«Ոչ թալանին»-ը` Գյումրիում

Երեկ, հուլիսի 4-ին, ժ․ 18:00-ին, Գյումրու Թատերական հրապարակը լի էր մարդկանցով:

Էլեկտրաէներգիայի սակագնի թանկացման դեմ ուղղված պայքարի նախաձեռնող «Ոչ թալանին» խումբը գնացել էր Գյումրի՝ հանրային քննարկում անցկացնելու և սկսելու մարզային հանդիպումները:

Նախաձեռնող խմբի անդամ Միհր Ավագյանը Past.am˗ի հետ զրույցում նշեց. 

-Գյումրու Թատերական հրապարակում հանրային քննարկում անցկացրեցինք: Ամփոփեցինք անցած քայլերը, նոր քայլերի մասին խոսեցինք, լսեցինք կարծիքներ: Ժողովուրդը շատ լավ դիմավորեց, դժգոհ չենք, շատ լավ վերաբերմունք ցույց տվեցին:

-Որո՞նք էին քննարկված հետագա քայլերը:

-Մեր հետագա քայլերը լինելու են հետևյալը. փորձելու ենք մասնագիտական խումբ ձևավորել, որը կմասնակցի աուդիտին: Կշարունակվեն մարզային հանդիպումներն ու հանրային քննարկումները:

Փողոցային պայքարը աչքաթող չենք անելու, ամեն պահի պատրաստ ենք լինելու դուրս գալ փողոց: Գյումրեցիներին կոչ արեցինք, որ պատրաստ լինեն, եթե աուդիտը չտա ցանկալի արդյունք, պետք է մոբիլիզացվել Երևանում ու սկսել ավելի լայն ճնշումներ:

-Գյումրեցիները բազմամա՞րդ էին, և կա՞յին արդյոք դժգոհություններ:

-Մի քանի հարյուր մարդ կային, հստակ թիվ չեմ կարող ասել : Դժգոհող եղավ մի մարդ, ով ճիշտ չէր հասկացել նախաձեռնող խմբի մի հատվածի տեղափոխվելն Ազատության հրապարակ, սակայն զրույցից հետո մոտեցավ բարձրախոսին ու ասաց, որ կարծիքը փոխել է:

Արուսիկ Տիգրանյան