«Եթե իսկապես սիրում եք, պայքարեք հանուն սիրո». «Հանցավոր սեր» վեպում հատվում են իրականի ու երևակայականի զուգահեռները․ «Փաստ»

«Փաստ» օրաթերթը գրում է.

Արմինեի առաջին գիրքը՝ բանաստեղծությունների ժողովածուն, լույս է տեսել 2019 թ.ին: «Ժողովածուն նվիրել եմ եղբորս, նա ծառայում էր մեր Ջրականում, որը հիմա, ավաղ, մերը չէ: «Սիրո ուրվագիծը» նվիրել եմ եղբորս և մեր ազգի բոլոր զինվորներին: Գրքում հիմնականում գերակշռում է հայրենասիրության թեման, ընդգծված է սերն առ հայրենիք»,«Փաստի» հետ զրույցում ասում է հեղինակը: Նշում է՝ 12-13 տարեկան էր, երբ իր գրվածքներն առաջին անգամ ուշադրության արժանացան:

«Լոռիի Թումանյան քաղաքից եմ: Գիտենք, որ, ավաղ, մայրաքաղաքի կրթական ու մշակութային կենտրոններից մարզերը հյուրեր քիչ են ունենում: Այդ ժամանակ «Սերունդ» ամսաթերթն էր լույս տեսնում, մեզ այցելեց նրա գլխավոր խմբագիրը ողջ անձնակազմով: Զրույցներ էին տեղի ունենում, աչքի ընկնող երեխաներին ուսուցիչներն ու տնօրենն, ըստ ավանդույթի, ներկայացնում էին: Ես ևս այդ բախտին արժանացա, պատմեցին իմ մասին, որ ստեղծագործում եմ, բանաստեղծություններ ու գեղեցիկ շարադրություններ գրում: Խմբագիրը խնդրեց իմ մի քանի գործերը փոխանցել իրեն՝ ուղղակի ընթերցելու համար: Շատ հավանեց դրանք և առաջարկեց իմ գրվածքներից երկուսը տպագրել իրենց ամսաթերթում: Սա իմ առաջին փորձն էր թերթում տպագրվելու: Հետո շարունակեցինք համագործակցել, փոքրիկ հոդվածներ էի գրում: Ամուր թելերով կապվեցի «Սերունդի» հետ»,-նշում է զրուցակիցս:

Արմինեն ուսանել է ԵՊՀ-ի հայ բանասիրության ֆակուլտետում, նախ՝ բակալավրիատում, հետո՝ մագիստրատուրայում, մասնագիտությամբ բանասեր-մանկավարժ է: Հիմա Արմինե Մելքումյանն ընթերցողների դատին է հանձնել «Հանցավոր սեր» վեպը։ Վեպը իրապատում է, սակայն, ինչպես հեղինակն է նշում, գրքում կգտնեք իրականի ու երևակայականի զուգահեռները: «Վեպը նվիրված է ամուսնուս վառ հիշատակին: Դրա հիմքում մեր հարաբերություններն են, անձնական կյանքի թեման, մեր մեծ սերը հիմք դարձավ վեպը գրելու համար: Ռիսկային էր անձնական հարաբերությունների մասին գրելը, բայց քանի որ պատմությունը միաձուլվում է նաև երևակայական աշխարհի հետ, ինչպես ասում են, ռիսկային գոտին անցանք: Դեռ իր կենդանության օրոք էի իրեն խոստացել, որ մեր սիրո պատմության հիման վրա վեպ եմ գրելու, իրենից հետո այս վեպը գրելը պոռթկում էր, այս կերպ ուզում էի հոգիս թեթևացնել, գրելը սթրեսը հաղթահարելու միջոց դարձավ: Նաև տարբերակ ուրիշներին խորհուրդ տալու, թե ինչն է կյանքում կարևոր, որ քայլն ինչ հետևանքի կարող է հանգեցնել»,-ասում է զրուցակիցս՝ հավելելով, որ վեպի հիմնական ուղերձն ընթերցողին հետևյալն է՝ եթե իսկապես սիրում եք, պայքարեք հանուն սիրո:

Այնպես է ստացվել, որ ներկայում Արմինեն Հայաստանից դուրս է բնակվում՝ ՌԴ Ամուրի մարզում, սակայն շարունակում է ապրել հայրենիքի՝ Հայաստանի ու Արցախի հոգսերով ու ցավով: Փորձում է ուժերի ներածին չափով օգտակար լինել Արցախից բռնի տեղահանված մեր հայրենակիցներին: Օրինակ՝ «Հանցավոր սեր» վեպի վաճառքից ստացված հասույթով տեղահանված ընտանիքներից մի քանիսի երեխաների համար հագուստ, գրենական պիտույքներ և գրքեր կգնեն։ «Ամուրի մարզում մեր շատ հայրենակիցներ են բնակվում: Առաջինն, ինչ արեցի այստեղ տեղափոխվելով, 2021 թ.-ին հայկական դպրոց հիմնադրելն էր, որը կրում է «Սերունդ» կրթամշակութային կենտրոն անվանումը: Հայոց լեզու և գրականություն, Հայոց պատմություն ու մշակույթ, երեխաներին դասավանդում եմ այս ամենը: Օնլայն անվճար դասեր եմ անցկացնում Արցախից տեղահանված մեր փոքրիկների հետ: Նախքան արցախահայերին օժանդակելը, նույն գրքի վաճառքից ստացված հասույթով փորձել եմ հնարավորինս օժանդակել մեր զինծառայողների ընտանիքներին: Փորձում եմ իմ ուժերի ու կարողությունների չափով օգտակար լինել մեր հայրենակիցներին»,-եզրափակում է Արմինեն:

ԼՈՒՍԻՆԵ ԱՌԱՔԵԼՅԱՆ

Մանրամասները՝ «Փաստ» օրաթերթի այսօրվա համարում