Երիտասարդներն այսօր Բաղրամյանում նախագահի ուշացած «հարսանիքն» են անում. մանկավարժ

Բաղրամյան պողոտայում տեղի ունեցող բողոքի ցույցերի մասնակից, մանկավարժ Գյուլնարա Ալեքսանյանը Past.am-ի հետ զրույցում ասաց.

«Ինձ այս պահին անհանգստացնում է այն հարցը՝ ինչո՞ւ իր հոտի կողքին չէ Ամենայն Հայոց Կաթողիկոսը: Գուցե այս երիտասարդները սխալ ճանապարհով են գնում, որտե՞ղ է մեր Կաթողիկոսը: Այս շարժման մեջ սրի և ատրճանակի կարիք չկա, ինչպես ժամանակին Պարգև սրբազանն արեց, ինչպես Ներսես Մեծն արեց, իսկ Խրիմյան Հայրիկի հետ համեմատել անգամ չարժե: Բայց Գարեգին Բ-ն՝ որպես հոգևոր հայր, պարտավոր էր գտնվել մեր և այս երիտասարդների կողքին: Նա կարող էր այնպիսի սփոփիչ, հուսադրող խոսք ասել, որ չշարունակվեր այն ամենը և տնտեսական այսպիսի հսկա վնասներ չկրեր հանրապետությունը:

Սա հուսահատ քայլ է: Ժողովրդական ասացվածք կա. «Կուշտը սովածին մանր է բրդում»: Մեր նախագահը գիտի, որ ինքը ապահով է, կուշտ է, իսկ մնացածի հերն անիծած: Մեր նախարարները, շորտիկ հագնելով, սառույց լցնելով իրենց գլուխներին՝ կարծում են, որ շատ մեծ գործ են անում: Ես հասկանում եմ՝ այսօր ֆլեշմոբերի ժամանակաշրջան է և գաղափարը նշանակություն չունի: Բայց արդյոք կգա՞ գաղափարի հերթը, եթե այսպես շարունակվի:

Այս երիտասարդներն այսօր դրա համար են ոտքի կանգնել: Ես հիմա նախանձում եմ իրենց: 25 տարի առաջ ինքս եմ եղել 5 տարի հարթակի վրա կյանքը մաշողներից մեկը: Չեմ ափսոսում դրա համար, որովհետև մենք ձեռք ենք բերել Ղարաբաղ: Այսօր էլ այս երիտասարդներին ցանկանում եմ հայոց բոլոր մայրերի օրհնությունը, որովհետև Կաթողիկոսը չկա, որ օրհնի և Աստծո աչքը այս երիտասարդներից անպակաս լինի: Այսօրվա վիճակն ամոթալի է:

Ես եկա այն եզրակացության, որ մեր նախագահը հարսանիքով չի ամուսնացել, դրա համար այսօրվա երիտասարդները ուշացած իր «հարսանիքն» անում են»:

Լևոն Փանոսյան