Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Արցախի երեխաները պետք է երգեն։ Ստեղծված իրավիճակը, փոխված հասցեները չպետք է երեխաների մեջ սպանեն երգելու տաղանդը»,- MediaHub-ի հետ զրույցում ասում է լիբանանահայ երաժիշտ Զաքար Քեշիշյանը։ 

1992 թվականին՝ Շուշիի ազատագրումից անմիջապես հետո բերդաքաղաքում նրա նախաձեռնությամբ ստեղծվեց «Վարանդա» մանկապատանեկան երգչախումբը։ Լինելով երգչախմբի գեղարվեստական ղեկավարն ու հիմնադիրը՝ Զաքար Քեշիշյանը կնոջ՝ դաշնակահար և բանաստեղծուհի Կամիլա Երկանյան-Քեշիշյանի հետ իրենց շուրջը հավաքեցին Շուշիում բնակվող տաղանդավոր բազմաթիվ երեխաների։

«Երգչախումբը ցրվեց, սակայն, Շուշիի անկումից հետո։ Սակայն, դա ևս մեզ չընկրկեց։ Իհարկե՛ ցավալի բան էր։ Ես Լիբանանից  տեղափոխվեցի Ստեփանակերտ ու մշակույթի նախարարության հետ ստեղծեցինք «Երգող Արցախ» նախագիծը։ Քանի որ շուշեցիների մի մասը դուրս էր եկել երկրից, ցրված էին, 2 հաջորդական ամառների ընթացքում Արցախում մնացած շուշեցիների հետ խմբում ընդգրկեցինք նաև Հադրութի, Ստեփանակերտի և մյուս համայնքների երեխաներին, հանդես եկանք մի քանի համերգային ծրագրերով»,- ասաց Քեշիշյանը։

Արդեն, մեկ շաբաթ է, արցախցի երեխաների սիրելի Զաքարը Երևանում է։ Եկել է «Վարանդա» երգչախմբի հիմքի վրա ստեղծված «Երգող Արցախ» պրոեկտը շարունակելու, որ անկախ ամեն ինչից՝ երեխաները շարունակեն երգել։

«ՀՀ երաժշտական ընկերությունը մեզ տրամադրեց իրենց դահլիճը։ Կարճ ժամանակում մեր շուրջը հավաքեցինք Մասիսում, Աբովյանում և Երևանում ապրող տաղանդավոր 80 երեխայի, որոնք ժամանակին երգել էին կամ «Վարանդայում», կամ «Երգող Արցախում»։ Պարապում ենք երկուշաբթի, երեքշաբթի, հինգշաբթի և ուրբաթ օրերին։ Կազմակերպչական թիմը մեծ չէ, փոխարենը կատարված աշխատանքն է կարևոր»,- ընդգծեց մեր զրուցակիցը։

Բացի երգեր սովորելուց, երգչախմբի մասնակիցները ծրագրով այցելում են թանգարաններ, թատերական ներկայացումներ ու տարբեր համերգներ։ «Երգող Արցախում» դասավանդում են նաև արվեստի դաստիարակչություն։ Օգոստոսի վերջին Զաքար Քեշիշյանի խումբը պատրաստվում է Երևանում կայանալիք առաջին համերգին։