Հնագետները Գերմանիայում հայտնաբերել են 1050-ամյա հանելուկային շինություն

КУЛЬТУРА 21 Май, 2023 20:36

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մոտ 1000 տարի առաջ Օտտոնների հզոր Սաքսոնական դինաստիան կառավարում էր ժամանակակից Գերմանիայի տարածքում, գրել է Miami Herald-ը։

Օտտոնները եւ հատկապես նրանք, որոնք իշխանությունում են գտնվել, այն տարածաշրջանից էին, որն այսօր Սաքսոնիա-Անհալթ երկրամասի մի հատվածն է։

Դինաստիան վերահսկում էր եկեղեցիների, վանքերի եւ ամրոցների շինարարությունը, դրանցից շատերը ծառայել են որպես կայանատեղիներ ճամփորդող կառավարիչների եւ քաղաքական առաջնորդների համար։

Այժմ հնագետները եւ Սաքսոնիա-Անհալթի Հնագիտության եւ հուշարձանների պահպանության պետական վարչության փորձագետներն աշխատում են ավելի շատ բան իմանալ դինաստիայի եւ նրա կառավարման մասին՝ մի շարք պեղումներ իրականացնելով։

Նման նախագծերից մեկը Ալտենբուրգ Գրոսվանգենում ցնցող արդյունքների է հանգեցրել, McClatchy News-ի հարցազրույցում ասել է պեղումները ղեկավարող Ֆելիքս Բիրմանը։

Պեղումների վայրում հնագետները հայտնաբերել են երկու շինություն՝ ուղղանկյուն գլխավոր ամրոցը եւ այն շրջապատող արտաքին ամրոցը։ Ամրոցները շրջապատված են փոսերով եւ ջրափոսերով, որոնք, փորձագետների կարծիքով, պատկանում են Սաքսոնյան դինաստիայի կառավարման ժամանակաշրջանին։

Ուսումնասիրելով իրենց գտածոները՝ փորձագետները զարմանքով հայտնաբերել են, որ գլխավոր ամրոցը պաշտպանված էր անսովոր կերպով, ասել է Բիրմանը։

Ի տարբերություն նման շինությունների՝ հնագետները հայտնաբերել են անհամեմատ ավելի բարդ ձեւով կառուցված պատ, որը մոտ 1050 տարեկան է։

«Ալտենբուրգը բավական արտասովոր է,- ասել է Բիրմանը։- Ներկայում շատ հիմքեր կան ենթադրելու, որ դա սաքսոն կայսեր անհաջող խոշոր նախագիծ էր, որը ծրագրել էր այստեղ ստեղծել նոր բազա»։

Չնայած այս կառույցները, ամենայն հավանականությամբ, ամենակարեւոր շինությունները չեն եղել կառավարիչների համար, դրանք կարող էին պաշտպանական նշանակություն ունենալ ավելի կարեւոր եւ ոչ հեռվում գտնվող ամրոցի համար։

Փորձագետների կարծիքով՝ դրանց շինարարությանը մասնակցել են ազդեցիկ առաջնորդները։

Բացի պատից, հնագետները պեղել են նաեւ մի շարք նմուշներ, որոնք պատկանում են ուշ միջնադարին։

Գտածոների մեջ մի քանի ոչ մեծ տներ էին, քարե եւ կավե գմբեթավոր վառարաններ, խեցեղեն, կենդանիների ոսկորներ, դանակներ եւ նիզակներ, ասել են փորձագետները։

Բիրմանը նշել է, որ այդ գտածոները սպասելի էին։

«Մենք որոշակի պատկերացում ունեինք սպասվող գտածոների մասին։ Այն, որ Ալտենբուրգը պատկանել է վաղ միջնադարին, կարելի էր սպասել նրա կառուցվածքային առանձնահատկություններից դատելով,- ասել է նա։- Մյուս կողմից՝ առանձին պատը մեծ անսպասելիություն էր իր հսկայական չափերով եւ ամրությամբ, ինչպես նաեւ ամրոցի օգտագործման ցածր մակարդակով, որը չէր համապատասխանում ամրացմանն ուղղված ջանքերին»։

Ալտենբուրգը գտնվում է Բեռլինից 240 կիլոմետր հարավ-արեւմուտք։