Շնորհավոր Ամանոր և Սուրբ Ծնունդ

Past.am-ի անձնակազմը` լավագույն մաղթանքներով.

Սիրելի՛ ընթերցողներ, մի քանի ժամից ավարտվող այս տարում, մեր խորին համոզմամբ, Past.am-ի եւ իր օրեցօր աճող լսարանի կապն էլ ավելի է ամրապնդվել: Մեր թիմը ջանք ու եռանդ չի խնայել քաղաքականությամբ, մշակույթով, շոու-բիզնեսով, տնտեսությամբ և այլ բնագավառներով հետաքրքրվողներին մատուցել բովանդակալից տեղեկատվություն` կարեւորելով նաեւ նյութերի մատուցման ձեւը, մեր ընթերցողների նախասիրությունները, իսկ արդյունքում պարգեւատրվեցինք ձեր ամենօրյա մեծաքանակ այցելություններով՝ նվաճելով հանրապետությունում 3-րդ ամենաշատ այցելություն ունեցող կայքի համբավը:

Լրատվական ոլորտում հայաստանյան ամենավարկանշային եւ ընթերցողների վստահությունն ու համակրանքը վաստակած կայքը խոստանում է գալիք տարում դիրքերը չզիջել ու ձեզ ներկայանալ մի շարք նոր նախագծերով, իր առջև դնել ավելի բարձր նշաձողեր և նվաճել նորանոր բարձունքներ՝ իր սիրելի ընթերցողների հետ միասին:

Մենք շնորհակալ ենք ձեզ՝ մեր սիրելի ու հավատարիմ ընթերցողներ: Եթե չլինեիք դուք, չէր լինի նաև Past.am-ը, չէր լինի մեր հաջողությունը լրատվական դաշտում:

Ամեն բանի սկիզբ անցյալի հիշեցումն է ... Տարին վերջացավ, ավարտվեց ևս մեկ տարի, անցյալում մնաց 2015 թվականը՝ իր հետ տանելով ուրախության ու տխրության, հաջողության ու անհաջողության պահեր: Յուրաքանչյուր տարի կերտում է մեր պատմության ևս մեկ էջ, որը կարդալով կարող ենք հետադարձ հայացք նետել ու տեսնել մեր ձեռքբերումներն ու կորուստները:

Եկեք հետադարձ հայացք գցենք 2015 թվականին, եկեք մի պահ մտածենք այն մասին, թե ինչ տվեց այն մեզ, ինչ վերցրեց մեզնից, ինչ հետք թողեց մեր կյանքում և որ ինչ ունենք շտկելու 2016 թվականին: Մենք հավատում ենք, հավատում ենք, որ ամեն բան լավ է լինելու, ամեն լավ բան դեռ առջևում է:

Past.am-ը շնորհավորում է բոլորիդ Ամանորն ու Սուրբ Ծնունդը: Թող 2016 թվականն արգասաբեր տարի լինի մեր ժողովրդի համար, խաղաղությունն ու բարօրությունն ուղեկցեն նրան և յուրաքանչյուր հայի սրտում ջերմություն և ուրախություն լինի, ամենակարևորը՝ մեր լրատվությունը թող այլևս չհրապարակի հայ զինվորի մահվան մասին լուր: Մենք ուրախ կլինենք 2016 թվականին միայն լավ լուրերով, մեր երկրի հաջողությունների մասին պատմող նյութերով ներկայանալ ընթերցողին: Թող 2016 թվականը բեկումնային դառնա մեր 25-ամյա անկախության տարեգրության մեջ, լինի Հայաստանի Հանրապետության նվաճումների տարի բոլոր ասպարեզներում:

Շնորհավոր Ամանոր և Սուրբ Ծնունդ: