Ավելի գերադասելի կլիներ, երբ ոստիկանները թմրանյութի ազդեցության տակ գտնվող քաղաքացուն սպանա՞ծ լինեին

Երեկ գիշերվանից համացանցում հայտնվեց Հանրապետության հրապարակում «Համեռ» մակնիշի ավտոմեքենայի ոչ երթևեկելի մասով վարելու և ոստիկանության ծառայողների օրինական պահանջին չենթարկվելու կադրերը:

Հանրապետության հրապարակում Պարեկային ծառայության ծառայողներին է մոտեցել «Համեռ» մակնիշի ավտոմեքենա, որի վարորդը մեքենան լիցքավորելու համար գումար է պահանջել պարեկներից։ Մերժում ստանալուց հետո, նա մեքենան վարել է Աբովյան փողոցով՝ երթևեկությանը հանդիպակաց, չի ենթարկվել ոստիկանության ծառայողների օրինական պահանջներին և մեքենան շարունակել է վարել Հանրապետության հրապարակին հարակից փողոցներով, այդ թվում նաև` հետիոտնի համար նախատեսված վայրով՝ դիտավորյալ վնասելով փողոցներում կայանված թվով 8 քաղաքացիական և հետագայում  3 ոստիկանական մեքենա։

Այդ գործողությունները կանխելու համար պարեկային ծառայողներն իրենց ամրակցված ատրճանակներով մոտ տարածությունից` մի քանի անգամ կրակել են վերոհիշյալ ավտոմեքենայի անվադողերի ուղղությամբ՝ փորձելով կանգնեցնել այն, սակայն վարորդը շարունակել է երթևեկությունը, խույս տալով պարեկներից` մեքենան թողել է Երևան քաղաքի Ագաթանգեղոս 7-րդ շենքի կամարանցման տակ և դիմել փախուստի:

 Նման դեպքը Երևան քաղաքում վերջին մի քանի տարիների համար աննախադեպ էր: Մի քանի րոպե անց, ֆեյսբուքյան հանրությունը դարձավ ոստիկանական փորձագետ և գնահատեց պարեկային ծառայողների ոչ պատշաճ աշխատանքը:

Ոստիկանությունն, իհարկե, կարող էր խնդիրը լուծել միանգամից, ինչպես կվարվեին օրինակ՝ ԱՄՆ-ում, կրակելով թմրանյութի ազդեցության տակ գտնվող քաղաքացու վրա և վերջ, ըստ երևույթին, հարցը կլուծվեր շատ արագ, ստիպված չէին լինի վարորդին կանգնեցնելու համար վտանգել սեփական կյանքը, երկար ճանապարհ վազել նրա ետևից: Այնքան մոտ տարածության վրա, որ պարեկներն էին, դժվար չէր խոցել հենց թիրախը, բայց ոստիկանության ծառայողները կարողացան մինիմալ կորուստերով կանգնեցնել, հայտնաբերել մեքենան և վարորդին:

Ի՞նչ է, ավելի գերադասելի կլիներ, երբ ոստիկանները թմրանյութի ազդեցության տակ գտնվող քաղաքացուն սպանած լինեին: Այդ դեպքում ֆեյսբուքյան փորձագետներն ինչ էին ասելու՝ որ մի խումբ ոստիկաններ փոխանակ ձերբակալեին քաղաքացուն,  հարձակվեցին և սպանեցին նրան: 

Այն, որ դեպքի առթիվ արդեն իսկ նախաձեռնված է վարույթ, վարորդը տվել է ինքնախոստովանական ցուցմունք, կատարվել է դեպքի վայրի զննություն, հարցաքաննվել են մի շարք վկաներ, իսկ տղամարդը ձերբակալված է՝ արդեն իսկ խոսում է գործողությունների շղթան պատշաճ կատարած լինելու մասին: Քննությամբ պարզվել է, որ վարորդը եղել է թմրանյութի ազդեցության տակ: Վերջինիս անձնական խուզարկությամբ հայտնաբերվել է ընդհանուր 1,9 գրամ քաշով թղթի մեջ փաթեթավորած բյուրեղանման «Մեթամֆետամին» տեսակի թմրանյութին նմանվող զանգված: Նախաքննությունը շարունակվում է: 

«Փաստ» լրատվականի հետ զրույցում Ոստիկանության Հասարակայնության հետ կապերի բաժնի պետ Աշոտ Ահարոնյանն ասաց, որ երեկ «Համեռ» մակնիշի ավտոմեքենայի վարորդի գործողություններից տուժած պարեկային ծառայողը լուրջ վնասվածքներ չունի: 

Աննա Ավետիսյան