Հարկավոր է հստակ պատկերացում պետական շահերի մասին․ ի՞նչ է առաջարկում Արթուր Ղազինյանը

Հայաստանում իրավիճակը փոխելու համար հարկավոր է հստակ պատկերացում պետական շահերի մասին։ Այդ շահերը ձևակերպելու և դրանք բոլորի համար համադրելու կարիք կա։ Որևէ փաստաթղթում այդ շահերը ներկայացված չեն, ուստի հանրության մեջ կարծիքները տարբերվում են։ Ինչ-որ մեկի համար շահը կարող է լինել Արցախը, մեկ ուրիշի համար պարզապես սեփական եկամուտները։

«Մեկ Հայաստան» կուսակցության նախագահ Արթուր Ղազինյանն է հարցազրույց տվել ռուսաստանյան «NovostiNK» լրատվամիջոցին, ներկայացրել թե՛ իր առաջիկա անելիքները, թե՛ Ազգային ժողովի մանդատից հրաժարվելու իր շարժառիթները, ընդգծել, որ հարկավոր է ձևակերպել համահայկական երազանք, մարդկանց համոզել հավատալ այդ երազանքին և պայքարել դրա համար։

«Մենք չունենք երազանք, մենք պարզապես կորցրել ենք մեր կողմնորոշիչները»,- նշում է Ղազինյանը։

Խոսելով իր մանդատից հրաժարվելու հանգամանքի վերաբերյալ՝ նախկին պատգամավորն ընդգծում է, թե մեկ տարի խորհրդարանում աշխատելուց հետո իրեն հասկանալի դարձավ՝ ներհամակարգային գործողություններով անհնար է շտկել իրավիճակը և արդարացնել հանրությունից ստացած մանդատը։

«Դիմադրություն» շարժումը անկախ իր ելքից, Արթուր Ղազինյանին ստիպել էր գիտակցել, որ վերադարձ խորհրդարան անհնար է թե՛ հաղթանակի և թե՛ պարտության դեպքում, քանի որ հանրային պահանջը այն ժամանակ և այժմ էլ կայանում է մեկ բանում՝ պետք է իրական քաղաքական արշավ տանել այս իշխանությունների դեմ, ուստիև, ընդգծում է Արթուր Ղազինյանը, նշում, որ հարկավոր է սեփական քաղաքական պայքարը տանել, հավաքել մարդկանց՝ ինտելեկտուալների, արհեստավարժների, սկսել մշակել իրական քաղաքական առաջարկներ ժողովրդին։

Արձանագրելով, որ փոփոխությունների իրական հանրային քաղաքական և սոցիալական պահանջ կա, Արթուր Ղազինյանը նաև ցավով նշում է, թե այդ պահանջների իրական «օպերատորներ» չկան, քանի որ հստակ, ակտիվ գործողություն վարող առաջնորդներ ընդդիմադիր դաշտում պարզապես գոյություն չունեն, իսկ առանց առաջնորդի, առանց թիմի և առանց հայեցակարգի անհնար է ինչ-որ փոփոխությունների հասնել և արմատախիլ անել նիկոլիզմը։

«Առանց կասկածի ընդդիմությունն այսօր 10 աստիճանով ավելի բարձր է, քան Փաշինյանն ու նրա թիմը և՛ ինտելեկտուալ, և՛ կազմակերպչական, և՛ գիտելիքների առումով, սակայն պետք է պատասխանել 3 հիմնական հարցի՝ ի՞նչ ենք անում, ո՞վ է անում, և ո՞վ է գլխավորում այդ գործընթացը»,- նշում է նախկին պատգամավորը։

Խոսելով «Դիմադրություն» շարժման պարտության մասին՝ Արթուր Ղազինյանը նշում է, որ սպասում էր, թե կհայտնվի առաջնորդ, թիմ, կներկայացվի հստակ կոնցեպցիան՝ ի՞նչն են փոխում, ո՞ւր են գնում, ինչպե՞ս են պատկերացնում արցախյան խնդրի կարգավորումը Թուրքիայի հետ հարաբերությունների կարգավորումը, տարածաշրջանային և արտաքին քաղաքական անվտանգության քաղաքականության հարցերը, ինչպե՞ս են փոխում կրթական, իրավական համակարգերը։

«Ժողովուրդն իրավունք ունի իմանալ, թե ինչպիսի փոփոխություններ պետք է սպասվի, եթե հնարավոր լինի փոխել իշխանությունը»,- ասում է Արթուր Ղազինյանը, նա փաստում է, որ գործող խորհրդարանը այլևս կորցրել է իր լեգիտիմությունը և չի արտացոլում հանրության իրական քաղաքական տրամադրությունները։ Դա արդեն դիսֆունկցիոնալ մարմին է՝ կտրված իրականությունից և չի կարող լուծել Հայաստանի առջև ծառացած խնդիրները։

Իր պայքարը ծավալելու համար Արթուր Ղազինյանը մտադիր է Հայրենիքին նվիրված պրոֆեսիոնալների հրավիրել, մշակել հայեցակարգեր, երկխոսություն ծավալել տարբեր ոլորտների շահառուների հետ, հարկավոր է մշակել ազգային անվտանգության նոր հայեցակարգ, պետք է ներկայացնել հստակ առաջարկներ՝ ի՞նչ ենք փոխում, ինչպե՞ս ենք պատկերացնում արցախյան հարցի լուծումը, ի՞նչ դեր Հայաստանն ու հայկական աշխարհը կարող են խաղալ տարածաշրջանում և համաշխարհային քաղաքականության մեջ, ինչպե՞ս են պատկերացնում Հայաստանի արտաքին քաղաքականությունը, և կա արդյո՞ք այդպիսի արտաքին քաղաքական հայեցակարգ։

Ահա այս հարցերն են, որ ցանկանում է բարձրացնել Արթուր Ղազինյանը, ձևակերպել դրանք և ներկայացնել հանրությանը, որպեսզի հանրությունն ինքն էլ հստակ իմանա, թե ի՞նչ պետք է ակնկալի թե՛ քաղաքական ուժերից, թե՛ ընդդիմությունից, և թե ի՞նչ փոփոխություններ են իրեն սպասվում իրականում։

Վարդան Խաչիկյան