«Տաքսու մեջ միշտ սցենար եմ մտածում». Ռուբեն Եսայանը՝ նոր գրքի, լավ ընտանիք ունենալու երազանքի, Էլեն Սաֆարյանի հետ «սիրավեպի» և պարելուց ամաչելու մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ռուբեն Եսայանի առաջին՝ «Թունելից 13 կմ հեռավորության վրա» գրքի հիման վրա նկարահանվող ֆիլմը պատրաստ կլինի 2025 թ-ի 2-րդ կեսին, իսկ 2-րդ՝ «Վանականներն ունեն գաղտնիք» գրքի էկրանվորում կլինի թե ոչ՝ կախված է առաջինի հաջողությունից:

Վերջին 2 տարում ամենավաճառված գրքերի հեղինակ Ռուբեն Եսայանի հաջորդ գիրքը լույս կտեսնի 2025թ-ի 1-ին կեսին. «գիրքն արդեն գրում եմ, այն առաջին գրքիս շարունակությունն է»:

Tert.am Life-ի բլից հարցերին այս անգամ պատասխանել է երիտասարդ գրող, վիդեո բլոգեր Ռուբեն Եսայանը:

-Սկզբունք, որին երբեք չեք դավաճանի:

-Զբաղվել այնպիսի գործով, որը չեմ սիրում:

-Ի՞նչ կփոխեիք Ձեր արտաքինի մեջ:

-Մազերս է մի քիչ սպիտակել, կսևացնեի:

-Ձեր բնավորության ո՞ր գիծը կփոխեիք հնարավորության դեպքում:

-Շտապելը, չնայած դա երբեմն օգնում է:

-Հաջողության հասնելու համար ի՞նչն է առանցքային. աշխատասիրությո՞ւն, ծանո՞թ, խե՞լք:

-Անպայման պետք է զբաղվել այն գործով, որը սիրում ես:

-Տաքսու մեջ հնչող վատ երաժշտությունը խնդրում եք անջատե՞լ, թե՞ ստիպված լսում եք:

-Տաքսու մեջ միշտ սցենար եմ մտածում, ու ինչ-որ բան չի խանգարում, ես կարողանում եմ աղմուկի մեջ կենտրոնանալ:

-Ինչի՞ մասին եք երազում:

-Լավ ընտանիք ունենալու:

-Իսկ ի՞նչ տիպի մարդկանց հետ ընդհանրապես չեք շփվի:

-Գուցե շաբլոն հնչի, բայց որոնք անկեղծ չեն:

-Ի՞նչ փոխեց Ձեր կյանքում հայտնիությունը:

-Մեծ հաշվով՝ հնարավորություններ տվեց, իսկ փոքր հաշվով՝ երբեմն սահմանափակում է հանրային վայրերում դրսևորվելու համար:

-Ամենամեծ սուտը, որ լսել եք Ձեր մասին:

-Որ գրքերս գրվել է արհեստական բանականությամբ:

-Ամաչկո՞տ եք: Ի՞նչ իրավիճակ պիտի լինի, որ ամաչեք:

-Ժամանակին ավելի ամաչկոտ էի, բայց հանրային գործունեությամբ զբաղվելը մեծ մասամբ դա վերացրեց: Բայց ամենաշատը ամաչում եմ պարելուց, որովհետև չեմ կարողանում:

-Վատ մեկնաբանություններին ինչպե՞ս եք արձագանքում:

-Ժամանակին շատ էմոցիոնալ, բայց հիմա, որոնք անառողջ են, բացարձակ ուշադրություն չեմ դարձնում, իսկ առողջ քննադատությունները շատ կարևոր են:

-Երևանում Ձեր ամենասիրելի հատվածը ո՞րն է:

-«Մոսկվա» կինոթատրոնի հատվածը:

-Էլեն Սաֆարյանի և Ձեր «սիրավեպի» մասին խոսակցություններին ինչպե՞ս կարձագանքեք:

-Վստահաբար, կասեմ, որ նման բան չկա: