Ինչպես դստեր մի հարցը դարձավ մեծ գյուտի առիթ. «Փաստ»

«Փաստ» օրաթերթը գրում է

Մարդկության ողջ պատմության ընթացքում ստեղծվել են հսկայական բազմազանության լուսանկարչական սարքեր: Սակայն դրանցից մեկը ամենայուրահատուկն է և ոչ մեկի հետ ոչ մի նմանություն չունի. դա Պոլարոիդն է: Այդ սարքը հանգեցրել է նոր տիպի սարքերի առաջացման, որոնք հետագայում ստացել են ակնթարթային լուսանկարչական սարքեր անվանումը (կամ՝ մեկ փուլով լուսանկարչական գործընթացի տեսախցիկներ): Անհնար է պատկերացնել, թե ինչպիսին կլիներ այսօր միջին սիրողական լուսանկարչի տեսախցիկը առանց թվային լուսանկարչության: Կարելի է ենթադրել, որ դա կլիներ նույն Պոլարոիդը, բայց ավելի թարմացված: Պոլարոիդի գործունեության սկզբունքն այնպիսին է, որ նկարելուց հետո մի քանի վայրկյան անց արդեն կարելի է լուսանկար ստանալ, որի տպագրությունը տեղի է ունենում անմիջապես սարքի ներսում:

Պոլարոիդ լուսանկարչական սարքը, ի թիվս այլ բաների, նաև ավտոմատ մութ սենյակ է, բայց շատ մանրակերտ: Պոլարոիդ ֆոտոխցիկը հորինել է ամերիկացի մի փայլուն գյուտարար՝ Էդվին Լանդը, որը ծնունդով Օդեսայից է: Մեծ հետաքրքրություն ունենալով օպտիկայի և քիմիայի նկատմամբ՝ նա ստեղծել է Polaroid ընկերությունը, իսկ նրա գլուխգործոց Պոլարոիդը ոչ միայն եզակի տեսախցիկ էր, այլ նաև գիշերային տեսողության սարք, տարբեր տիպի ռենտգենյան ժապավեններ և շատ ավելի բաներ: Այդ հանճարի շնորհիվ է աշխարհն իմացել այն մասին, թե ինչպես են աշխատում 3D ակնոցները: Աշխարհին անսովոր նորույթներով անընդհատ զարմացնելու կարողության պատճառով 1950 թվականին Polaroid ընկերությունը ստացել է «Գյուտերի գործարան» անվանումը: Գյուտարարի դուստրը կարևոր դեր է խաղացել Պոլարոիդ տեսախցիկի ստեղծման գործում: Մանկության տարիներին նա հարցրել է Լանդին, թե ինչու լուսանկարը չի հայտնվում նկարելուց անմիջապես հետո:

Հորը նման հարց տալով՝ աղջիկը չէր էլ կարող մտածել, որ դրանով նա որոշել է ակնթարթային լուսանկարչության ճակատագիրը: Այդ գաղափարը սկսել է անընդհատ հետապնդել Լանդին: Նոր տեսախցիկի աշխատանքի սկզբունքը հորինվել է մեկ ժամում (սկզբունքն այն էր, որ սարքի ներսում լինի մինի ֆոտոլաբորատորիա, որտեղ իրականացվում է լուսանկարի երևակում, ֆիքսում և չորացում մի քանի րոպեի ընթացքում), բայց դրա իրականացման համար պահանջվել է շուրջ երեք տարի: Լուսանկարչության աշխարհը բառացիորեն պայթել է 1946 թվականին նոր Պոլարոիդ տեսախցիկի ներդրմամբ: Չնայած զգալի ծախսերին, ԱՄՆ-ի բնակչության կեսը այն գնել է ո ր պես ըն տ ա ն ե կան տե սախ ց ի կ :

1980-ականների վերջը և 1990-ականների սկիզբը «նոր ռուսների» դասի առաջացման ժամանակաշրջանն է, որի խորհրդանիշերն են դարձել կարմրավուն կաշվե բաճկոնը, «Մերսեդես» մեքենան, ոսկե հաստ շղթան և անպայման Պոլարոիդ ֆոտոապարատը: Ներկայումս Polaroid ընկերությունը մի փոքր կորցրել է իր ժողովրդականությունը, բայց այն դեռ հաջողություններ ունի: Polaroid-ը հիմա արտադրում է կոմպակտ տեսախցիկներ, գրպանի տպիչներ և, իհարկե, տեսախցիկներ (ներառյալ ակնթարթային): Polaroid Z340 ակնթարթային թվային ֆոտոխցիկը ամերիկյան վերջին նորությունն է, որը կարող է օգտագործվել նաև որպես սովորական թվային ֆոտոխցիկ:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում