«Սատկի, անասուն». Արարատում կնոջ դավաճանության պատճառով ամուսինը 2 դանակի բազմակի հարվածներով սպանել է նրան

1in.am-ը գրում է.

Արարատի և Վայոց Ձորի մարզերի ընդհանուր իրավասության դատարանում Գագիկ Սարգսյանի նախագահությամբ ավարտվել է

Վոլոդյա Մ.-ի գործի դատական քննությունը:

Վոլոդյան արգելանքի տակ է 2012 թվականի դեկտեմբերի 4-ից: Գործի դատական քննությունը սկսվել է 2013 թվականի օգոստոսին, ավարտվել է 2015 թվականի դեկտեմբերի վերջին:

Դեպքի Ժամանակ Վոլոդյան 51 տարեկան էր: Նա մեղադրվել է իր հետ փաստական ամուսնական հարաբերությունների մեջ գտնվող Աննային (անունը փոխված է) սպանելու համար:

Վոլոդյայի արարքը նախաքննական մարմինը մի քանի անգամ վերաորակել է: Վոլոդյան նախ մեղադրվել է դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:

Գործի դատական քննության փուլում՝ 2014 թվականի ապրիլի 16-ին, մեղադրող դատախազ Ս. Մալխասյանը որոշում է կայացրել խստացնելու Վոլոդյա Մ.-ի մեղադրանքը, նոր մեղադրանք է առաջադրվել առանձին դաժանությամբ տուժողին սպանելու համար՝ ՀՀ քրեական օրենսգրքի 104 հոդվածի 2-րդ մասի 5-րդ կետով:

2015 թվականի դեկտեմբերի 1-ին դատախազ Հ. Նիկողոսյանն արդեն որոշում է կայացրել մեղմացնելու մեղադրանքը, նոր մեղադրանք է առաջադրվել հոգեկան խիստ հուզմունքի վիճակում տուժողին սպանելու համար՝ ՀՀ քրեական օրենսգրքի 105 հոդվածի 1-ին մասով:

Դատարանը հենց այդ հոդվածով էլ մեղավոր է ճանաչել Վոլոդյա Մ.-ին:

Ըստ դատական ակտի՝ Վոլոդյա Մ.-ն երկու տարեկանում ծնողների հետ Իրանից տեղափոխվել է Հայաստան, բնակվել է մինչև 1988 թվականը, ապա մեկնել է ԱՄՆ, այնտեղ ընտանիք է կազմել, ամուսնական կյանքի ընթացքում ունեցել է երկու երեխա:

2003 թվականին Վոլոդյան եկել է Հայաստան, ծանոթացել է տուժող Աննայի հետ, ով ամուսնալուծված էր ու երկու դուստր ուներ:

Որոշ ժամանակ Վոլոդյան շփվել է Աննայի հետ, նրանք ապրել են ինտիմ կյանքով:

Վոլոդյան պարբերաբար մեկնել է ԱՄՆ, վերադարձել է Հայաստան, որտեղ շարունակել է Աննայի հետ կապը:

2008  թվականին Վոլոդյան վերջնականապես հեռացել է ընտանիքից, վերադարձել է Հայաստան: Աննայի համար նա գնել է բնակարան ու ավտոմեքենա և բնակություն է հաստատել Աննայի ու նրա երկու դուստրերի հետ:

Որոշ ժամանակ անց Վոլոդյան սկսել է խանդել կնոջը, նրան կասկածել է անհավատարմության մեջ, ինչի պատճառով հաճախ վիճել են:

Ընդ որում՝ ըստ դատական ակտի, Աննան վեճերի ժամանակ չի ժխտել, որ դավաճանում է Վոլոդյային:

Սակայն Վոլոդյան Աննային սիրելով՝ շարունակել է ապրել նրա հետ…

Վերջին շրջանում Վոլոդյան տեղեկացել է, որ Աննան ինտիմ կապի մեջ է մի ատամնաբույժի հետ:

2012 թվականի դեկտեմբերի սկզբին այդ հարցի շուրջ պարզաբանում ստանալու համար Վոլոդյան ցանկացել է Աննայի հետ հանդիպել ատամնաբույժին:

Դեկտեմբերի 3-ին, ժամը 20-ի սահմաններում երեքով հանդիպել են ատամնաբույժի շենքի բակում: Վոլոդյան ու Աննան նստել են ատամնաբույժի մեքենան, խոսել են, իսկ վերջում՝ բաժանման պահին Աննան Վոլոդյայի ներկայությամբ համբուրել է ատամնաբույժին՝ ասելով, թե սիրում է նրան:

Դրանից հետո Վոլոդյան ու Աննան վերադարձել են տուն, անկողին են մտել:

Վոլոդյան քնել չի կարողացել, շուռումուռ է եկել անկողնում, դրանից զայրացած Աննան Վոլոդյային անվանել է «կով», պահանջել է, որ նա անմիջապես զանգի Ամերիկայում ապրող մորն ու 5000 դոլար խնդրի, այլապես ինքը նրան տանից դուրս կանի:

Վոլոդյան կասկածել է, որ Աննան գումարն ուզում է սիրեկանի համար: Նա զայրացել է, վեճ է սկսվել:

Վոլոդյան ձեռքերով, ապակե սկահակով հարվածներ է հասցրել Աննայի մարմնի տարբեր մասերին:

Վիճաբանության աղմուկից արթնացել են Աննայի աղջիկները, փորձել են միջամտել, պաշտպանել մայրիկին:

Վոլոդյան գնացել է խոհանոց, նրա հետևից խոհանոց է գնացել նաև Աննան ու Վոլոդյայի մոր հասցեին հայհոյանք է տվել, վերցրել է լիկյորի շիշն ու հարվածել է Վոլոդյայի գլխի գագաթային մասին: Շիշը ջարդվել է:

Աննան վերցրել է խոհանոցային դանակը, բայց Վոլոդյան մի ձեռքով բռնել է Աննայի մազերից, մյուս ձեռքով դանակը խլել է Աննայի ձեռքից՝ վնասելով իր ձեռքը:

Այդ պահին, ըստ դատական ակտի, Աննայի կողմից պարբերաբար դրսևորած հակաբարոյական վարքագծի կապակցությամբ Վոլոդյայի մոտ երկարատև հոգեճնշող իրավիճակի ազդեցությամբ առաջացել է կումուլյատիվ աֆեկտի վիճակ:

Նա Աննայի դուստրերի ներկայությամբ խոհանոցի սեղանից հաջորդաբար վերցրած երկու դանակներով, որոնցից մեկը սղոցատիպ շեղբով է եղել, հարվածներ է հասցրել Աննայի մարմնի տարբեր մասերին:

Աննան դիմադրել է,  նրա դուստրերը փորձել են Վոլոդյայի ձեռքից խլել դանակները, բայց դա նրանց չի հաջողվել: Աղջիկները տնից դուրս են վազել՝ օգնություն կանչելու: Իսկ Վոլոդյհան անընդհատ կրկնելով՝ «Սատկի, անասուն»՝ շարունակել է դանակով հարվածներ հասցնել Աննային: Վերջինս վայր է ընկել ու ստացած բազմաթիվ վնասվածքներից մահացել է:

Վոլոդյան արագ դուրս է եկել բնակարանից, նստել է Աննայի անվամբ գրանցված «Քրայսլեր» մեքենան ու մեկնել է Երևան, ճանապարհին զանգահարել է ԱՄՆ:

Հասնելով Երևան՝ մեքենան կանգնեցրել է Արշակունյաց պողոտայում և առավոտյան ժամը 7-ին մեղայականով ներկայացել է Շենգավիթի ոստիկանություն:

Հոգեկան խիստ հուզմունքի վիճակում կատարած սպանության համար Վոլոդյա Մ.-ն իրեն մեղավոր է ճանաչել:

Նա ասել է, թե վերջին շրջանում Աննան սկսել էր անբարո կյանքով ապրել բացեիբաց, ինքը վիճել է նրա հետ, բայց նա շարունակել է իրեն ազատ պահել, հեռախոսով խոսել է տղամարդկանց հետ, իր մոտ տվել է սիրեկանների անունները: Նա ստորացրել է իրեն, համարել է, որ ինքը միայն ֆինանսի աղբյուր է: Բայց ինքը, նրան սիրելով, շարունակել է հետն ապրել՝ հույս ունենալով, որ կարգի կհրավիրի…

Ատամնաբույժի հետ հանդիպման ժամանակ ինքը խնդրել է, որ ատամնաբույժը չքանդի իր ընտանիքը, բայց վերջինս ասել է, թե ինքն էլ է սիրում Աննային: Աննան իր ներկայությամբ համբուրել է սիրեկանին:

Ինքը մտածել է, որ պետք է բաժանվի, ուրիշ ելք չկա: Ատամնաբույժը մեքենայով իրենց տուն է տարել: Իրենք առանց մի բառ անգամ խոսելու տուն են գնացել, պառկել են:

Ինքը փորձել է հաշտվել անգամ այդ պարագայում, ցանկացել է գրկել Աննային, բայց վերջինս արհամարհական կերպով չի թողել: Իր քունը չի տարել, ինքը շուռումուռ է եկել՝ մտածելով իր, Աննայի, ատամնաբույժի մասին: Երբ անկողնում շատ է շարժվել, Աննան իրեն անվանել է «կով», պահանջել է, որ ինքը փող ուզի Ամերիկայում ապրող մորից…

Վոլոդյան նշել է, թե ինքը ծաղկամանով Աննային չի հարվածել, խփել է միայն դանակներով: Աղջիկների ներկայությամբ Աննային չի խփել, Աննայի պահանջով աղջիկները դուրս են եկել, որ ոստիկաններին կանչեն:

Տուժողի իրավահաջորդը պնդել է, որ Վոլոդյան իր դստերը՝ Աննային, դանակով հարվածներ է հասցրել երեխաների ներկայությամբ: Նա սպանությունը կատարել է անչափահաս երեխաների ներկայությամբ՝ առանձին դաժանությամբ, ոչ թե հոգեկան խիստ հուզմունքի վիճակում…

Դատարանը հաստատված է գնահատել, որ Վոլոդյա Մ.-ն տուժողին սպանել է հոգեկան խիստ հուզմունքի վիճակում՝ երկարատև հոգեճնշող վիճակում գտնվելը նրա մոտ առաջացրել է կումուլյատիվ աֆեկտի վիճակ՝ ըստ դատահոգեբանական փորձաքննության եզրակացության:

Վոլոդյա Մ.-ն մեղավոր է ճանաչվել ՀՀ քրեական օրենսգրքի 105 հոդվածի 1-ին մասով և դատապարտվել է 3 տարի 6 ամիս ազատազրկման:

Պատժի սկիզբը՝ 2012 թվականի դեկտեմբերի  4-ից:

Հօգուտ տուժողի իրավահաջորդի՝ Վոլոդյա Մ.-ից կբռնագանձվի 1 միլիոն 500 հազար դրամ՝ որպես հանցագործությամբ պատճառած վնասի հատուցում: