Սեյրան Օհանյանը 2015-ն համարում է զինված ուժերի որակական առաջընթացի տարի

ОБЩЕСТВО 8 Январь, 2016 23:57

ՀՀ պաշտպանության նախարարության վարչական համալիրում հունվարի 8-ին անցկացվել է ՊՆ կենտրոնական ապարատի ղեկավար կազմի խորհրդակցություն, որի ընթացքում ամփոփվել են 2015 թվականին կատարված աշխատանքները և նախանշվել 2016թ. անելիքները:

Խորհրդակցության ընթացքում` նախքան 2016թ. անելիքների քննարկումը, ՀՀ պաշտպանության նախարար Սեյրան Օհանյանն ընդգծել է, որ անցած տարին զինված ուժերի համար եղել է որակական առաջընթացի տարի:

Ինչպես «Արմենպրես»-ին տեղեկացրին ՀՀ պաշտպանության նախարարության տեղեկատվության եւ հասարակայնության հետ կապերի վարչությունից,

անդրադառնալով աշխատանքային գլխավոր ուղղություններին՝ պաշտպանական գերատեսչության ղեկավարը կարևորել է համակարգում արդարության սկզբունքների, բարեվարքության ամրապնդմանը և կոռուպցիայի դեմ պայքարին ուղղված աշխատանքները, ներկայացրել 2015 թվականին արձանագրված հաջողություններն ու ձեռքբերումները, դրանց թվում նշելով, մասնավորապես, զինծառայողների և նրանց հավասարեցված անձանց սոցիալական պաշտպանության և կադրային քաղաքականության ոլորտներում իրականացված բարեփոխումները: Առաջընթաց է գրանցվել նաև անվտանգության մակարդակի բարձրացման ա ռումով: Սոցիալական խնդիրների լուծման, նյութատեխնիկական ապահովման, գնումների գործընթացի թափանցիկությունը բարձր հիմքերի վրա դնելու ուղղությամբ տարված աշխատաքները ևս դրական արդյունք են տվել: Ձեռքբերումներ են արձանագրվել զինված ուժերի թիկունքային ապահովման, ռազմաուսումնական հաստատություններում զինվորական կադրերի պատրաստման, անձնակազմի բուժսպասարկման և այլ բնագավառներում:

Ավարտելով իր խոսքը, պաշտպանության նախարարը նշել է, որ առաջիկա ուսումնական տարում զինված ուժերը հավատարիմ են մնալու ամենօրյա զարգացման, շարունակական առաջընթացի սկզբունքին` տարվա ընթացքում ղեկավարվելով «Պատրաստված հրամանատար, արհեստավարժ բանակ, ապահով հայրենիք» կարգախոսով և 2016 թվականը հայտարարելով «Հրամանատարական պատրաստության տարի»:

Ամանորի և Սուրբ ծննդյան տոների կապակցությամբ խորհրդակցության մասնակիցներին շնորհավորել և իր բարեմաղթանքներն է փոխանցել նաև ՀՀ ԶՈՒ ԳՇ պետ, գեներալ-գնդապետ Յուրի Խաչատուրովը: ՀՀ զինված ուժերի գլխավոր շտաբի պետը հորդորել է մեկնարկող ուսումնական տարվա ընթացքում անել առավելագույնը ազգային բանակի մարտական պատրաստության աստիճանն էլ ավելի բարձրացնելու ուղղությամբ:

Խորհրդակցությունը եզրափակվել է պարգևատրման արարողությամբ: 2015թ. ուսումնական տարվա արդյունքներով աչքի ընկած, բարեխիղճ և օրինակելի ծառայության համար մի շարք սպաներ և քաղաքացիական հատուկ ծառայողներ պաշտպանության նախարարի կողմից արժանացել են շնորհակալության, պարգևատրվել պատվոգրերով և գերատեսչական մեդալներով: