Քննարկվում է Գյումրու կենդանաբանական այգու առյուծներին արգելավայր տեղափոխելու հարցը

 Գյումրու կենդանաբանական այգու արջերը կտեղափոխվեն Ռումինիա: Ինչպես հաղորդում է «Արմենպրես»-ը, այս մասին լրագրողների հետ հանդիպմանը նշեց «Փրկենք Գյումրու կենդանաբանական այգու կենդանիներին» նախաձեռնության ղեկավար, բնապահպան Սիլվա Ադամյանը:

«Գյումրու կենդանաբանական այգու կենդանիների խնդիրը բարձրաձայնվեց դեռ մեկ տարի առաջ: Միգուցե մեր մեղավորությունն էլ կար, որ անուշադրության մատնվեց խնդիրը և հետևողական չեղանք: Մենք հանդիպեցինք կենդանաբանական այգու տնօրենի հետ և առաջարկեցինք մեր օգնությունը: Ստեղծվեց «Փրկենք Գյումրու կենդանաբանական այգու կենդանիներին» նախաձեռնությունը, որը խնդիրը բարձրաձայնեց տարբեր ատյաններում: Ասեմ, որ այն շատ մեծ արձագանք գտավ, արձագանքում էին այնպիսի մարդիկ, կազմակերպություններ, որոնք մեզ համար անսպասելի էր»,-ասաց Սիլվա Ադամյանը: Տարբեր երկրներից ստացված այդ արձագանքի  շնորհիվ այսօր արջերի խնդիրը լուծվում է: 

ՀՀ բնապահպանության նախարարության կենդանական ռեսուրսների կառավարման բաժնի պետ Սեւակ Բալոյանը տեղեկացրեց, որ Բնապահպանության նախարարության կողմից արդեն տրվել են երկու արջերի Հայաստանից դուրս բերելու թույլտվությունները:  Այսօր «Վայրի բնության և մշակութային արժեքների պահպանության հիմնադրամ»-ը Գյումրուց արջերին կտեղափոխի Երևանի կենդանաբանական այգի:

«Այնտեղ կիրականացվեն համապատասխան բուժզննման աշխատանքներ: Դրանից հետո նոր կկազմակերպվի արջերին Ռումինա տեղափոխելու գործընթացը: Կոնկրետ ժամկետ դեռ չեմ կարող նշել»,-ասաց Սևակ Բալոյանը:

Սիլվիա Ադամյանը տեղեկացրեց, որ Երևանի կենդանաբանական այգու տնօրինությունը չի կարող արջերին իր մոտ պահել, որովհետև տարածք չունի: Համապատասխան պայմաններ չկան: Ինչ վերաբերում է Գյումրու կենդանաբանական այգում գտնվող առյուծներին, ապա Սիլվա Ադամյանը նշեց, որ արդեն տարբեր առաջարկներ կան: Մասնավորապես, տարբեր երկրներից կա առաջարկ նրանց արգելավայր տեղափոխելու մասին: Կոնկրետ պայմանների մասին տեղեկություն ստանալուց հետո Բնապահպանության նախարարության հետ կկազմակերպվեն քննարկումներ:  

Լրագրողների այն հարցին, թե արդյո՞ք կլինեն մարդիկ, ովքեր պատասխանատվության կենթարկվեն կենդանիներին նման վիճակի հասցնելու համար, Բնապահպանության նախարարության կենդանական ռեսուրսների կառավարման բաժնի պետ Սեւակ Բալոյանը նշեց, որ օրենսդրական բաց կա: «Կենդանական աշխարհի մասին» ՀՀ օրենքով, սահմանված է վայրի կենդանիներին անազատ, կիսազատ պահելու կարգը, սակայն դրանից պետք է բխի Վարչական իրավախախտումների մասին օրենքում համապատասխան դրույթ, որը բացակայում է: Ստեղծված աշխատանային խումբը վեր կհանի առկա բացերը և լուծումներ կառաջարկի&raquo ;,-հավելեց նախարարության ներկայացուցիչը: