Գինի Վիոնե. Ֆրանսիայից Հայկական կիրճ․ «Փաստ»

«Փաստ» օրաթերթը գրում է

Իրականում, Վիոնեն խաղողի տեսակ է, որից սպիտակ անուշաբույր գինիներ են պատրաստվել անգամ ավելի քան հազար տարի առաջ: Ընդ որում, դրանից ստացված գինենյութն օգտագործվել է և՛ համանուն ըմպել իքի ստեղծման համար, և՛ ավելացվել է այլ գինիների մեջ։ Վիոնե գինու պատմությունն սկսվել է Ֆրանսիայում՝ Հյուսիսային Ռոնում, բայց թե ով և երբ է առաջին անգամ այն ստացել, մենք դժվար թե երբևէ իմանանք: Միայն հայտնի է, որ Վիոնե խաղողը ամենահին տեղական սորտերից մեկն է եղել, բայց ժամանակի ընթացքում խաղողի այդ տեսակը գրեթե ամբողջությամբ անհետացել է, քանի որ սկսել են աննկարագրելի չափերով կրճատել դրա ցանքատարածքները։ Դա հիմնականում պայմանավորված է եղել նրանով, որ այն, համեմատած այլ տեսակի խաղողների հետ, բերքատվությամբ զիջում է և հեշտությամբ է ենթարկվում «փոշոտ բորբոս» հիվանդության ազդեցությանը, որը ամբողջ աշխարհի գինեգործների պատուհասն է, հատկապես անձրևոտ տարիներին:

Ի՞նչն է ստիպել խաղողագործներին կրկին հայացք նետել Վիոնե խաղողի տեսակին: Դա այդ խաղողից ստացվող գինու հիանալի համն է: Գինեգործները, նկարագրելով Վիոնե գինու փունջը, թվարկում են տասնյակ համեր և բուրմունքներ՝ գերհասունացած ծիրանի խառնուրդ նարնջի և դեղձի ծաղիկներով, տանձի և ակացիայի, մեղրի և համեմունքների, մանուշակի և նարցիսի, ալոճենու ծաղիկների և նարնջի, վանիլի ու մուշկի հետ և այլն: Նման բազմազանության շնորհիվ փորձագետները պատրաստ են ներել Վիոնե խաղողի պահանջկոտությունը, և արդյունքում այդ որթատունկի ցանքատարածքները նորից անընդհատ ավելանում են: Ի դեպ, չնայած բույրի հրաշալի փնջին, այդ խաղողի մեջ թթվությունը քիչ է, և այդ տեսակի մաքուր գինին չափազանց թունդ է ստացվում։ Ուստի, այն հիմնականում կուպաժավորվում է՝ խառնելով այլ տեսակ գինիների հետ, և ձեռք է բերում ներդաշնակ համ։ Ստացվում է խմիչք, որը հիանալի համադրվում է ձկան և մսի, պանրի և քաղցր աղանդերների հետ:

Սկզբում Ֆրանսիայի հյուսիսից այդ խաղողը տեղափոխվել է հարավ, որտեղ այն օգտագործվել է կուպաժավորման համար, որպեսզի հարստացնի տեղական գինիների համը, այնուհետև այն հասել է Նոր աշխարհի խաղողի այգիներ՝ նվաճելով Կալիֆորնիան և չիլիական Ռապելի և Լիմարի հովիտները: Այնուհետև այն սկսել են աճեցնել Հարավային Ավստրալիայում, մի փոքր ավելի ուշ Վիոնե խաղողը «բնակություն է հաստատել» Կասաբլանկայում և Արգենտինայում: Այս որթատունկը աճեցվում է նաև աֆրիկյան մայրցամաքում՝ Հարավային Աֆրիկայում: ԱՄՆ-ում այժմ Վիոնեն իրեն հիանալի է զգում ոչ միայն Կալ իֆորնիայում, այլ նաև երկրի հյուսիսարևել յան հատվածում:

Եվրոպացիները նույնպես չեն հրաժարվել դրանից, և Վիոնե գինիներ, բացի Ֆրանսիայից, ներկայում արտադրվում են նաև Իսպանիայում, Իտալ իայում և Հունաստանում։ Վիոնեն անգամ Ռուսաստան է հասել։ Այժմ այն աճեցվում է Կրասնոդարի երկրամասում՝ Հայկական կիրճում։ Այնտեղ տեղի գինեգործները ֆրանսիացիների աջակցությամբ աշխատում են տեղական գինու որակի բարելավման ուղղությամբ, և, ֆրանսիացի մասնագետների կարծիքով, այս խնդրի լուծման ուղիներից մեկը Վիոնե խաղողի օգտագործումն է։

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում