիլմերը դիտելիս նկատելի է, թե ինչպես են շատ հերոսներ մոլեռանդորեն սիրում բեյսբոլը, այցելում են մարզադաշտեր ընտանիքներով կամ ընկերների խմբերով, խաղադրույքներ կատարում կամ երազում հանդիպել իրենց սիրելի սպորտաձևի աստղերի հետ: Այո, իսկապես, Ամերիկայում վերջին հարյուր տարվա ընթացքում բեյսբոլը դարձել է ազգային գաղափար և ոչ միայն սպորտ: Տրամաբանական կլիներ ենթադրել, որ բեյսբոլը հորինել են հենց ամերիկացիները, սակայն այս հարցում կարծիքները տարբեր են։ Ամերիկացիներն, անկասկած, իրենց են համարում իրենց սիրելի խաղի ստեղծողները, սակայն բրիտանացիներն այդ հարցում ունեն իրենց կարծիքը, քանի որ բեյսբոլը անգլիական կրիկետ խաղի շատ մերձ «ազգականն» է։

Բրիտանացիները վստահ են, որ բեյսբոլը հայտնվել է մոտ 18-րդ դարի երկրորդ կեսին ինչ-որ ժամանցային հրատարակության թողարկումից հետո, որտեղ խաղի նկարագրություն կար նկարներով։ Բայց, այնուամենայնիվ, փաստերն ինքնին խոսուն են, և առաջին բեյսբոլի ակումբը ստեղծվել է ամերիկացի սպաների կողմից։ Ամերիկացիներն են հաստատել կանոնները, թիմերի կազմի չափանիշը և անցկացրել բեյսբոլի առաջին խաղը, որը նշանավորել է այդ հետաքրքիր սպորտաձևի զարգացման սկիզբը, խաղ, որը հետագայում ընդգրկվել է օլիմպիական խաղերի ցուցակում։ 19-րդ դարի 60-ական թվականներին է հայտնվել առաջին ակումբը, որը սկսել է վճարել իր խաղացողներին խաղերի համար, ուստի բեյսբոլը անմիջապես բաժանվել է «պրոֆեսիոնալի» և «սիրողականի»։ Ավելին, պրոֆեսիոնալ սպորտը ԱՄՆ-ում մեր ժամանակներում հասել է ֆինանսական աննախադեպ բարձունքների, քանի որ բեյսբոլիստի միջին աշխատավարձը տարեկան ավելի քան 500 հազար դոլար է, իսկ լավագույն խաղացողները դառնում են իսկական աստղեր և ազգային հերոսներ։

Հետո՝ 19-րդ դարի 60-ականներին, ստեղծվել է Բեյսբոլի ազգային լիգան, որն այժմ համարվում է ամենահզոր սպորտային կազմակերպությունը՝ ավելի քան 900 միլիոն դոլար տարեկան շրջանառությամբ։ Մեր ժամանակներում ԱՄՆ-ում արդեն ձևավորվել է բեյսբոլի հետ կապված մի ամբողջ ենթամշակույթ։ Դրանք տասնյակ թեմատիկ ամսագրեր են, սիրողական ակումբներ երեխաների և մեծահասակների համար և, իհարկե, պրոֆեսիոնալ թիմեր: Բեյսբոլը բավականին հաջող զարգացել է, և արդեն 20-րդ դարի սկզբին անցկացվել է աշխարհի առաջին առաջնությունը, որը շատ պայմանականորեն կարելի է անվանել բուն բեյսբոլի առաջին միջազգային առաջնություն, քանի որ դրան մասնակցել է ընդամենը երկու թիմ՝ ԱՄՆ-ն և Մեծ Բրիտանիան։

Հետո բեյսբոլը վստահորեն տիրել է մոլորակին, աշխարհի ավելի քան 120 երկրում այն շատ տարածված է: Բեյսբոլի գոյության ընթացքում նրանից առաջացել է նաև որոշակիորեն պարզեցված մարզաձև՝ սոֆթբոլ, որը հարմարեցված է տանը կամ փոքր դաշտերում խաղալու համար։ Բացի ԱՄՆ-ից, Մեծ Բրիտանիայից և Կուբայից, բեյսբոլի վառ թիմեր են ներկայացրել նաև Կանադան, Մեքսիկան, Լատինական Ամերիկան, Ավստրալիան, Ճապոնիան և Կորեան։

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում