Ի՞նչ կարեւոր տեղեկություն է թաքցնում Գառնիկ Իսագուլյանը «Մարաշի խմբի» մասին

Այսօր «Հայելի» մամուլի ակումբում ասուլիսով հանդես եկավ Հայաստանում ԼՂՀ ներկայացուցչության խորհրդատու-խորհրդական, «Ազգային անվտանգություն» կուսակցության նախագահ Գառնիկ Իսագուլյանը: Երբ նրան հարց ուղղվեց 2015թ. նոյեմբերի 25-ին Նորք-Մարաշում զինված խմբին վնասազերծելու օպերացիայի եւ այդ գործի շրջանակներում շարունակվող ձերբակալությունների մասին, Իսագուլյանը շատ ուշագրավ հայտարարություն արեց. «Հավատացեք, որ այն, ինչ արել են մեր հատուկ ծառայությունները, լրիվ տեղավորվում է ոչ միայն իրավունքի շրջանակներում, այլ, եթե չլիներ նոյեմբերի 25-ի կանխարգելող օպերացիան, մենք կարող է իսկապես դեկտեմբերի 1-ից հետո հայտնվեինք բավականին ծանր իրավիճակում»:

Past.am-ի հարցին, թե ինչ ժամկետ է դեկտեմբերի 1-ը, Գառնիկ Իսագուլյանը պատասխանեց. «Եթե դուք ուշադիր հետեւել եք, ԱԱԾ-ի օպերացիայի հենց առաջին օրը տրված բացատրություններում հստակ նշվում էր, թե որ օրն էր նախատեսված առաջին գործողությունը: Այդ ժամկետը նշվել է ԱԱԾ պաշտոնյաների տված ասուլիսներում»:

Իրականում, ԱԱԾ-ի երկու պաշտոնական հաղորդագրություններում, ԱԱԾ պետ Գորիկ Հակոբյանի՝ «Արմենպրեսին» տված պարզաբանումներում, ինչպես նաեւ ԱԱԾ քննչական վարչության պետի տեղակալ Միքայել Համբարձումյանի ասուլիսում դեկտեմբերի 1-ի մասին ոչ մի հայտարարութուն չի եղել: Ընդամենը նշվել է, որ Արթուր Վարդանյանի գլխավորած խումբը պատրաստվում էր օրեր անց ահաբեկչություն իրականացնել:

Ի՞նչ գիտի Իսագուլյանը օպերացիայի եւ դրանից բխող քրեական գործի մասին: Բանախոսը, հակառակը, հերքեց, թե որեւէ այլ տեղեկության տիրապետում է: Մյուս կողմից, ասուլիսում նա մի հետաքրքիր ձեւակերպում էլ արեց՝ հակասելով տեղեկացված չլինելու իր պնդումներին: Իսագուլյանը, հարցերից մեկին պատասխանելով, ասաց. «Ուշադիր հետեւք իմ բառերին: Որովհետեւ ամեն մի նախադասությունը, ամեն մի բառը, ստորակետը, միջակետը, բազմակետն իր իմաստը ունի»: Իսագուլյանն այս անգամ նույնպես իր ղեկավարած կուսակցության անվանն ու իր նախկին պաշտոնին համապատասխան խորհրդավոր էր:

Գագիկ Աղբալյան