Մուշեղ Բաբայանը՝ Հակակոռուպցիոն կոմիտեի նախագահի տեղակալ

Փնտրում եք բարձր վարձատրվող աշխատանք՝ սեղմեք ԱՅՍՏԵՂ

Վարչապետ Նիկոլ Փաշինյանը հոկտեմբերի 19-ին որոշում է ստորագրել, որում ասվում է․

«Ղեկավարվելով «Հակակոռուպցիոն կոմիտեի մասին» օրենքի 17-րդ հոդվածի 15-րդ մասով և 20-րդ հոդվածի 1-ին մասով՝ Մուշեղ Բաբայանին նշանակել հակակոռուպցիոն կոմիտեի նախագահի տեղակալ՝ ազատելով նրան հակակոռուպցիոն կոմիտեի նախագահի տեղակալի պաշտոնակատարի պաշտոնից»:

Հիշեցնենք, որ մինչ այդ, վարչապետի 2021 թվականի հոկտեմբերի 21-ի որոշմամբ նա նշանակվել էր հակակոռուպցիոն կոմիտեի նախագահի տեղակալի պաշտոնակատարի պաշտոնում։ Ավելի վաղ նա զբաղեցրել է նաև ՀՔԾ պետի տեղակալի պաշտոնը, իսկ մինչ այդ նա զբաղեցնում էր Ոստիկանության կրթահամալիրի պետի պաշտոնը։

Iravaban.net-ը Ձեզ է ներկայացնում նրա կենսագրությունը։

Ծնվել է 1975 թ. նոյեմբերի 22-ին, Երևան քաղաքում:

1993-1997 թթ. ուսանել է ՀՀ ՆԳ և ԱԱՆ բարձրագույն դպրոցում «Իրավագիտություն» մասնագիտությամբ, որն ավարտել է գերազանցությամբ:

Հանդիսանում է Հայաստանում Եվրոպական համալսարանի իրավագիտության ամբիոնի հայցորդ՝ «Հանրային իրավունք» մասնագիտությամբ:

1997-1999 թթ. ՀՀ ՆԳ և ԱԱՆ քննչական գլխավոր վարչության 4-րդ վարչության քննիչ

1999-2000 թթ. ՀՀ ՆԳ և ԱԱՆ քննչական գլխավոր վարչության 1-ին վարչության քննիչ

2000-2003 թթ. ՀՀ ոստիկանության քննչական գլխավոր վարչության 3-րդ (Հատկապես կարևոր գործերի քննության) վարչության քննիչ, ավագ քննիչ

2003-2005 թթ. Քննչական գլխավոր վարչության 2-րդ (Հատկապես կարևորագույն գործերի քննության) վարչության 2-րդ բաժնի ավագ քննիչ

2005-2007 թթ. ՀՀ ոստիկանության քննչական գլխավոր վարչության 2-րդ (Հատկապես կարևոր գործերի քննության) վարչության ֆինանսավարկային հանցագործությունների քննության բաժանմունքի պետ

2007-2010 թթ. ՀՀ ոստիկանության քննչական գլխավոր վարչության 2-րդ (Հատկապես կարևոր գործերի քննության) վարչության պետի տեղակալ, ինքը և պաշտոնեական և տնտեսական գործունեության դեմ ուղղված հանցագործությունների քննության բաժնի պետ

2010-2011 թթ. ՀՀ ոստիկանության քննչական գլխավոր վարչության 2-րդ (Հատկապես կարևոր գործերի քննության) վարչության պետի տեղակալ

20.10.2011-17.11.2011 թթ. ՀՀ ոստիկանության քննչական գլխավոր վարչության Երևան քաղաքի քննչական վարչության պետ

2011-2014 թթ. ՀՀ հատուկ քննչական ծառայության հատկապես կարևոր գործերի քննիչ, ավագ քննիչ

2014-2018 թթ. ՀՀ հատուկ քննչական ծառայության պետի տեղակալ

2018-2021 թթ. ՀՀ ոստիկանության կրթահամալիրի պետ

2018-2021 թթ. ՀՀ ոստիկանության կրթահամալիրի ավագ դասախոս

04.10.2021-21.10.2021 թթ. ՀՀ հատուկ քննչական ծառայության պետի տեղակալ

21.10.2021 թ-ից ՀՀ հակակոռուպցիոն կոմիտեի նախագահի տեղակալի պաշտոնակատար

1999 թ. վերապատրաստում է անցել ԱՄՆ-ում` Ալկոհոլի, ծխախոտի և պայթուցիկ նյութերի ապօրինի շրջանառության դեմ պայքարի բյուրոյի ակադեմիայում:

2003 թ. որակավորման բարձրացման դասընթաց է անցել ՌԴ ՆԳՆ աշխատակիցների որակավորման բարձրացման համառուսաստանյան ինստիտուտում:

2008 թ. որակավորման բարձրացման դասընթաց է անցել Բելառուսի Հանրապետության ՆԳՆ ակադեմիայի՝ Միգրացիայի և մարդկանց առևտրի դեմ պայքարի ոլորտում կադրերի պատրաստման, որակավորման բարձրացման, վերապատրաստման միջազգային ուսումնական կենտրոնում:

ՀՀ նախագահի` 2016 թ. նոյեմբերի 26-ի հրամանագրով շնորհվել է արդարադատության գեներալ-մայորի կոչում:

ՀՀ ոստիկանության պետի` 2018 թ. օգոստոսի 2-ի հրամանով նշանակվել է ՀՀ ոստիկանության կրթահամալիրի պետի պաշտոնին ոստիկանության գեներալ-մայոր կոչումով:

ՀՀ նախագահի` 21.11.2013 թ. հրամանագրով պարգևատրվել է «Մխիթար Գոշի» մեդալով, պարգևատրվել է նաև ՌԴ ՆԳՆ, ՀՀ հատուկ քննչական ծառայության, ՀՀ ոստիկանության մեդալներով, կրծքանշաններով, պատվոգրերով:

Հինգ գրքերի և վեց գիտական հոդվածների հեղինակ է։

Ամուսնացած է, ունի 4 երեխա: