ՔՊ-ական «համայնքապետացուների» PR-ը՝ վերահաս պատերազմի ֆոնին

Շուտով ջեռուցման սեզոնն է, իսկ էլ. էներգիայի համար վճարում եք չափազանց շատ։ Իսկ դուք գիտե՞ք, որ այսուհետ էլ. էներգիան յուրաքանչյուր ընտանիքում կարող է լինել անվճար։ Սեղմեք և ծանոթացեք պայմաններին` ԱՅՍՏԵՂ

Սեպտեմբերի 25-ին Հայաստանում կկայանան տեղական ինքնակառավարման մարմինների ընտրություններ: Եվ չնայած սեպտեմբերի 13-ից Հայաստանի սահմաններում լարված իրավիճակ էր, սակայն ընտրություններն ամեն դեպքում կկայանան: Ռազմական գործողությունների հետեւանքով տուժած Սյունիքի մարզի երկու համայնքներում՝ Քաջարանում եւ Սիսիանում, առաջիկա կիրակի նույնպես համամասնական ընտրակարգով ավագանու անդամի ընտրություններ են։ Եվ չնայած բոլոր ուժերը հայտարարել էին քարոզարշավը դադարեցնելու մասին, սակայն դրանք այնուամենայնիվ փոքր մասշտաբներով, բայց կատարվում են: 

Հատկապես ակտիվ է Սիսիանում ՔՊ ցուցակը գլխավորող Արմեն Հակոբջանյանը: Վերջինս չնայած ստեղծված լարված, նույնիսկ պատերազմական իրավիճակին,՝ ինչպես ասում են, իրեն չի կորցնում և ակտիվորեն զբաղված է իր փիառով: Եվ բնական է, որ այդ պահվածքից Սիսիանի բնակիչները դժգոհում են` հայտարարելով,  որ ՔՊ-ն գոնե թիկունքը զինի, թաքստոցի հարց լուծի, ընտրության ցուցակ է կարգավորում:  Ինքը` Հակոբջանյանը, իր հերթին պնդում է, որ ակտիվ քարոզարշավի մեջ չէ: «Ամսի 14-ից այս կողմ որեւէ քարոզարշավ չի իրականացվել, եղել են հանդիպումներ քաղաքացիների հետ` ի պաշտոնե: Ես համայնքի ղեկավար եմ եւ անհանգստացած եմ իմ բնակիչների համար, զուտ հարցրել եմ՝ ոնց եք, ոնց չեք»,- հայտարարում է նա: Արդյոք չի ստացվում, որ նա ի պաշտոնե ունի բնակիչների հետ հանդիպելու հնարավորություն և կարող  է քարոզարշավ իրականացնել նաև առանց աչք ծակելու և հանրային պարսավանքի արժանանալու:

Բացի այդ, Հակոբջանյանը չի մոռանում նաև ինքնափիառվել, լրատվամիջոցների հետ զրույցի ընթացքում վերջինս որպես համեստության տիպար նշել է՝ «Իմ համեստ ու խիստ զուսպ տեսակը թույլ չի տալիս առավել մանրամասնելու իմ սրտացավ ու նվիրումով մոտեցումը»։ Չնայած, թեկնածուի կարծիքով, «ինքնափիառվելու ժամանակը չէ», ու «ամեն արած չէ, որ կարելի է բարձրաձայնել, այն էլ՝ այս իրավիճակում»: Հաշվի առնելով, որ բնակիչները այնքան էլ չեն հասկանում, թե ինչով է զբաղված համայնքի ղեկավարությունը նախապատերազմական այս իրավիճակում` Հակոբջանյանը, իհարկե, կարող էր բացել փակագծերը, թե այդ ինչ կայսերական ծրագրեր է իրականացնում, սակայն նախընտրեց համեստորեն լռել...

Հակոբջանյանին իր ակտիվությամբ չի զիջում Ալավերդիում համայնքապետ ՔՊ թեկնածու Արեն Մկտչյանը: Վերջինս, օրինակ, իր ֆեյսբուքյան էջում պատերազմական օրերին զբաղված էր նրանով, որ հայտնում էր, թե ինչպես են իր խնդրանքով այս կամ այն գործարարները Ալավերդիում զինվորների առանձնատներ կառուցել, կամ օգնել անպտղությամբ տառապող զույգերին՝ ֆինանսներ տրամադրելով բուժման համար: Դրանից բացի, Մկրտչյանը ավետել էր, որ Ալավերդու Էնգելս թաղամասում հիմնանորոգվում է շուրջ 40 տարի առաջ ասֆալտապատված ճանապարհը; Իհարկե, նա չի պատասխանի այն հարցին, թե ինչու են իշխանությունները 4 տարի անց հիշել այդ ճանապարհի մասին` այն էլ ընտրությունների նախաշեմին: Մկրտչյանը նաև զբաղված է ամփոփիչ հարցազրույցներ տալով և մարդկանց կոչ անելով՝ վաղը մասնակցել ընտրություններին:

Ինչպես տեսնում ենք` չնայած երկրում ստեղծված լարված և պատերազմական իրավիճակին՝ ՔՊ-ականների համար առաջնայինը փիառն է, ձայն պոկելն ու պաշտոն ստանալը: Իսկ Սիսիանի և Ալավերդիի բնակչության խնդիրներով թող զբաղվեն իրենք` բնակիչները, ինչպես ասում են՝ խեղդվողի փրկությունը խեղդվողի ձեռքերում է...