Վեց հարյուր տարվա պատմություն և միայն քառասուն տարվա միջազգային ճանաչում. «Փաստ»

«Փաստ» օրաթերթը գրում է

Ֆրանցիսկյանը ներկայում ցորենի գերմանական էլիտար գարեջրի ամենահայտնի ապրանքանիշերից մեկն է: Դա արտադրվում է Եվրոպայի ամենահին գարեջրի գործարաններից մեկում: Այդ գարեջրի մասին առաջին գրառումները վերաբերում են 1363 թվականին։ Տարեգրություններն արձանագրում են, որ Զեյդել Ուոթերստրեգեր անունազգանունով մեկը գարեջուր է պատրաստել Residenzstrasse-ում (այն ժամանակվա Մյունխենի գլխավոր փողոցներից մեկը)։ Այդ գարեջրի գործարանի մոտ գտնվում էր ֆրանցիսկյան վանականների վանքը, որի պատճառով և՛ գարեջուրը, և՛ գարեջրի գործարանը հետագայում սկսեցին կոչել Ֆրանցիսկյան։ Շատերը նույնիսկ վստահ էին, որ «Franziskaner» գարեջրի բաղադրատոմսը հորինել են վանականները, բայց իրականում այդպես չէ։

Ուղղակի ժամանակ առ ժամանակ վանքի տարածքում գարեջրի տակառներ էին պահվում, սակայն բաղադրատոմսի ստեղծումն ու խմիչքի պատրաստումն իրականացնում էին միայն գարեջրի գործարանի վարպետները։ Բայց դա չի հերքում այն փաստը, որ վանականները ևս այդ փրփրուն ըմպելիքը խմելու սիրահարներ են եղել։ Մոտ հինգ հարյուր տարի Franziskaner-ը եղել է կիսաարտադրական տեղական գարեջրի գործարան, որը հայտնի է եղել միայն շրջակա տարածքներում: Իրավիճակը սկսել է փոխվել միայն 19-րդ դարի կեսերից, երբ խոշոր բիզնեսն է ներգրավվել այդ գարեջրի արտադրության մեջ: 1841 թվականին գարեջրի գործարանի սեփականատեր է դարձել իր ժամանակի խոշորագույն գարեջրագործական ընկերություններից մեկը՝ Spaten-ը։ Նոր ղեկավարությունը սկսել է լայնածավալ արդիականացում՝ կառուցելով նոր արտադրամասեր։ 1872 թվականին UrMarzen-ը ճանաչվել է Oktoberfest ցուցահանդեսի լավագույն գարեջուրներից մեկը։

Ֆրանցիսկյան գարեջուրը սկսել է մեծ ժողովրդականություն վայելել Գերմանիայում և, առաջին հերթին, իր հայրենի Բավարիայում: Արտադրությունն աճել է մինչև Առաջին համաշխարհային պատերազմի սկիզբը։ Պատերազմի ավարտից հետո շատ ընկերություններ են ընկել ծանր վիճակի մեջ, գոյատևել են միայն խոշոր խաղացողները։ Ֆրանցիսկյանը և Սփաթենը ստիպված միավորվել են մեկ բաժնետիրական ընկերության մեջ: Այդ կարգավիճակով էլ ընկերությունը ներկայում գոյություն ունի։ Չնայած այն հանգամանքին, որ այսօր Ֆրանցիսկյան գարեջուրը հայտնի է բացառապես ցորենի գարեջրի տեսակներով, սկզբից այդպես չի եղել, ընկերությունն ընտրել է այդ մասնագիտացումը միայն 20-րդ դարի կեսերին։ Առաջին սպիտակ գարեջուրը թողարկվել է 1964 թվականին: Ի դեպ, սկզբում այն շփոթում էին ինչ-որ արտասովոր տեսակի շամպայնի հետ։

Այնուամենայնիվ, բավարացիները շատ բան գիտեն գարեջրի մասին և, համտեսելով նոր տեսականին, շատ արագ պարզել են ամեն ինչ, որն էլ ազդել է ընկերության վաճառքի ծավալների վրա, որը բազմակի ավելացել է, և ղեկավարությունը առանց երկմտելու որոշել է փոխել գարեջրի գործարանի մասնագիտացումն ու անվանումը։ Այժմ ընկերությունը կոչվում է Franziskaner Hefe-Weissbier։ Այսօր դժվար է հավատալ, բայց ավելի քան վեց հարյուր տարվա պատմություն ունեցող ընկերությունը միջազգային շուկա է մտել միայն քսաներորդ դարի 80-ականների կեսերին։ Սակայն դա չի խանգարել նրան իր արժանի տեղը գրավել ցորենի գարեջրի միջազգային էլիտար շուկայի հատվածում։

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում