Պայքարը շարունակվում է. այս առողջ, խիզախ երիտասարդությունը չի նահանջելու. Դավիթ Սանասարյան

Ինչպես տեղեկացնում է Past.am-ի թղթակիցը՝ այսօր Երևանի կենտրոնը, համեմատած վերջին 2-3 օրերին, բազմամարդ է: Ո՛չ թալանին խմբից հետո, նոր իրազեկման խումբ է կազմվել, որը զբաղվում է այս օրերի շարժումներով:

Իրազեկման խմբի անդամ Դավիթ Սանասարյանը նշում է.

-Ցանկացած հասուն քաղաքացու համար ակնհայտ է, որ կարելի է հասնել հաջողության՝ բացառապես ուժ ներկայացնելով: Այսօրվա նպատակն է, ցույց տալ քաղաքացիներին, որ պայքարը շարունակվում է, այս առողջ, խիզախ երիտասարդությունը չի նահանջելու և իր ուժերի չափով ամեն ինչ անելու է, որ հասնենք հաջողության, իսկ էդ հաջողությունը առաջին հերթին իշխանության պատասխանատվության հարցը լուծելն է, որ պետք է պատասխանատու լինեն իրենց արած ցանկացած քայլի համար, երկրորդը, որ պետք է էլեկտրաէներգիայի թանկացումը կասեցնեն և նաև վերանայեն նախորդ տարվա բարձրացումը:

Քաղաքացիները հասկանում են, որ այն, ինչ Սերժ Սարգսյանի կողմից հայտարարվել է, պետք չէ ուրախանալ, մտածել, որ մենք ունենք էն, ինչի համար պայքարել ենք: Ոչ, մենք ընդամենը ցույց ենք տվել, որ կարող ենք պայքարել: Ես չեմ ուզում շատ էդ պառակտում բառն օգտագործել, տարբեր մոտեցումներ կան:

Հիմա շնորհակալություն բոլորին, որ թողնում են մի կողմ ցանկացած խնդիր և միավորվում են մեկ հարցի շուրջ: Մենք չենք ուզում ցույց տալ, որ մեկս մյուսից խելացի ենք, այլ ուզում ենք իշխանություններին ցույց տալ, որ մենք ենք տերը: Դրա համար պետք է շարունակել, ու բոլորին ասենք, որ այսուհետ չի կարելի մեզ հետ խաղ խաղալ:

Շատ բազմաշերտ զանգված էր հավաքված, և ամեն մեկը նախագահի հայտարարությունից հետո գտավ իրեն հարմար մի բան, բայց ես կարծում եմ, որ մեծամասնությունը ոչ թե բավարարվեց Սերժ Սարգսյանի հայտարարությամբ ու ասաց՝ դա հաղթանակ է, այլ իշխանության կողմից կային մարդիկ, որ մասնակցում էին ցույցին, գովում էին, ասում էին՝ շատ լավ է ամեն ինչ, շատ լավ երիտասարդություն ունենք ու մեկ էլ իշխանության ձեռնտու ուղղության դեմ կանգնողներին ուղղակի անվանեցին ճակատագրապաշտներ, ցույց տվեցին, իբր շարժումը մարում է, բայց մենք վերաթարմացման փուլում ենք:

Հեշտ չէ շարժումից հետո նորից բարձունք ապահովելը, բայց մենք չենք հուսահատվում և շարունակում ենք մեր պայքարը: Որոշեցինք, որ Հյուսիսային պողոտայով, Ամիրյանով կգնանք, Մաշտոցի պողոտայով կթեքվենք դեպի Բաղրամյան՝ բարիկադներ: 

Արուսիկ Տիգրանյան