Իշխանական բուրգը սկսում է ճաքեր տալ. Նիկոլն արդեն չի կարողանում ներսում պահել տարաձայնությունները. Վիգեն Հակոբյան

Նիկոլ Փաշինյանի թվացյալ մոնոլիտ իշխանական բուրգը ճաքեր է տալիս. այս օրերին նման տեսակետներ են հնչում հանրային ու քաղաքական տարբեր շրջանակներում: Այս տեսակետներն օբյեկտիվորեն ձևավորվել են Ալեն Սիմոնյանի եղբոր տիկնոջ կալանավորումից, ապա նաև՝ ԱԺ փոխնախագահ Հակոբ Արշակյանի՝ IT ընկերության կալանավորված տնօրենին ուղղված ժեստից հետո, ինչ-ինչ պատմություններ էին պտտվում նաև Մխիթար Հայրապետյան-Ալեն Սիմոնյան կուլիսային լարվածության մասին:

Քաղտեխնոլոգ, վերլուծաբան Վիգեն Հակոբյանը, 168.am-ի հետ զրույցում անդրադառնալով իշխանական բուրգում վերջին լարվածության պատճառներին,  նկատեց՝ Նիկոլ Փաշինյանը վերջին 3 տարվա ընթացքում՝ 2020 թվականի պարտությունից հետո, անընդհատ փորձում էր առաջ մղել խաղաղության օրակարգերի թեզը, որի սնանկությունն արդեն տեսանելի է նաև սեփական թիմի համար:

«Այն պահից սկսած, երբ Ալիևը տարեսկզբին հանդես եկավ իր հայտնի ելույթով՝ ըստ էության բացահայտելով խաղաղության պայմանագրի շուրջ իրական գործընթացները, երբ պարզվեց, որ բանակցային որևէ գործընթաց տեղի չի ունենում, այլ հակառակը՝ Ալիևի և Փաշինյանի ներկայացրածը բացարձակապես աղերս չունեն իրար հետ, Նիկոլ Փաշինյանը կորցրեց իր միակ քաղաքական օրակարգի մենաշնորհը, որով փորձում էր ժողովրդին համոզել, որ ամեն ինչ արվում է, զիջվում է հանուն խաղաղության,- մանրամասնեց Վիգեն Հակոբյանը և հավելեց,- Սա ցույց տվեց, որ Նիկոլ Փաշինյանը քաղաքական սնանկ է, իշխանությունն էլ՝ հետը, և բոլոր օրակարգերը, որոնց մասին խոսվել է վերջին երեք տարվա ընթացքում, բլեֆ են եղել»:

Քաղտեխնոլոգի գնահատմամբ՝ ալիևյան բացահայտումը, որն է փաշինյանական պրավալը, զգալի ազդեցություն է թողնում ներքաղաքական կյանքի վրա:

«Իշխանությունը ձևավորված է տարբեր կլաններից, տարբեր ազդեցության խմբավորումներից, ֆինանսաօլիգարխիկ և քաղաքական-օլիգարխիկ ձուլվածքներից, և այդ խմբավորումները սկսեցին հասկանալ, որ գործընթացները լավ տեղ չեն տանում, որ Նիկոլ Փաշինյանն այլևս անհերքելի հեղինակություն չէ իրենց համար:  Ըստ էության, խաղաղության գործընթացի տապալումը բերում է նրան, որ Նիկոլ Փաշինյանի ազդեցությունը պրոցեսների վրա զգալիորեն նվազում է,- ասաց նա՝ շեշտելով, որ Նիկոլ Փաշինյանը իշխանական բուրգը պահում էր խաղաղության մասին խոստումների, հույսերի վրա,- Քանի դեռ նա կարողանում էր բոլորին համոզել, որ երկիրը տանում է դեպի խաղաղություն, որ իր հետ հաշվի են նստում դրսում, կլանները նրան համարում էին որպես իրենց համար հեղինակություն, որն ապահովում էր իրենց բարեկեցությունը, կլանների միջև խաղաղ գոյակցությունը, ռեսուրսների «արդար վերաբաշխումը»»:

Այս իրողություններում արդեն, ըստ վերլուծաբանի, իրավիճակը փորձում է վերահսկողությունից դուրս գալ. այն տղաներն ու աղջիկները, որոնք տարբեր փաբերում նույնիսկ պարտքով էին գարեջուր ու սուրճ խմում, բայց 2019-20 թվականից հետո բյուջեի համն էին առել, սկսել էին կիսելու բան ունենալ, արդեն այդ տարաձայնությունները չեն կարողանում թաքցնել:

«Երբ «պապան» համեմատաբար ցույց է տվել իր թուլությունը, որ իր ասածը մոտ չէ ճշմարտության, որ իր հետ հաշվի չեն նստում, բոլորը սկսել են անհանգստանալ իրենց կարգավիճակի համար. երբ բալանսը խախտվում է, իշխանական բուրգը սկսում է ճաքեր տալ: Համակարգը սկսում է ճաքեր տալ, որովհետև Նիկոլն արդեն չի կարողանում սիստեմի ներսում պահել տարաձայնությունները,- պարզաբանեց մեր զրուցակիցը, ապա պատասխանելով հարցին՝ արդյոք սրանո՞վ է պայմանավորում նաև Ալեն Սիմոնյանի ընտանիքին առնչվող աղմկահարույց դրվագը, Հանրային ռադիոյի տնօրենի ըմբոստացումը, նշեց,- Թե՛ Ալեն Սիմոնյանի շուրջ տեղի ունեցող գործընթացները, թե՛ ավելի քիչ քննարկված Հակոբ Արշակյանի հրապարակային անդրադարձ-անհամաձայնությունը «Սիներջի»-ի տնօրեն Աշոտ Հովհաննիսյանի ձերբակալության փաստով:

ՀՀ իշխանական բուրգն այնպիսին է, որ առանց Նիկոլ Փաշինյանի դաբրոյի որևէ քննչական գործողություն, դատական որոշում չի իրականացվում, ու եթե որևէ մեկը թիրախավորում է ինչ-որ դատավորի, քննիչի, ակնհայտորեն թիրախավորում է Նիկոլ Փաշինյանին: Նրանք բոլորը շատ լավ հասկանում են՝ դատավորն ու քննիչը հարցը չեն լուծել: Ու երբ Հակոբ Արշակյանը նման ելույթ է ունենում, կամ Ալեն Սիմոնյանը Ֆեյսբուքում ինչ-ինչ նկարներ է տեղադրում, բոլորի համար է հասկանալի, թե ումից է դժգոհությունը»:

Հանրային Ռադիոյի տնօրեն Գարեգին Խումարյանի ընդվզման մասին մեր դիտարկմանն էլ արձագանքելով՝ Վիգեն Հակոբյանը նկատեց, որ իր համար սպասելի էր նման ակցիան, և նրա այդ քայլը հնարավոր է կատալիզատոր դառնա որոշ սեգմենտների համար, որոնք, այնուամենայնիվ, գենետիկորեն այլ արժեհամակարգի կրող են:

Այս դժգոհությունները, ճաքերը կպայթե՞ն իշխանափոխությամբ՝ մեր վերջին հարցին ի պատասխան էլ՝ քաղտեխնոլոգը չբացառեց  ինչ-ինչ պրոցեսների մեկնարկը:

«Եթե համապատասխան դետոնատոր լինի, որն էլ ավելի կխորացնի այդ ճաքերը, կամ ընդհանրապես համակարգից կպոկի ինչ-որ մարդկանց, և եթե դա նաև համընկնի արտաքին որոշակի ֆակտորների հետ, կարող են ինչ-որ պրոցեսներ սկսվել»,- ամփոփեց Վիգեն Հակոբյանը: