«Տարեց կին է, ձեռք չտաք». ադրբեջանցիները Գոհարին փորձել են սպանել, բարձրաստիճան սպան չի թողել

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Պատերազմական իրավիճակով պայմանավորված, Ասկերանի շրջանի Վարդաձոր գյուղը սեպտեմբերի 20-ին տարհանվեց։ Գյուղացիներն ասում են, որ մարտական գործողություններն ավելի էին թեժանում, իսկ թիրախում խաղաղ բնակավայրն էր, բնակելի տները։ Լսելով, որ հարևան Սառնաղբյուրում անգամ զոհեր ու վիրավորներ կան, տարհանումը կազմակերպվեց անհապաղ։ 

82-ամյա Գոհար Սաֆարյանը մնաց Վարդաձորում։ «Մայրս բոլոր պատերազմների ժամանակ գյուղը չի լքել։ Առաջին պատերազմում էլ վերջինն է դուրս եկել, նույնիսկ մանկահասակ երեխային կապել է մեջքին, այնպես, որ երեխան չվնասվի, ու դուրս է բերել, թշնամին չի նկատել։ Այս պատերազմում էլ որքան համոզեցինք, չեկավ, ասում էր՝ «ես իմ ամուսնու գերեզմանը չեմ թողնի, դուրս գամ»: Չգիտեինք, որ ամբողջական հայաթափում է լինելու, մտածում էինք հետ՝ կգանք։ Ինքն ասում էր՝ «դուք գնացեք, ես մինչև մահ պիտի նայեմ ամուսնուս գերեզմանին»»,- MediaHub-ի հետ զրույցում պատմում է Գոհարի որդին՝ Արամը։ 

Ստեփանակերտում իմանալով Արցախը վերջնականապես լքելու մասին՝ Արամը դիմել է փրկարարներին։ Հայաթափված Վարդաձորում տարեց կինը միայնակ մնացել է 4 օր։ Կրակի դադարից հետո զբաղվել է իր առօրյա գործերով՝ մտածելով, որ համագյուղացիները շուտով կվերադառնան։ Գնացել է գյուղի աղբյուր ջուր բերելու։ Արամի խոսքով՝ հենց այնտեղ էլ ադրբեջանցիները նկատել են Գոհարին։ 

«Նրանցից 2-ը բռնել են մորս ու փորձել են սպանել, սակայն 3-րդը, մորս ասելով, բարձրաստիաճան սպա էր ու չի թողել, ասելով՝ «միայնակ տարեց կին է, ձեռք չտաք, հերոս է, որ համարձակվել է միայնակ մնալ»։ Մամաս տուն է եկել, միացրել վառարանը, զբաղվել իր առօրյա գործերով»,- ասում է մեր զրուցակիցը:

Գոհար Սաֆարյանը 3 որդի է լույս աշխարհ բերել։ Արամն ասում է, որ Բաքվում ապրելու տարիներին եղբայրներից մեկը դարձել է դժբախտ պատահարի՝ վրաերթի զոհ։ Տղաներից մեկն ապրում է Ռուսաստանում, որտեղ բռնի տեղահանությունից հետո ապաստանել է և մեր հերոսուհին։ 

«Սեպտեմբերի 24-ին փրկարարները գնացել են մեր ու հարևան գյուղեր, այնտեղից դիեր տեղափոխել Ստեփանակերտ։ Փրկարար ծառայության ղեկավար Մեխակ Արզումանյանն էլ նույն մեքենայով տարհանել է մորս։ Նա տանն է եղել»։ 

Գոհար Սաֆարյանը տեղափոխվել է Ստեփանակերտ։ Համայնքի ղեկավարը նրան հանդիպել է 7-րդ դպրոցում։ Գոհարը Սամվել Սառաջյանին խնդրել է, որ եթե հնարավորություն լինի հետ գնալու, ապա իր տունը լավ պահեն, չթողեն, որ վնասեն։ 

Լուսանկարում՝ Գոհար Սաֆարյանն է ՌԴ-ում բնակվող որդու հետ:

Հունան Թադևոսյան