Փոքրիկ լուսավոր կետ գյումրեցիների և քաղաքի հյուրերի համար. «Փաստ»

«Փաստ» օրաթերթը գրում է

Դեռ օրեր առաջ «Փաստը» գրել էր, որ դեկտեմբերի 24-ից 30-ը Գյումրիի Վարդանանց հրապարակում կկազմակերպվի Ամանորյա տոնավաճառ: Նախաձեռնությունը «Դրիմ թիմ» ընկերությանն է: Ինչպես կազմակերպիչներն էին նշել, «աշխԸրքի կենտրոնում» 7 օր շարունակ «կտիրի ամանորյա հեքիաթային տրամադրություն»։ «Փաստի» հետ զրույցում «Դրիմ թիմ» ՍՊԸ-ի ներկայացուցիչն ասում է՝ մինչ այս տարբեր միջոցառումների կազմակերպման փորձ ունեցել են:

«Տեսնելով, որ Երևանում առնվազն Ամանորյա չորս տոնավաճառ կա, հարց առաջացավ՝ ինչո՞ւ մեծությամբ երկրորդ քաղաքում՝ Գյումրիում չլինի տոնավաճառ, հատկապես հաշվի առնելով նրա ունեցած հսկայական պոտենցիալը: Դիմեցինք Գյումրու համայնքապետարանին, ներկայացրեցինք մեր առաջարկները, ավագանին հավանություն տվեց դրանց: Գյումրու համայնքապետարանը որոշակի գույքային աջակցություն է ցուցաբերել: Գույքի մի մասը, որն օգտագործվել էր նախորդ տարիներին, տրամադրվեց մեզ, այն վերանորոգված և ավելի լավ տեսքի բերված վերադարձնելու ենք իրենց: Դեկտեմբերի 24-ին տեղի ունեցավ տոնավաճառի բացումը և Գյումրիի գլխավոր տոնածառի լույսերի վառման արարողությունը, դա համաձայնեցրել էինք համայնքապետարանի հետ: Սա, իհարկե, կրկնապատկեց մարդկանց հոսքը Վարդանանց հրապարակ: Մեր հաշվարկներով, 7-10 հազար մարդ էր ներկա հրապարակում»,-նշում է մեր զրուցակիցը:

Տեղեկացնում է՝ բացմանը նախատեսված էր բավականին մեծ համերգ հայտնի արտիստների մասնակցությամբ, սակայն Արցախում, մասնավորաբար Լաչինի միջանցքում ստեղծված իրավիճակով պայմանավորված, որոշել են համերգը չեղարկել: «Փոխարենը հրավիրեցինք Գյումրիում ձևավորված «Դեղձանիկ» մանկական երգչախմբին՝ երեխաներին տոնական տրամադրություն փոխանցելու համար: Հուսով ենք՝ խնդիրները շուտով կկարգավորվեն, և գյումրեցիների համար ավելի մեծ համերգ կկազմակերպենք, ինչպես ասում են՝ իրենց պարտք ենք մնում»,-ասում է նա:

Տպավորությունների մասին: «Անկեղծ ասած՝ մեր թիմը նման մարդաշատ միջոցառում չէր սպասում, բացմանն ակնկալում էինք մինչև 3-4 հազար մարդու ներկայություն, սակայն այն, ինչ ունեցանք արդյունքում, գերազանցեց մեր սպասելիքները: Բոլորիս համար այս ծանր ժամանակներում մարդկանց մի փոքրիկ ժպիտ պարգևեցինք: Նաև քննադատություններ ենք լսել՝ ինչո՞ւ այս պայմաններում նման միջոցառում իրականացնել: Կատեգորիկ համաձայն չեմ այդ տեսակետի հետ, քանի որ մարդիկ, հատկապես երեխաներն իրավունք ունեն ուրախանալու, անընդհատ սգալով՝ մեր խնդիրներին լուծում չենք տալու: Որոշեցինք ամեն դեպքում միջոցառումը չչեղարկել, գյումրեցիներն այն շատ լավ ընդունեցին, փոքրիկ լուսավոր կետ դարձավ քաղաքի բնակիչների և հյուրերի համար՝ էլ ավելի հետաքրքիր դարձնելով նրանց ժամանցը: Եռուզեռը տոնավաճառում չէր դադարում բացմանը հաջորդող օրերին ևս: Մինչ ուշ երեկո մարդիկ շրջում էին, գնումներ կատարում: Կային զբոսաշրջիկներ, Ռուսաստանից ժամանած վիդեոբլոգերներ, որոնք տեսանյութեր էին պատրաստում միջոցառման մասին»,-ընդգծում է ՍՊԸ-ի ներկայացուցիչը:

«Դրիմ թիմից» վստահեցնում են՝ լայնամասշտաբ միջոցառումներ անցկացվելու են մեր երկրի տարբեր անկյուններում: «Ի սկզբանե ցանկանում էինք այս միջոցառումը մի քանի քաղաքում իրականացնել. Գյումրիում՝ որպես մեծությամբ երկրորդ քաղաք, Ջերմուկում՝ հաշվի առնելով վերջին իրադարձությունները քաղաքում կյանքն աշխուժացնելու, մարդկանց ուրախացնելու համար, ինչպես նաև Սյունիքում՝ Գորիսում և Կապանում: Ուղղակի մարդկային ռեսուրսների և ֆինանսական միջոցների սղությունը թույլ չտվեցին միանգամից չորս քաղաքում միջոցառումներ կազմակերպել, բայց բոլոր քաղաքներում մեծամասշտաբ միջոցառումներ լինելու են: Մեր գործունեությունը երկու հստակ ուղղություն ունի՝ շարունակելու ենք Երևանում կազմակերպվող միջոցառումները, և մեր գործունեության երկրորդ ուղղությունը մարզերն են: Մեր քաղաքներն ունեն հսկայական պոտենցիալ, որն անտեսվում է: Դրա օգտագործման դեպքում կյանքը մարզերում կակտիվանա: Եթե մեր այսօրվա հաջողված փորձը վարակիչ դառնա այլ բիզնեսների և միջոցառումների կազմակերպման համար, պատկերացրեք, թե ինչ զարկ կստանա տնտեսությունը Գյումրիում և Հայաստանի տարբեր քաղաքներում»,-եզրափակում է մեր զրուցակիցը:

Գյումրիի ամանորյա տոնավաճառի ժամանակ տաղավարները տրամադրվել են անվճար, առավելությունը տրվել է Գյումրիի ձեռներեցներին, մասնավորաբար արվեստի ու արհեստի գործեր ստեղծողներին: «Դրիմ թիմը» աջակցության համար շնորհակալություն է հայտնում գործընկերներին՝ «Հայաստանի էլեկտրական ցանցեր» ընկերությանը, «Telcell» վճարահաշվարկային ընկերությանը և Կոկա-Կոլայի հայաստանյան ներկայացուցչությանը:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում