Նիկոլը՝ քաղաքական ուժերին. «Հրաժարվե´ք ՌԴ-ի, Եվրոպայի կամ ԱՄՆ-ի պրոտեժե ներկայանալու փորձերից»

ԱԺ պատգամավոր, «Քաղաքացիական պայմանագիր» կուսակցության վարչության անդամ Նիկոլ Փաշինյանը Հայաստան-ԵՄ Միջխորհրդարանական համագործակցության հանձնաժողովի 16-րդ նիստում, որը մեկնարկել է երեկ, ելույթ է ունեցել: Ինչպես տեղեկանում ենք Armtimes.com կայքից, պատգամավորն իր ելույթի առաջին մասում անդրադարձել է դեկտեմբերի 6-ին Հայաստանում տեղի ունեցած Սահմանադրական փոփոխությունների հանրաքվեին եւ համապետական նշանակության ընտրություններին: Նա նկատել է, որ տեղի ունեցած բոլոր ընտրություններում տվյալ պահին գործող իշխանության անվերջանալի հաղթանակներն են, որ քաղաքացիների շրջանում ամրագրում են տեսակետ, թե ընտրությունները Հայաստանում տեղի են ունենում ոչ թե իշխանություն ձևավորելու, այլ ձևավորված իշխանության վերարտադրությունն ապահովելու համար։ Փաշինյանը խոսել է վարչական լծակների օգտագործման, ընտրողների կամքի վրա ապօրինի ազդեցությունների, ընտրակաշառքների, լցոնումների ու կեղծումների մասին բազմաթիվ վկայությունների մասին:

«Այս ամենը շատերին է դրդում ասելու, թե Հայաստանում իշխանության փոփոխություն հնարավոր է միայն ոչ ընտրական, այսինքն՝ քաղաքացիական ընդվզման, անհնազանդության, հեղափոխական, ընդհուպ ապստամբության տարբերակով։ Բայց փաստն այն է, որ Հայաստանի երրորդ հանրապետության պատմության ընթացքում տեղ գտած նմանօրինակ փորձերը, միտումները նույնպես, լավագույն դեպքում ավարտվել են ոչնչով, վատագույն դեպքում՝ հետապնդումներով, քաղաքացիների խոշտանգումներով եւ սպանություններով, ընդդիմության ներկայացուցիչների դատավարություններով, բանտարկություններով»,-նշել է Նիկոլ Փաշինյանը:

Նա անդրադարձել է ընդդիմադիր ակտիվիստներ Հայկ Կյուրեղյանի եւ Գևորգ Սաֆարյանի՝ բանտում պահման պայմանների մասին պտտվող տագնապալի լուրերին՝ նշելով, որ Երևանի քաղաքապետարանի պաշտոնյա Զավեն Միրիջանյանը, որը ընդդիմության ներկայացուցչին կաշառելու փորձ էր արել, դատարանի դահլիճից ազատ է արձակվել։ Նիկոլ Փաշինյանը ներկայացրել է «Քաղաքացիական պայմանագիր» կուսակցության եզրակացությունն այն մասին, որ գործող իշխանության վերարտադրության լճացնող պրոցեսին վերջ դնելու համար հարկավոր է իրագործել երկու պայման.

1. Պետք է լինի ընդդիմադիր քաղաքական ուժ, որը ստանա ժողովրդի վստահության քվեն, այսինքն՝ քվեարկությանը մասնակցած ընտրողների ձայների 50+1 տոկոսը։

2. Պետք է ընդդիմադիր այդ ուժը կարողանա լրջորեն հակազդել ընտրակեղծիքներին, ֆիքսել, պահել իրեն տրված ձայները եւ կարողանա հրապարակայնորեն ապացուցել, որ ինքը ստացել է ժողովրդի վստահության քվեն:

«Ինձ համար ակնհայտ է, որ, առանց այս երկու կետերի ապահովման, ժողովրդավարական իշխանափոխությունը գործնականում անհնար է, որովհետեւ ՀՀ սահմանադրության` փոփոխման ոչ ենթակա հոդվածում ասվում է, որ իշխանությունը պատկանում է ժողովրդին, ժողովուրդն իր իշխանությունն իրականացնում է ազատ ընտրությունների միջոցով: Եւ ուրեմն՝ երկրում իշխանության միակ աղբյուրը ժողովրդի քվեն է: Ինչ հետագա գործողություններ էլ ձեռնարկելու անհրաժեշտություն առաջանա, այդ գործողությունների լեգիտիմության միակ աղբյուրը կարող է լինել ժողովրդի քվեն, ժողովրդի մանդատը, որը ստանալու միակ միջոցը ընտրություններն են»,- իր խոսքում նշել է Նիկոլ Փաշինյանը:

Նրա խոսքով՝ Հայաստանում ժողովրդավարություն չկա: Եվ քանի դեռ հայաստանյան որեւէ ընտրությունների պաշտոնական արդյունքներով ընդդիմությունը չի հաղթել, ժողովրդավարության մասին խոսելն ավելորդ է: Մյուս կողմից, ըստ պատգամավորի, դա բացառապես Հայաստանի լուծելու խնդիրն է:

«Այս իմաստով պակաս կարեւոր չեմ համարում, որ հայաստանյան քաղաքական կյանքի դերակատարները հրաժարվեն որպես Ռուսաստանի կամ Եվրոպայի կամ ԱՄՆ-ի հայաստանյան պրոտեժե ներկայանալու եւ աշխարհաքաղաքական այդ կենտրոնների շահերը Հայաստանի ներքաղաքական կյանքի գործոն դարձնելու բոլոր փորձերից: Հայաստանում ժողովրդավարության աղբյուրը Հայաստանի ժողովրդի ինքնիշխանությունն է եւ Հայաստանին հարկավոր է այնպիսի ժողովրդավարություն, որն ուժեղացնում է Հայաստանի եւ հայ ժողովրդի ինքնիշխանությունը եւ տեղի է ունենում հանուն եւ ոչ թե ի հեճուկս այդ ինքնիշխանության»,- իր ելույթն ամփոփել է Նիկոլ Փաշինյանը:

Գագիկ Աղբալյան