Պահպանել հին ավանդույթներն ու գաղտնիքները՝ չձգտելով զանգվածային սպառման արտադրանք ստանալ. «Փաստ»

«Փաստ» օրաթերթը գրում է

Ի՞նչն է միավորում թորման այնպիսի հայտնի գործարաններին, ինչպիսիք են Glenfiddich-ը, Tullamore Dew-ը, Grants-ը և այլն: Վիսկիի գիտակները, անշուշտ, գիտեն ճիշտ պատասխանը. նրանց «միավորողն» այն է, որ այդ ապրանքանիշերն ստեղծվել կամ գնվել են վիսկիի պատմության ամենաազդեցիկ դեմքերից մեկի՝ Ուիլ յամ Գրանտի կողմից: Բալվենին ևս թորման այն գործարաններից է, որի ստեղծման գործում մեծ ներդրում է ունեցել պարոն Գրանտը: Ի սկզբանե ենթադրվում էր, որ նոր վիսկին կկոչվի Գլեն Գորդոն, սակայն շուտով անունը փոխվել է։ Վիսկին սկսել է կրել այն ամրոցի անվանումը, որը գտնվում է ձեռնարկության մոտ։

Balvenie ամրոցը գտնվում է Սպեյսայդում՝ տարածաշրջանում, որը հայտնի է իր յուրահատուկ վիսկիով: Սպեյ գետի երկայնքով կան բազմաթիվ հայտնի և հին թորման գործարաններ, և 1892 թվականին այդտեղ էլ Գրանտը որոշել է հիմնել իր նոր ձեռնարկությունը: Այն ժամանակ, երբ Գրանտը որոշել էր Բալվենի ամրոցի մոտ թորման արտադրություն հիմնել, այն արդեն ամբողջովին անմխիթար վիճակում էր։ Հենց այդ պատճառով էլ նրա կողքին կառուցել է Balvenie New House նոր ամրոցը: Բացի հնագույն ամրոցից, Ուիլ յամ Գրանտը իրավունք է ստացել օգտագործել այն ամբողջ ջուրը, որը չի գնում գյուղատնտեսության կարիքների համար:

Վիսկիի առաջին լիտրերն արտադրվել և վաճառքի են հանվել դեռ 1893 թվականին, սակայն ընկերությունը ինքնածախսածածկվել է միայն 15 տարի անց։ Պատճառը բավականին պարզ է. ինչպես հիմա, այնպես էլ այն ժամանակ Բալվենի և շոտլանդական շատ այլ վիսկի արտադրողներ հավատարիմ են մնացել ժամանակակից տեխնոլոգիաների և հին ավանդույթների համադրման սկզբունքին: Օրինակ է գործարանի վերակառուցումը 1920-ականներին։ Նոր սարքավորումներ ստեղծող արհեստավորները հերթով պատճենել են հին թորման սարքերը։ Ավելին, նոր շենքի կառուցման ժամանակ օգտագործվել են հին քարե բլոկները։ Հիմա էլ այնտեղ օգտագործվում են թորման պղնձե կաթսաները, որոնք ավելի քան 50 տարեկան են: Այդ բծախնդիր վերաբերմունքին գումարենք տեխնոլոգիական գործընթացին և բարձրակարգ տեղական հումքին ներկայացվող պահանջները և կստանանք զարմանալի վիսկի:

Նշենք, որ գարու մի մասը արտադրվում է հարևան Բալվենի Միլս ֆերմայում, իսկ ջուրը վերցվում է Կոնվալ Հիլզի աղբյուրներից։ Բալվենի վիսկիի մեկ այլ հատկանշական առանձնահատկությունն էլ այն է, որ թորման գործարանը դեռևս պատկանում է W. Grant & Sons ընկերությանը, որը, ինչպես կարելի է կռահել անունից, նույնպես ստեղծվել է Ուիլ յամ Գրանտի կողմից: Այսօր այդ ընկերությունն աշխարհում երրորդն է շոտլանդական վիսկիի արտադրությամբ։ Իհարկե, այն ի վիճակի չէ մրցել այնպիսի «հրեշների» հետ, ինչպիսիք են Դիաջեոն և Պեռնո Ռիկարը, բայց դրա կարիքը չկա էլ։ W. Grant & Sons ընկերությունը այլ նպատակ ունի՝ պահպանել հին ավանդույթներն ու գաղտնիքները՝ չձգտելով զանգվածային սպառման արտադրանք ստանալ:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում