ՀՀ ՏԿԱԻ նախարարությունը ստեղծում է մարդկանց ձնաբքից պաշտպանելու հենակետեր

Հունվարի 13-ին ՀՀ ՏԿԱԻՆ շարահրապարակում նախարար Ա. Երիցյանի մասնակցությամբ կայացավ ձնաբքի դեպքում մարդկանց աջակցության ժամանակավոր հենակետի ծավալման փորձարկումը, որի ընթացքում ներկայացվեցին տվյալ իրավիճակում քաղաքացիներին օգնություն տրամադրելու միջոցներն ու հնարավորությունները:

Տարեսկզբին հանրապետության տարածքում գրանցված առատ տեղումները և որոշ մարզերում ձնաբքի հետևանքով առաջացած արտակարգ իրավիճակները հաշվի առնելով՝ ՀՀ ՏԿԱԻ նախարարությունն Արագածոտնի, Սյունիքի և Գեղարքունիքի մարզերում կծավալի ժամանակավոր հենակետեր` ձյան մեջ արգելափակված քաղաքացիներին հրատապ օգնություն ցուցաբերելու նպատակով: Անհրաժեշտության դեպքում շարժական հենակետերը կարող են ծավալվել մյուս մարզերում ևս:

Սահմանված տարածքներում տեղադրվելու են արագ ծավալվող, մետաղական և պնևմատիկ հենաձողերով, երկշերտ ծածկով վրաններ, որոնք հագեցած կլինեն մարդկանց ժամանակավոր պատսպարման, ցուրտ եղանակին ջերմությամբ և տաք սննդով ապահովելու միջոցներով: Նմանատիպ վրանները նախատեսված են դաշտային աշխատանքների համար և կարող են ծառայել նաև որպես տեղում կազմակերպված փոքր շտաբեր` արագ արձագանքման ծառայությունների համար:

Վրանները ջրակայուն են և հագեցած կլինեն տուժածներին՝ մասնավորապես ցրտահարության ախտանիշով հիվանդներին, առաջին օգնություն ցուցաբերելու բոլոր հնարավորություններով: Դրսում զրոյական ջերմաստիճանի դեպքում վրանը կարող է ներսում ապահովել մինչև 50oC ջերմություն: Այն հնարավոր է ծավալել 3-5 րոպեի ընթացքում: Մեկ վրանը կարող է բուժօգնություն ցուցաբերել միաժամանակ երկու տուժածի, իսկ տաք սննդից և հյութերից կարող են օգտվել ավելի մեծ թվով քաղաքացիներ:

Հենակետերում քաղաքացիներին կսպասարկեն հատուկ բուժպատրաստում անցած մասնագետներ: Անհրաժեշտության դեպքում մարզերում նրանց կմիանան ՀՀ ՏԿԱԻ նախարարության և Շվեյցարական զարգացման և համագործակցության գործակալության համատեղ ծրագրի շրջանակներում վերապատրաստված ՀՀ 6 մարզերի 540 բուժաշխատողներ:

Լրագրողների հետ զրույցում նախարար Ա. Երիցյանը նշեց, որ տեղումնառատ ձմեռը դեռ կարող է նոր անակնկալներ մատուցել՝ դժվարացնելով քաղաքացիների տեղաշարժը:

- Մի քանի օր շարունակ հանրապետություն որոշ ճանապարներ փակ կամ դժվարանցանելի էին, ուստի՝ որոշում կայացրեցի տվյալ իրավիճակների համար հիմնել մարդկանց աջակցության շարժական հենակետեր, որտեղ ծառայություն կիրականացնի նախարարության հատուկ պատրաստված անձնակազմը: Տուժած քաղաքացիները կպատսպարվեն կամ բուժօգնություն կստանան մինչև մեքենաները դուրս կբերվեն արգելափակումից: Օրինակ՝ Սիսիան-Գորիս ճանապարհին արգելափակված և ցրտահարված մարդկանց տեղափոխում են Սիսիան, կամ Գորիս, ինչը երկար ժամանակ է պահանջում, իսկ հենակետերը հնարավորություն կընձեռեն փրկարարներին ու բժիշկներին տեղում ցուցաբերել առաջին բուժօգնություն: Մենք արել և անում ենք ամեն ինչ՝ դժվար իրավիճակներում մեր քաղաքացիներին օգնության ձեռք մեկնելու համար,- եզրափակեց Ա. Երիցյանը:

Նշենք, որ 2015 թ. դեկտեմբերի 31-ից մինչև 2016 թ. հունվարի 11-ն ընկած ժամանակահատվածում ՀՀ ՏԿԱԻՆ Ճգնաժամային կառավարման ազգային կենտրոնը հանրապետության տարածքում արձանագրել է ձնաբքի մեջ մարդկանց և տրանսպորտային միջոցների արգելափակման 236 դեպք: Այդ օրերին փրկարարների ուժերով ձնաբքից անվտանգ տարածք է տեղափոխվել 3147 մարդ և 1265 տրանսպորտային միջոց:

 

Աղբյուրը՝ ՏԿԱԻՆ