Անվտանգային սպառնալիքներին դիմագրավելու փոխարեն կենցաղային հարցերով, շոուներով են զբաղված. «Փաստ»

«Փաստ» օրաթերթը գրում է

Հայաստանը անընդհատ ու շարունակաբար նոր անվտանգային մարտահրավերների է բախվում։ Նույնիսկ իշխանությունները չեն բացառում առաջիկայում Ադրբեջանի կողմից հարձակման հավանականությունը։ Եվ այս պահին թերևս առաջնային նշանակություն ունի հասարակությանը նոր ագրեսիային դիմագրավելուն նախապատրաստելը՝ մանավանդ այն պայմաններում, երբ ցանկացած պահի սպասելի է, որ հակառակորդը կարող է նոր առաջխաղացում ունենալ։ Այս շրջանակներում առավել քան կարևոր է հայկական զինված ուժերի ամրապնդումը։ Բայց դրա փոխարեն իշխանությունները, դիտմամբ թե պատահմամբ, պայմաններ են ստեղծում, որ Ադրբեջանն ավելի ագրեսիվանա ու տրամադրվի հետագա սադրանքներին։

Օրինակ՝ ՀՀ գործող իշխանության ներկայացուցիչների կողմից հայտարարություններ են հնչում, թե Ադրբեջանի հետ սահմանը պետք է ընդամենը սահմանապահները պահեն, հատուկ զինված ուժերի առկայությունն աննպատակահարմար է։ Իսկ այս պայմաններում Ադրբեջանը ամբողջ թափով ձեռնամուխ է լինում նոր զինվորական հատուկ միավորների ստեղծմանը՝ «Կոմանդո» զորամասերի շրջանակներում, ու այդ միավորումները տեղակայում Արցախից բռնազավթված տարածքներում, որպեսզի սադրանքներ իրականացնելու պարագայում թվային ու ռազմական մեծ առավելություն ունենա։ Համապատասխան թողտվության պարագայում է, որ Ադրբեջանը հնարավորություն է ստանում առավել հարմարավետ դիրքեր զբաղեցնել Հայաստանի սահմանների երկայնքով ու նոր տարածքներ օկուպացնել։

Ու զարմանալի է, որ իշխանությունները դրանից հետո էլ փորձում են հանրությանը համոզել, թե բանակցությունների արդյունքում Հայաստանի դիրքերը բարելավվել են, ինչը քիչ հավանական է։ Դրանով ուղղակի ցանկանում են ցրել մարդկանց անհանգստությունը, որպեսզի այն բողոքի դրսևորումների չվերածվի։ Այլապես դժվար է պատկերացնել, որ ադրբեջանական զորամիավորումները հետ են գնացել իրենց զբաղեցրած բարենպաստ դիրքերից, դրա մասին ուղղակի խոսք չկա։ Ընդհակառակը, իրադարձությունները ցույց են տալիս, որ հակառակորդն ավելի կխորանար Սյունիքում, եթե Իրանի կոշտ դիրքորոշումը և զգուշացումները չլինեին։ Պատահական չէ, որ Թեհրանը կոնկրետ ուղերձներ է հղում, որ չի հանդուրժի տարածաշրջանում սահմանների փոփոխությունը կամ, այսպես կոչված, «Զանգեզուրի միջանցքի» բացումը, իսկ հարկ եղած դեպքում կմիջամտի։ Դրա համար էլ Թեհրան-Բաքու հարաբերությունները հասել են լարվածության բարձրակետի։ Նույնիսկ այս պարագայում հակառակորդի գործողությունները ցույց են տալիս, որ մոտալուտ է նաև ադրբեջանական հաջորդ սադրանքը։

Բայց հանրության իմունիտետը բարձրացնելու և Իրանի հետ համագործակցությունը խորացնելու ուղղությամբ քայլեր ձեռնարկելու փոխարեն իշխանությունները հասարակության ուշադրությունը շեղում են ճղճիմ միջադեպերով։ Իշխող ուժի ներկայացուցիչները քաշքշուկներ, ծեծկռտուքներ են կազմակերպում, թշնամանք, վիրավորանքներ ու ատելություն գեներացնում, այդպիսով ձևավորում հանրային քննարկումների ու ցածրակարգ օրակարգի դաշտ։ Հիշեք, թե վերջին շրջանում ինչքան շատ այդպիսի միջադեպեր են տեղի ունենում։ Այս ամենին զուգահեռ, իշխանության ներկայացուցիչների կողմից խնդրահարույց ու մերկապարանոց հայտարարություններ են հնչում, որոնց արդյունքում էլ նրանք դառնում են ծիծաղի առարկա, իսկ մյուս կողմից էլ՝ իշխանությունները փորձում են ներկայացնել, թե կարևոր նախաձեռնություններ ու ծրագրեր են իրականացվելու, մետրոյի նոր կայարան, ակադեմիական քաղաք են կառուցելու և այդպես շարունակ։

Կարևոր հարցերը թողած՝ իշխանությունները նախապատրաստվում են Երևանի քաղաքապետի ընտրություններին, իսկ քաղաքացիները քննարկում են Երևանում եղած ծառերը կտրելու և սակուրաներ տնկելու հարցը։ Ուշադրություն շեղելու հարց են լուծում նաև շոուների վերածված քրեական գործերը, որով փորձում են ցույց տալ, թե իբր բյուջեի համալրման համար բռնագանձումներ են կատարում։ Ու բազմաթիվ մարդիկ էլ հավատ են ընծայում այս ամենին։ Դրա արդյունքում տպավորություն է առաջնում, թե Հայաստանը գոյաբանական վտանգի առաջ կանգնած չէ, կարելի է առօրյա կենցաղային հարցերով զբաղվել։

ԱՐՏԱԿ ԳԱԼՍՏՅԱՆ

Մանրամասները՝ «Փաստ» օրաթերթի այսօրվա համարում