Դարպասում երկու հանրապետականներն իսկական կռիվ են տվել

Երեկ Լոռու մարզի Դարպաս գյուղում անցկացվել է համայնքի ղեկավարի արտահերթ ընտրություն: Երեկոյան ժամը 8-ից տեղամասում սկսվել է հաշվարկը, եւ նախնական արդյունքներով` Դարպասի գյուղապետ է ընտրվել հանրապետական Արմեն Ալոյանը:

Հայտնի ռաբիս երգչի անուն-ազգանունով թեկնածուն, սակայն, շատ փոքր առավելություն է ստացել իր մրցակիցներից մեկի` նույնպես հանրապետական, համայնքի աշխատակազմի քարտուղար Անուշավան Ավետյանի նկատմամբ:

Ալոյանը ստացել է 294, Ավետյանը` 277 քվե: Այսինքն հաղթող թեկնածուն մրցակցից առաջ է անցել ընդամենը 17 քվեով, որը չի բացառվում վիճարկման առարկա դառնա: Թեկնածուներից յուրաքանչյուրն այսօր մինչեւ ժամը 18:00-ն Ընտրատարածքային ընտրական հանձնաժողով կարող է ներկայացնել վերահաշվարկի դիմում: Իսկ վերահաշվարկը շատ դեպքերում իսկապես բերում է ձայների հարաբերակցության փոփոխության: Այս դեպքում նույնպես դա հնարավոր է, քանի որ ընտրությունների արդյունքում 27 քվեաթերթիկ համարվել է անվավեր: Հենց այս 27 քվեաթերթիկի վերահաշվարկը նույնպես կարող է շրջել իրավիճակը:

Վերահաշվարկի դիմում թիվ 29 ԸԸՀ-ն կստանա, թե ոչ` կտեղեկացնենք արդեն վերջնաժամկետի լրանալուց հետո:

Նշենք, որ Դարպասում գրանցված է եղել ոչ թե երկու, այլ` չորս թեկնածու: Պարզապես մյուս երկու թեկնածուներն իրենց ստացած քվեներով բավականին զիջում են Ալոյանին ու Ավետյանին: Ընտրողներից 154-ն իր քվեն տվել է անկուսակցական Կարեն Դոդոռյանին, 134-ը` հանրապետական Աղասի Թովմասյանին, որը համայնքի միջնակարգ դպրոցի փոխտնօրենն է:

Ուշագրավ մի քանի փաստ եւս: Անուշավան Ավետյանը, որը քվեարկության արդյունքներով այս պահի դրությամբ երկրորդ թեկնածուն է, բավականին երիտասարդ է` 27 տարեկան: Նրա հիմնական մրցակիցը` Արմեն Ալոյանը, 46 տարեկան է:

Վերջում նշենք, որ Դարպասում գրանցվել է ընտրողների 56 տոկոս մասնակցություն: 1493 ընտրողներից քվեարկությանը մասնակցել է 887-ը: Դեկտեմբերի 6-ին կայացած Սահմանադրական հանարքվեի արդյունքները Դարպասում շատ օրիգինալ էին ստացվել: Այստեղ «Այո»-ն եւ «Ոչ»-ը բաշխվել էին հավասարապես. յուրաքանչյուրը ստացել էր 304 քվե:

Գագիկ Աղբալյան