«Երբեք չեմ խուսափել բարդ վիրահատություններից». Վիկտոր Ֆանարջյանը շարունակում է բժշկական տոհմի ավանդույթները

Վիկտորը Ֆանարջյանների բժշկական տոհմի չորրորդ սերնդի ներկայացուցիչն է: Նրա պապիկի հայրը՝ ակադեմիկոս Բարդուղիմեոս Ֆանարջյանը, ուռուցքաբանության ինստիտուտի հիմնադիրն է, պապիկը՝ ակադեմիկոս Վիկտոր Ֆանարջյանը, երկար տարիներ աշխատել է Ֆիզիլոգիայի ինստիտուտում, 30 տարուց ավելի եղել է ինստիտուտի տնօրենը և մոտ 12 տարի՝ ԳԱԱ փոխնախագահ: Հայրը՝ պրոֆեսոր Ռուբեն Ֆանարջյանը, նյարդավիրաբուժության ամբիոնի հիմնադիրն է և վարիչը: Պատահական չէ, որ Վիկտոր Ֆանարջյանը ևս ընտրել է  բժշկության ուղին:

2002 թ.-ին Երևանի Պուշկինի անվան դպրոցն ավարտելուց հետո ընդունվել է Մխիթար Հերացու անվան Երևանի պետական բժշկական համալսարան, որն ավարտել է 2009 թ.-ին:

2009-2012 թթ. սովորել Առողջապահության ազգային ինստիտուտի կլինիկական օրդինատուրայում՝ Ուռոլոգիա մասնագիտությամբ: Կլինիկական օրդինատուրային զուգահեռ Վիկտորը նաև աշխատանքային գործունեություն է ծավալել: 2002-2003 թթ.-ին աշխատել է «Էրեբունի» բժշկական կենտրոնի շտապ օգնության ծարայությունում,

2005-2006 թթ.՝ «Միքայելյան» վիրաբուժության ինստիտուտում որպես սանիտար, 

2009-2013 թթ. «Միքայելյան» վիրաբուժության ինստիտուտում,

2012-2013 թթ․ Համատեղության սկզբունքով Եղվարդի «Նաիրիի» ԲԿ֊ում։

2013-2019 թթ. «Էրեբունի» և 2014-2019 թթ. «Նաիրի» բժշկական կենտրոններում՝ որպես ուռոլոգ: 2017 թ.-ին պաշտպանել է թեկնածուական թեզը: Հեղինակ է բազմաթիվ բժշկական հոդվածների։

2009 թ․ առ այսօր ― Հայկական և Եվրոպական ուռոլոգիագան ասոցիացիաների անդամ։  Ընդհանուր առմամբ, Վիկտորն ունի ավելի քան տասը տարվա աշխատանքային և վիրաբուժական փորձ:

«Սովորելուն զուգահեռ աշխատել, աշխատելուն զուգահեռ սովորել, սա սկզբունքի պես է ինձ համար, քանի որ մշտապես ինքնակրթվելու կարիք կա: Աշխարհի արագ զարգացող տենդենցները պահանջում են, որ անընդհատ իրազեկ լինես բոլոր նորություններին»,-Past.am-ի հետ զրույցում ասում է բ․գ․թ․ Վիկտոր Ֆանարջյանը:

Վիկտորն ամեն բարդություն, դժվարություն կամ խնդիր համարում է կյանքի ինչ-որ մի փուլ, որը պետք է արժանապատիվ հաղթահարել: Ցանկացած դժվարության միջով անցնել այն մտքով, որ դա ընթացիկ խնդիր է, որը պետք է հաղթահարել, մշտապես հիշելով, որ բժիշկ լինելն առաքելություն է, որն էլ իր հերթին տալիս է վստահություն:
«Մարդը մեխանիզմ չէ և վիրաբույժի համար ցանկացած ոչ ճիշտ շարժում կարող է լինել ճակատագրական: Վիրաբուժությունը մեծ արվեստ և արհեստ է, որին պետք է կարողանաս տիրապետել»,-հավելում է նա:

Բժշկի աշխատանքային պրակտիկայում եղել են վիրահատություններ, որոնք տվյալ ժամանակահատվածի դրությամբ առաջին անգամ հենց նա է կատարել ՀՀ֊ում: Խոսքը միզաքարային հիվանդության, աշխարհում առկա տարբեր վիրաբուժական մեթոդների մասին է: Կատարված վիրահատությունների մանրամասներն արձանագրված են «Էրեբունի» բժշկական կենտրոնի պաշտոնական կայքում:

«Վիրաբույժը կրիտիկական պահերին պետք է կարողանա արագ կողմնորոշվել, թե որ օպտիմալ լուծումն ընտրի, որպեսզի խուսափի բարդություններից։ Երբեք չեմ խուսափել բարդ վիրահատություններից, «չէ» բառը չի եղել, եթե, իհարկե, նժարին չենք դնում ակնկալվող արդյունքը և սպասվող բարդությունները: Նման բարդ վիրահատությունները բժշկին թույլ են տալիս փորձառություն ձեռք բերել, վստահություն, պացիենտի կարիքը հոգալու կարողություն»:

Պացիենտին չմերժելու այս հատկությունը Վիկտորը իր մեջ բացահայտել է դեռևս կլինիկական օրդինատուրայում սովորելու տարիներին: Իսկ վստահության հիմքում իհարկե կրթությունն է, ինչին նպաստել է արտերկրում ամիսներ տևող վերապատրաստումներին ձեռք բերված փորձը, միջազգային կոնֆերանսներին մասնակցությունը,  և իհարկե, աշխատանքային փորձը, որը ձեռք է բերել «Էրեբունի» բժշկական կենտրոնում աշխատելու տարիներին:

Վիկտոր Ֆանարջյանի նպատակն է հիմնել աշխարհի առաջատար կենտրոններին համապատասխան բուժհաստատություն և կրթական կենտրոն, որտեղ առաջնահերթություն կտրվի  խոցելի, սոցիալապես անապահով խավի ներկայացուցիչներին,  բուժօգնությունը կլինի բացառապես անվճար և միջազգային ստանդարտներին համապատասխան: Միևնույն ժամանակ, կենտրոնում կրթություն կստանան արտասահմանցիները: Բժիշկը նշում է՝ չնայած այն հանգամանքին, որ Հայաստանում գործում են բժշկական ապահովագրություն, սոցիալական փաթեթներ և պետական ծրագրեր, սակայն բուժառուն ինչ-որ մի փուլում բախվում է տարաբնույթ խնդիրների և արդյունքում մեծ հաշվով անվճար բուժօգնություն չի ստանում:

«Իրադարձությունների բերումով, շուտով բնակություն պետք է հաստատեմ Միացյալ Նահանգներում»:

Վիկտորը վստահ է՝ արտերկրում ձեռք բերված միջազգային փորձառությունը մի օր կներդնի առողջապահական համակարգում, թողնելով իր հետքն բժշկագիտության մեջ այնպես, ինչպես տարիներ ի վեր թողել է Ֆանարջյանների դինաստիան: