«Եթե մեր երկրի ներսում չլինի դիմադրություն, և օրվա իշխանությունը հասկանա, որ կարող է այդ փաստաթուղթը ստորագրել ու մարսել, ստորագրելու է». Իշխան Սաղաթելյան

Հունիսի 9-11-ը կայացած ՀՅԴ Հայաստանի 26-րդ Գերագույն ժողովի ժամանակ ընտրվել է ՀՅԴ Գերագույն մարմնի նոր կազմ. այն կազմված է 13 անձից: ԳՄ ներկայացուցիչ Իշխան Սաղաթելյանn այսօր լրագրողների հետ զրույցում ասաց, որ ժողովը քննել է ՀՅԴ Հայաստանի Գերագույն մարմնի երկամյա գործունեությունը, Հայաստանի և Արցախի Հանրապետություններում ստեղծված իրավիճակը, նախանշել առաջիկա անելիքները:

Ընթերցեց ՀՅԴ Հայաստանի Գերագույն ժողովը հայտարարությունը: Հիմնական շեշտադրումները հետևյալն էին՝ հայ ժողովուրդը և Հայոց պետականությունը կանգնած են գոյութենական ծանրագույն սպառնալիքի առջև, իսկ Հայաստանի իշխանությունների որդեգրած ապազգային քաղաքականությունը՝ Արցախի ժողովրդի ինքնորոշման իրավունքի ուրացումը, ՀՀ Անկախության հռչակագրից բխող հանձնառություններից և Արցախի Հանրապետության անվտանգության երաշխավորի սահմանադրական պարտականություններից հրաժարվելը, թուրք-ադրբեջանական պարտադրվող  զիջումներն ընդունելու և հայ ժողովրդի ազգային պետական շահերը ստորադասելու քաղաքականությունը կործանարար է։ «Գերագույն ժողովը ճակատագրական այս հանգրվանում համահայկական զորաշարժի կոչ է հնչեցնում։ Սթափվելու, ընդվզելու, մեր պետությանն ու հայրենիքին համազգային միասնության ճակատով տեր կանգնելու վճռական պահն է։ Արցախի ինքնորոշման իրավունքը սակարկման ենթակա չէ»: Հաջորդիվ հայտարարության մեջ նշվում է, թե ինչ ենք պարտավոր անել այս իրավիճակում:

«Եթե ստորագրվի այն, ինչի մասին հայտարարել է Նիկոլ Փաշինյանը, դա խաղաղության պայմանագիր չէ, այլ նոր կապիտուլյացիա է, այն աղետալի և ողբերգական հետևանքներ է ունենալու հայ ժողովրդի համար: Դա կանխելու միակ ճանապարհը համաժողովրդական ընդվզման և դիմադրության ճակատի ձևավորումն է, իսկ սպառնալիքներն ամբողջությամբ չեզոքացնելու համար պետք է հեռացնել իշխանությանը: Պետք է հասնենք նրան, որ այդ փաստաթուղթը չստորագրվի, դրա համար ժողովրդի ընդվզումը կկազմակերպենք, մեր առաջիկա քայլերն ու գործողություններն  ուղղված են լինելու դրան: Եթե մեր երկրի ներսում չլինի դիմադրություն, օրվա իշխանությունը հասկանա, որ կարող է այդ փաստաթուղթը ստորագրել և մարսել, ստորագրելու է: Ակնհայտ է, որ Փաշինյանի և Ալիևի միջև կա պայմանավորվածություն, որ այս տարվա ընթացքում այդ պրոցեսը հասցնեն ավարտին:

Ունենք քայլերի և գործողությունների մեր հստակ պատկերացումները, բայց քանի որ գտնում ենք, որ սա մեկ քաղաքական ուժի կամ կազմակերպության խնդիր չէ, մեր բոլոր գաղափարները քննարկելու ենք Հայաստանի խորհրդարանական և արտախորհրդարանական առողջ ուժերի հետ, ամբողջացնելու ենք մեր անելիքները և դուրս գանք պայքարի»,-ասում է Իշխան Սաղաթելյանը: Վստահ է, որ հայ մարդը չի կարող համակերպվել այս իրավիճակին, և յուրաքանչյուր մարդ պետք է տեր կանգնի իր հայրենիքին ու ինքնությանը: «Անցնող երեք տարվա ընթացքում մեր հիմնական անհաջողությունների պատճառը եղել է այն, որ չենք կարողացել մեր ժողովրդի լայն զանգվածների բացատրել սպառնալիքները և դուրս բերել պայքարի: Բայց իրավիճակ է փոխվել նաև վերջին մեկ տարվա ընթացքում: Երբ Փաշինյանը խոսեց նշաձողն իջեցնելու մասին, շատերը խորությամբ չէին գիտակցում, թե ինչ է կատարվում, մեզ մեղադրում էին, որ մեր պայքարն իշխանության համար է: Իսկ հիմա մարդը շատ պարզ և հստակ հայտարարել է, որ գնում է Արցախը Ադրբեջանի կազմում թողնելու ճանապարհով: Առաջարկում են հանձնվել հանուն փրկության, հանձնվել և փրկել մի մասը: Մենք գտնում ենք, որ դա ինքնաոչնչացման ճանապարհ է»:

Ընդգծում է, որ վերջին տարիներին թուլացրեցին մեր ժողովրդի դիմադրությունը, շարունակեցին պառակտել: «Անցնող տարիներին Ն. Փաշինյանն ամբողջությամբ քանդեց Հայաստան-Արցախ-Սփյուռք եռամիասնությունը, մեր ռեսուրսը, ուժի կենտրոնը նաև դա էր: Իրենք շարունակում խոսում են խաղաղության մասին՝ բերելով նոր կորուստներ, նոր պատերազմ, զիջումները հանգեցնում են դրան»:

Past.am-ը Իշխան Սաղաթելյանից մեկնաբանություն խնդրեց նրա և Հրանտ Մարգարյանի հարաբերությունների վերաբերյալ տարածված լուրերի հետ կապված: Մասնավորաբար, մամուլում և քաղաքական դաշտում լուրեր են շրջանառվում, թե Հրանտ Մարգարյանը դեմ է եղել Սաղաթելյանի՝ ԳՄ ներկայացուցիչ ընտրվելուն և փորձել է այդ դիրքում իր թեկնածուին առաջարկել: «Հրանտ Մարգարյանն իմ ավագ ընկերն է, ՀՅԴ բյուրոյի 20 տարվա ներկայացուցիչը, ով մեծ ավանդ ունի և՛ Դաշնակցության, և՛ Հայաստանի ու Արցախի պետականության կայացման մեջ: Մենք որևէ տարաձայնություն ունենալ չենք կարող, բոլոր նման խոսակցություններն իրականությանը չեն համապատասխանում, նման բան չկա և չի կարող լինել»,-արձագանքեց Սաղաթելյանը:

Լուսինե Առաքելյան