Շատ լսենք հարսանիքների և երեխաների ծնունդների մասին. պատգամավոր Թևան Պողոսյանը Նոր տարին դիմավորում է ընտանիքի հետ

Անդրադառնալով անցյալ տարվա հաջողություններին՝ Past.am-ի հետ զրույցում Թևան Պողոսյանն առանձնացրեց Հայոց ցեղասպանության հարյուրամյակի միջոցառումների պատշաճ կազմակերպումը:

Ըստ նրա՝ հիշատակումից բացի, մենք որոշ չափով կարողացանք նաև դատապարտման ուղղությամբ քայլեր արձանագրել: «Հուսով եմ՝ ապագայում այս ամենն ավելի կխորանա, և Հայաստանն իր ներդրումը կբերի համամարդկային այդ տեսակի հանցագործությունները ոչ միայն հիշելուն, այլև դատապարտմանը, ոճրագործություններ իրականացնողներն էլ կհասկաանան, որ այս տեսակ հանցագործությունները վաղեմության ժամկետ չունեն»,- հույս է հայտնել Թ. Պողոսյանը:

Ըստ Թևան Պողոսյանի՝ հաջողություն էր նաև այն, որ մեր բանակն ապացուցեց, որ տարածաշրջանում ամենահզորն է և միշտ իր առջև դրված խնդիրը կլուծի: «Պետք է նաև հիշենք մեր այն երիտասարդ հերոսներին, որոնք անմահացան, իսկ բոլոր վիրավոր տղաներին մաղթենք շատ արագ ապաքինում և առողջություն»,-հավելեց մեր զրուցակիցը:

Խոսելով մարտահրավերներից՝ պատգամավորը նշեց, որ մշտական բնույթի խնդիր են մեր տնտեսությունը և ժողովրդավարական ինստիտուտները, որի առումով առաջընթաց չենք գրանցել և նույնիսկ հետընթաց ենք գրանցել: «Այդ ամենը պետք է կարողանալ 2016-ին հաղթահարել և առաջ գնալ»,- ասաց նա:

Հետաքրքրվեցինք նաև քաղաքական գործչի անձնական հաջողություններով և անհաջողություններով: «Այն, որ ընտանիքում կորուստներ չունեմ, ինձ համար արդեն մեծ հաջողություն է: Անհաջողություն եմ համարում, որ որոշ ընկերներ կամ բարեկամներ լքել են Հայաստանը»,-ասաց նա:

Եվ վերջում պարոն Պողոսյանը հղեց հետևյալ մաղթանքները. «Մաղթում եմ, որ կարողանանք հպարտությամբ հաղթահարել դժվարությունները, որոնք բոլորս արդեն գիտակցում ենք, որ ունենալու ենք: Ցանկանում եմ. որ ունենանք ուժ, տոկունություն, եռանդ և առողջություն: Լսենք ավելի շատ հարսանիքների և երեխաների ծնունդների մասին: Հուսով եմ նաև, որ մեր բանակը նույնպես այդպես հզոր կմնա, իսկ պետական իշխանությունները կկարողանան այնպիսի քաղաքականություն վարել, որ տնտեսությունն ու ժողովրդավարական ինստիտուտները զարգանան»:

Լևոն Փանոսյան