Արցախը դեմ չէ Բաքվի հետ երկխոսության, բայց հավասար պայմաններում․Դավիթ Բաբայանը՝ Փաշինյանին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Կառավարության այսօրվա նիստում Հայաստանի վարչապետ Նիկոլ Փաշինյանը Ստեփանակերտի գործընկերներին քաջալերեց, որ երկխոսեն Բաքվի հետ։

Պաշտոնական Ստեփանակերտից, Արցախի նախագահի խորհրդական Դավիթ Բաբայանն արձագանքում է Երևանին՝ հայտարարելով, որ Արցախը դեմ չէ Բաքվի հետ երկխոսության, բայց հավասար պայմաններում։

«Մենք միշտ դրա մասին ասել ենք, որ դեմ չենք Բաքվի հետ բանակցություններին։  1997-1998 թվականներից սկսած բանակցային ձևաչափը խախտվել է, միշտ պաշտոնական Ստեփանակերտը հայտարարել է, որ պետք է այն վերականգնել։

Հարցը՝ ձևաչափի և թեմաների մեջ է։ Բաքուն ուզում է այդ բանակցությունները ներկայացնել որպես ներադրբեջանական երկխոսություն, այսինքն՝ մենք պետք է դառնանք Ադրբեջանի «մաս»։  Մեզ համար նման ձևաչափն ընդունելի չէ։ Ինչի՞ մասին պետք է խոսենք․ մենք կարող ենք խոսել միայն մարդասիրական հարցերի շուրջ։

Բանակցությունների վերաբերյալ Բաքվի և Սեփանակերտի պատկերացումներն իրարամերժ են։ Ադրբեջանի պայմաններն էլ հայտնի են՝ այն է, որ Արցախը պետք է կապիտուլյացիայի ենթարկվի, ապամոնտաժի իր բոլոր պետական ինստիտուտները, այդ թվում՝ բանակը։ Սա մեզ համար ընդունելի չէ: Եթե բանակցում ենք իսկապես հակամարտության կարգավորման վերաբերյալ, դա այլ խնդիր է, բայց մենք ունենք իրարամերժ մոտեցումներ։ Խնդիրը թեմաների և ձևաչափի մեջ է»,- Tert.am-ի հետ զրույցում նկատեց արցախցի պաշտոնյան։

Միաժամանակ  Նիկոլ Փաշինյանը հույս է հայտնել, որ Բաքու-Ստեփանակերտ երկխոսության վստահելի միջազգային մեխանիզմ կստեղծվի։ Արցախի նախագահի խորհրդականն էլ ընդգծում է, որ  արդեն կա ձևավորված ԵԱՀԿ Մինսկի խմբի ձևաչափը, և բանակցություներն էլ այդ ձևաչափում պետք է շարունակվեն։

Իսկ Լաչինի միջանցքը բացելու ուղղությամբ բանակցություններն, ինչպես տեղեկացրեց Արցախի քաղաքական գործիչը,  շարունակվում են, բայց նորություն դեռ չկա։

«Քննարկումներ կան, բայց շոշափելի արդյունք չկա։ Պահանջն այն է, որ պետք է Բերձորի միջանցքը գործի։ Կան տարբեր այլ հարցեր այստեղ, բայց մենք երբեք մեր ազգային արժանապատվությունը չենք զոհաբերելու հանուն հացի։ Այո, շատ ծանր է վիճակը, սակայն, եթե ազգային արժանապատվությունը կորցնենք, տասնապատիկ անգամ ավելի վատ է լինելու»,- հավելեց Բաբայանը։

Նշենք, որ Աղդամով Արցախ է մտել 1  բեռնատար ռուսական հումանիտար օգնությունը, ինչից հետո, ըստ պայմանավորվածության, պետք է բացվեր Լաչինի միջանցքը, սակայն,  այն մինչև հիմա փակ է:

Նիկոլ Փաշինյանն էլ, անդրադառնալով ռուսական բեռներին, նշել էր, որ ՌԴ 1 բեռնատար հումանիտար բեռը չի կարող իրավիճակի վրա որևէ տեսանելի ազդեցություն ունենալ։