Արցախում դիմադրության օջախները մարելու անօգուտ ջանքերը․ «Փաստ»

«Փաստ» օրաթերթը գրում է

Արդեն 5 ամիս է, ինչ Արցախը գտնվում է շրջափակման մեջ։ Ու, ըստ այդմ, Ադրբեջանը շարունակաբար սեղմում է Արցախի շուրջ ստեղծված օղակը։ Սկզբից ի հայտ եկան, այսպես կոչված, «բնապահպան ակտիվիստները», որոնք փակեցին Լաչինի միջանցքը։ Ապա Բաքուն պահանջեց, որ Ռուբեն Վարդանյանը հեռանա պետնախարարի պաշտոնից, իսկ Վարդանյանի հրաժարականից հետո Արցախի շուրջ ստեղծված վիճակը ոչ միայն չբարելավվեց, այլ վատթարացավ։ Ադրբեջանի և Արցախի ներկայացուցիչների միջև մի քանի հանդիպումներ կայացան, սակայն Բաքուն փորձեց այդ հանդիպումները ներկայացնել այն կոնտեքստում, թե քայլեր է ձեռնարկում Արցախի վերաինտեգրման ուղղությամբ։

Պատահական չէ, որ Արցախի ու Ադրբեջանի ներկայացուցիչների միջև կայացած հանդիպումներից հետո Ադրբեջանի իշխանությունները Արցախի ներկայացուցիչներին միանգամից սկսեցին հրավիրել Բաքու՝ վերաինտեգրման շուրջ «հերթական քննարկման»: Սակայն արցախյան կողմը կտրականապես հրաժարվեց Բաքվի օրակարգով հանդիպումից՝ շարունակելով պայքարել իր իրավունքների համար։ Այնուհետ Ադրբեջանն անցավ հաջորդ քայլին ու գրավեց Արցախի համար հաղորդակցության այլընտրանքային հաղորդակցային ուղի դարձած Ստեփանակերտ-Լիսագոր գրունտային ճանապարհի հատվածում գտնվող բարձունքն ու վերահսկողության տակ վերցրեց ճանապարհը։ Իսկ ապրիլի վերջին Ադրբեջանը, լիովին ոտնահարելով նոյեմբերի 9-ի եռակողմ հայտարարությունն, ապօրինի կերպով անցակետ տեղադրեց Լաչինի միջանցքում՝ Հակարիի կամրջի մոտ։

Ու դրանից հետո ադրբեջանական իշխանությունների կողմից ուղարկված ֆեյք «բնապահպան ակտիվիստներն» անմիջապես հեռացան։ Ադրբեջանի քայլերի արդյունքում Արցախն այսօր տոտալ շրջափակման մեջ է, ու Բաքուն հույս ունի, թե դրանով կարող է կոտրել արցախցիների ոգին, որի արդյունքում ինչ-որ մի պահից կարող է սկսվել Արցախի վերաինտեգրման գործընթացը։ Բայց արցախցին ոչ միայն շարունակում է դիմակայել փորձություններին, այլև առավել վճռական է տրամադրված իր պայքարի հարցում և որևէ կերպ չի պատկերացնում Արցախն Ադրբեջանի կազմում։ Ավելին, չնայած ՀՀ իշխանությունները ձգտում են օգտագործել Արցախի իշխանությունների վրա իրենց ունեցած լծակները և Արցախում մարել դիմադրության բոլոր օջախները, որպեսզի հասնեն իրենց պլանների իրականացմանը, այն է՝ վերջնականապես ազատվել Արցախյան հիմնահարցից, այդուամենայնիվ, Արցախում դեռևս հայրենասեր ուժեր կան, որոնք տրամադրված են պայքարը շարունակելուն։

Այդ ուժերը, որոնց մեջ բավական մեծ թիվ են կազմում երիտասարդները, դիմադրության նոր օջախներ ձևավորելու նախաձեռնություններով են հանդես գալիս։ Եվ խորհրդանշական էր, որ մայիսի 9-ին Ստեփանակերտում «Ո՛Չ Արցախի էթնիկ զտմանը» պահանջագրի և ստորագրահավաքի նախաձեռնող խմբի կողմից կազմակերպվեց հանրահավաք, որի ընթացքում ևս մեկ անգամ ընդգծվեց, որ Ադրբեջանը ցանկանում է պառակտել Արցախը, ուստի պետք է վճռական լինել պայքարի շարունակականության հարցում։ Պառակտումը հատկապես ներկայիս պայմաններում կարող է շատ ծանր հետևանքներ ունենալ Արցախի համար։ ՀՀ իշխանությունները պառակտում սերմանելու ու իրենց նպատակներին հասնելու համար կարող են բորբոքել նաև որոշ գործիչների անձնական ամբիցիաները։

Օրինակ՝ տեղեկություններ են շրջանառվում, որ Սամվել Բաբայանը ևս մտադիր է առաջիկայում հանրահավաք հրավիրել, սակայն դրա հիմնական օրակարգը լինելու է իրեն պետնախարար նշանակելու հարցը, քանի որ ներկայացվում է այնպես, թե միայն ինքը կարող է Արցախը դուրս բերել ներկայիս վիճակից։ Պարզ է, որ ՀՀ իշխանությունները և նրանց աջակցությամբ նաև Արցախի իշխանությունները նման քայլերի են դիմում, քանի որ որևէ ազդեցության լծակ չունեն նոր ձևավորվող դիմադրության օջախների վրա։

ԱՐՏԱԿ ԳԱԼՍՏՅԱՆ

Մանրամասները՝ «Փաստ» օրաթերթի այսօրվա համարում