H1N1 վարակից արձանագրվել է մահվան 11 դեպք, որից 3-ը` 2015 թվականին

ОБЩЕСТВО 14 Январь, 2016 15:35

Հայաստանում հունվարի 13-ին արձանագրվել է խոզի գրիպի մահացության 11-րդ դեպքը: Past.am-ն արդեն տեղեկացրել էր, որ բոլոր մահացածները H1N1 կամ, ինչպես հանրությանը հայտնի է, խոզի գրիպի անվանմամբ վիրուսակիրներ են եղել:

Հայաստանի դպրոցական եւ նախադպրոցական հաստատությունները, պայմանավորված սուր շնչառական հիվանդությունների տարածման վտանգով, շարունակում են գտնվել երկարաձգված արձակուրդում, իսկ մարզի բուժհաստատությունների ղեկավարները հետեւողականորեն վերահսկում եւ իրականացնում են են սուր շնչառական հիվանդությունների կանխարգելումն ու բուժումը:

Ինչպես Past.am-ին տեղեկացրեցին ԿԳ նախարարությունից, նախարարի հրամանով ուսումնական հաստատություններում դասերը կվերսկսվեն հունվարի 25-ից, սույն որոշումը չի տարածվում բուհերի վրա։

Սուր շնչառական վարակների ակտիվացման ողջ ընթացքում ՀՀ առողջապահության նախարարությունը բնակչությանը հորդորում է խուճապի չմատնվել, բայց զգոն լինել ու հիվանդության առաջին իսկ ախտանշանների դեպքում դիմել բժշկի։ Քանի որ սեզոնային գործոնով պայմանավորված ակտիվացումը համընկավ եղանակային պայմանների կտրուկ վատացմանը, ինչպես նաև տոնական օրերի ակտիվ շփումներին, ՀՀ առողջապահության նախարարությունն ու համակարգն աշխատեցին արտակարգ ռեժիմով։ Աշխատանքներն առ այսօր տարվում են երկու ուղղությամբ` կանխարգելիչ և բուժական։ Պետք է ասել, որ նախարարությանը հաջողվեց բարձրացնել մարդկանց զգոնությունը, ինչի վկայությունն է դիմելիության մեծացումը։ Անտարակույս, դրանով է պայմանավորված հանրապետությունում նկատվող իրավիճակի կայունացման և դեպքերի նվազման միտումը։ Այս մասին Past.am-ին փոխանցեցին ՀՀ առողջապահության նախարարությունից:

Հունվարի 14-ի՝ ժամը 10.00-ի տվյալներով, սուր շնչառական վարակներով ստացիոնար դիմելիությունը կազմել է 948 դեպք, որից 796-ը` 0-18 տարեկան: Թոքաբորբով հոսպիտալացվածները 422-ն են, որից 199-ը` 0-18 տարեկան։ Սուր շնչառական վարակներով և թոքաբորբերով հոսպիտալացվել է 114 հղի։ Վերակենդանացման բաժանմունքներում բուժում է ստանում 92 հիվանդ։ Երեկ «Էրեբունի» բժշկական կենտրոնում մահացել է 1954թ. ծնված մի կին, ով տառապում էր սրտի իշեմիկ հիվանդությամբ, ուներ շաքարային դիաբետ։ Կնոջ մոտ հաստատվել էր գրիպի Ա տեսակի H1N1 ենթատեսակը։

Past.am-ի հետ զրույցում ՀՀ առողջապահության նախարարությունից նշեցին, որ «Սուրբ Գրիգոր Լուսավորիչ» բժշկական կենտրոնում մահացած ծննդկանի մոտ լաբորատոր հետազոտությամբ գրիպի Ա տեսակի H1N1չի հայտնաբերվել։ 28 շաբաթական հղիության ժամանակ կեսարյան հատմամբ ծննդալուծված կնոջ վիճակը տևական ժամանակ ծայրահեղ ծանր էր։

Նարեկ Միրզոյան