Շարմազանովի համար անընդունելի է Բաղրամյան պողոտա այլ դրոշների մուտքը

Ազգային ժողովի փոխնախագահ Էդուարդ Շարմազանովն անընդունելի է համարում Բաղրամյան պողոտայում ընդդեմ էլեկտրաէներգիայի թանկացման բողոքի ակցիայի ընթացքում այլ երկրների դրոշներ ծածանելը: Ազգային ժողովում լրագրողների հետ զրույցում Շարմազանովն ընդգծեց, որ նկատել է, որ որոշ մարդիկ ակցիային եկել են այլ դրոշներով, ինչը ճիշտ չի համարում: ԱԺ փոխնախագահի խոսքով՝ ակցիայի ընթացքում պետք է բոլորի համար արժեք լինի և ծածանվի միայն հայկական դրոշը: «Ես նման դեպքերին կպատասխանեմ ժողովրդական ասացվածքով. «Ուրիշի սեղանին թամադայություն մի արա»: Մանավանդ՝ ուրիշի դրոշներով: Այդ սեղանն ունի իր թամադան. դրանք մեր ակտիվիստներն են, մեր քաղաքացիներն են: Եվ պետք չէ պատրաստի սեղանին, որը որոշակի հաջողության է հասել, գալ, այդ սեղանի դիրքը փոխել և ասել՝ այսօրվանից այս սեղանի թամադան ես եմ»,- «Արմենպրես»-ի հաղորդմամբ՝ նշեց Շարմազանովը:

Դիտարկմանը, թե ԱԻՄ առաջնորդ Պարույր Հայրիկյանը հուլիսի 2-ին Բաղրամյան պողոտա ԵՄ-ի դրոշով գնալը պարզաբանել է նրանով, որ հունիսի 23-ին ոստիկանության կողմից ցուցարարների նկատմամբ ոչ համարժեք ուժ կիրառելու հայցով երիտասարդները դիմել են Եվրոպական դատարան, Շարմազանովը պատասխանեց. «Դա ընկալումների և տեսակետների խնդիր է: Ես իրեն առողջություն եմ մաղթում, բայց իմ կարծիքը հետևյալն է. եթե կա բողոք, և այդ բողոքը խաղաղ է, ապաքաղաքական է, կարիք չկար այլ դրոշով խառնվել: Այստեղ խնդիրը ԵՄ-ն չէ, ՌԴ-ի դրոշով էլ գնար, Ուզբեկստանի, Ղազախստանի, դա ընդունելի չէ»:

Լրագրողներից մեկի դիտարկմանը, թե ԵՄ-ն արժեքային համակարգ է, մի պետության դրոշ չէ, որ ընդվզեին՝ Շարմազանովը պատասխանեց. «Հայաստանի Հանրապետության եռագույնն է իմ համար ամենամեծ արժեքային համակարգը: Կարծում եմ, նաև իր համար պետք է այդպես լինի, քանի որ երկար տարիներ պայքարել է Հայաստանի անկախության համար»:

Հուլիսի 2-ին ԱԻՆ առաջնորդ Պարույր Հայրիկյանն իր թիմի հետ Բաղրամյան պողոտա էր այցելել ԵՄ-ի դրոշներով: Դա ակնհայտորեն դուր չեկավ ցուցարարներին, ովքեր Հայրիկյանին հորդորեցին անմիջապես հեռացնել ԵՄ-ի դրոշները, ինչի արդյունքում նրանց միջև բանավեճ սկսվեց: Երկար բանավեճի արդյունքում Հայրիկյանը հեռացրեց ԵՄ-ի դրոշները: