Ադրբեջանում մարդիկ գնալով սկսել են հասկանալ իշխանությունների մանիպուլիացիաները. Սարգիս Ասատրյան

Ադրբեջանում տնտեսական ճգնաժամը գնալով խորանում է: Այն դարձել է հանրային դժգոհությունների և հանրահավաքների պատճառ:

Past.am-ը զրուցել է ադրբեջանագետ Սարգիս Ասատրյանի հետ և փորձել պարզել՝ որքա՞ն կսրվեն ընդդիմադիր տրամադրությունները և ի՞նչ քայլեր կձեռնարկեն իշխանոթյունները: Ասատրյանը մասնավորապես նշել է. «Չգիտեմ՝ դա լուրջ ընդդիմադիր տրամադրությունների սրման բերե՞լ է, թե՞ ոչ, համենայնդեպս, մենք տեսնում ենք, որ որոշակի բնակավայրերում ինչ-որ բողոքի ցույցեր են ընթանում վերջին օրերին: Սակայն չենք կարող խոսել համակարգված ընդդիմության գործողությունների մասին:

Ընդդիմությունն իր թե՛ մարդկային, թե՛ ֆինանսական, կազմակերպչական ու այլ ռեսուրսներով, ուժ չունի, որպեսզի կարողանա այդ բողոքավոր զանգվածին համախմբել և ուղղել դեպի կոնկրետ նպատակ:Մենք տեսնում ենք, որ սա կոնկրետ մարդկանց դժգոհությունն է, որը հետևանք է տնտեսական որոշակի խնդիրների, որոնք առկա են երկրում»:

Խոսելով այն մասին, թե ինչպես կանդրադառնա այս իրավիճակը սահմանային սրացումների վրա` մեր զրուցակիցն ասաց. «Սահմանային սրացումները, թերևս, ինչ-որ գործիք են դարձել, որի միջոցով ալիևյան վարչակարգը փորձում է շեղել ժողովրդի ուշադրությունը:

Ես կարող եմ ասել, որ սա էլ արդեն չի աշխատում, որովհետև մարդիկ արդեն սկսել են հասկանալ այս մանիպուլյացիոն գործընթացների ողջ էությունը, ըմբռնել են, թե որն է խնդիրը, որովհետև Ադրբեջանի զինված ուժերը մեծ կորուստներ են կրում և այդ կորուստները, որքան էլ ցանկանաս, հնարավոր չէ թաքցնել կամ վերագրել դժբախտ պատահարների:

Մարդկանց մոտ հարց է առաջանում՝ ինչո՞ւ չեն կարողանում հայերից տարածքներ հետ վերցնել, եթե անվերջ գովերգում են բանակն ու ալիևյան վարչակարգը: Այնուամենայնիվ, հասարակության մի լայն հատված դեռ ընկնում է այդ թակարդը, բայց գնալով քչանում է այդ զանգվածը»:

Լևոն Փանոսյան