Մի ընտանիքի բրենդից՝ երկու հանրահայտ ընկերություն․ «Փաստ»

«Փաստ» օրաթերթը գրում է

Adidas հայտնի բրենդը ներկայումս մեծ մասսայականություն է վայելում մարզիկների շրջանում: Բրենդի պատմությունն սկսվել է դեռևս 1920 թվականին: Ադոլֆ Դասլերը ծնվել է 1900 թվականին բավարական Հերցոգենա փոքրիկ քաղաքում: Նրա եղբայրը` Ռուդոլֆ Դասլերը, ընտանիքում ավագն էր: Ադին հնարամիտ էր, ինտելեկտուալ և սիրում էր ֆուտբոլ խաղալ, իսկ Ռուդին բռնկուն էր, սիրում էր ջազ և բռնցքամարտ: Գերմանիան սկսել էր առաջին համաշխարհային պատերազմը, բայց եղբայրները, տարիքի պատճառով, ճակատ չեն գնացել (նրանք այդ մասին չէին էլ երազում): Պատերազմից հետո, երբ Գերմանիան աղքատության ու փլատակների մեջ էր, Դասլեր ընտանիքը կարողացել է գոյատևել: 1920 թվականի սկիզբ…

Դասլեր ընտանիքը որոշում է կոշիկի արտադրության բիզնես սկսել: Նրանց առաջին արտադրանքը նախատեսված էր հեռացատկորդների պարապմունքների համար: Նորաբաց ընկերությունը կոչվում էր հենց Դասլեր: Հիմնադրած ընկերության ղեկավարումը ստանձնել են Ադին և նրա հայրը՝ Քրիստոֆ Դասլերը: 1924 թվականին նրանց է միացել նաև Ռուդին: Երկու եղբայրները հրաշալի փոխլրացրել են միմյանց: Ադին իսկական գյուտարար էր իր ոլորտում, մինչդեռ Ռուդին հանճար էր կապերի, մարկետինգի և վաճառքի ոլորտում: 1925 թվականին նրանց բիզնեսը սկսել է կտրուկ աճել: Ադին` որպես ֆուտբոլասեր, ստեղծել է առաջին ֆուտբոլային մարզակոշիկը: Տակի մասում դրանք երկաթյա մատիկներ ունեին, և այդպես ծնվել են ֆուտբոլային այժմյան մարզակոշիկները:

1927-ին Դասլեր ընկերությունը գնել է հսկայական լքված մի ֆաբրիկա և կոշիկի արտադրությունը օրական հասցրել 100 զույգի, իսկ աշխատողների քանակը՝ 25-ի: Լոս Անջելեսում 1932 թվականի Օլիմպիական խաղերին գերմանացի Արթուր Յոնատը 100 մետր մրցավազքում գրավել է 3-րդ տեղը: Այդ ժամանակ նա կրում էր Դասլեր մարզակոշիկները: Չնայած հաջողություններին, եղբայրների միջև տարաձայնություններ են սկսվել: Երկրորդ համաշխարհային պատերազմի տարիներին երկուսն էլ նացիստական կուսակցության անդամ են դարձել, և պատերազմի ավարտից հետո նրանց միջև կապը վերջնականորեն խզվել է: Գերմանիայի պարտությունից հետո եղբայրները գրեթե զրոյից են սկսել իրենց բիզնեսը: Իսկ 1948 թվականի գարնանը` հոր մահից հետո, նրանք վերջնականորեն որոշել են կիսել բիզնեսը, առանձնացել են ու պայմանավորվել, որ երկու բիզնեսներից ոչ մեկն էլ ընտանիքի անվամբ չեն կոչելու:

Ադոլֆն իր բիզնեսն անվանել է Ադիդաս (Ադի + Դասլեր), իսկ Ռուդին՝ Պումա: Այսօր «Ադիդաս»-ն աշխարհին ներկայանում է արտադրանքի լայն տեսականիով` տարբեր մարզակոշիկներ, սպորտային հագուստ, կոշիկներ զբոսաշրջիկների համար: Ադի Դասլերը մինչև իր կյանքի վերջն անձամբ է ղեկավարել «Ադիդասը»: Կյանքի վերջում նա ասել է, որ «Ադիդասն» իր համար ոչ թե նպատակ է եղել, այլ` միջոց: Նա մահացել է 1978 թվականին և 5 երեխաներին թողել ծաղկող ընկերություն: Այժմ աշխարհահռչակ այս երկու բրենդներն իրար հետ կատաղի մրցակցության մեջ են, իսկ ամեն ինչ սկսվել էր մի ընտանիքից:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում