Ֆագոտ՝ մոտ երեք կիլոգրամանոց երաժշտական «կապոց». «Փաստ»

«Փաստ» օրաթերթը գրում է

Ֆագոտը բաս, տենոր և մասամբ ալտ ռեգիստրի փողային երաժշտական գործիք է՝ պատրաստված թխկու փայտից: Ենթադրվում է, որ այդ գործիքի անվանումը գալիս է իտալական fagotto բառից, որը նշանակում է «հանգույց, կապոց»: Եվ իրոք, եթե ապամոնտաժվի գործիքը, ապա կստացվի փայտանյութի կապոց հիշեցնող մի բան: Ֆագոտի ընդհանուր երկարությունը 2,5 մետր է, իսկ կոնտրֆագոտինը՝ 5 մետր: Գործիքի քաշը մոտ 3 կգ է:

Թե կոնկրետ ով է առաջինը հորինել ֆագոտ երաժշտական գործիքը, անհայտ է, բայց 17-րդ դարի Իտալիան է համարվում այդ գործիքի ծննդավայր: Դրա նախնին հանդիսացել է հնագույն բոմբարդան, որը եղեգների ընտանիքի բաս երաժշտական գործիք է: Ֆագոտը տարբերվում էր բոմբարդայից իր կառուցվածքով. փողը բաժանված է մի քանի մասերի, որի արդյունքում ավելի դյուրին է դարձել գործիքը պատրաստել և կրել: Ձայնը նույնպես փոխվել է դեպի լավը, սկզբից ֆագոտը կոչել են դուլցիան, որը թարգմանաբար նշանակում է «քնքուշ, քաղցր»: Ֆագոտն իրենից ներկայացնում է երկար, ճկված փողե խողովակ, որի վրա տեղադրված է փականային համակարգ:

Առաջին ֆագոտները հագեցած են եղել երեք փականով: Ավելի ուշ՝ 18-րդ դարում, դրանք դարձել են հինգը: Սկզբնական շրջանում ֆագոտը օգտագործել են բաս ձայները ուժեղացնելու և կրկնօրինակելու համար: Միայն 17-րդ դարից սկսած է այն սկսել ինքնուրույն դեր խաղալ: Այդ ժամանակ նրա համար սոնատներ են գրել իտալացի կոմպոզիտորներ Բիաջիո Մարինին, Դարիո Կաստելլոն և այլոք: 19-րդ դարի սկզբին Ժան-Նիկոլ Սավարան երաժշտական աշխարհին է ներկայացրել տասնմեկ փականով ֆագոտը: Որոշ ժամանակ անց Ֆրանսիայից ժամանած երկու վարպետներ՝ Տրեբերտը և Բաֆեթը, բարելավել են գործիքը և ստեղծել նոր տարբերակ: Ֆագոտի զարգացման գործում կարևոր ներդրում են ունեցել գերմանացի վարպետներ Կառլ Ալմենրեդերը և Յոհան Ադամ Հեկելը:

Հենց նրանք են 1831 թվականին Բիբրիխում հիմնել փողային գործիքների արտադրության ձեռնարկություն: Ալմենրեդերը 1843 թվականին ստեղծել է տասնհինգ փականով ֆագոտ: Այդ մոդելը հիմք է դարձել «Haeckel» ընկերության կողմից ֆագոտի արտադրության համար, և ընկերությունը դարձել է երաժշտական այդ գործիքի արտադրության առաջատարը: Հիմա էլ ավստրիացի և ֆրանսիացի վարպետների ֆագոտները լայն տարածում ունեն:

Ներկայում առկա է ֆագոտի երեք տեսակ՝ կվարտֆագոտ, ֆագոտինո, կոնտրֆագոտ: Ժամանակակից սիմֆոնիկ նվագախմբերը այժմ հիմնականում օգտագործում են կոնտրֆագոտ: 18-րդ դարը Գերմանիայում եղել է ֆագոտի օգտագործման գագաթնակետը: Եկեղեցական երգչախմբերի կատարումները ուղեկցվել են ֆագոտի հնչյուններով: Ներկայումս այդ երաժշտական գործիքի ձայնը կարելի է լսել սիմֆոնիկ և փողային նվագախմբերի համերգներին:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում