Ունիվերսալ սանրվածք, որն ունի երկրպագուների հսկայական բանակ արդեն հարյուր տարուց ավելի. «Փաստ»

«Փաստ» օրաթերթը գրում է.

Ցավոք, կան տղամարդիկ, որոնք սովոր չեն պատշաճ ուշադրություն դարձնել իրենց արտաքինին, այդ թվում՝ մազերի վիճակին։ Մաքուր մազեր, և վերջ: Բայց լավ սանրվածքը լրացնում է ոչ միայն գեղեցիկ տիկնանց կերպարը: Յուրաքանչյուր իրեն հարգող տղամարդ նույնպես չի կարող յոլա գնալ առանց ոճային սանրվածքի։ Իսկ եթե դրա համար ժամանակ կամ ցանկություն չկա, ապա կարելի է ընտրել սանրվածք, որը կլուծի միանգամից մի քանի խնդիր։ Այն կլինի ժամանակակից, մոդայիկ և, միևնույն ժամանակ, չի պահանջի հատուկ խնամք և ջանքեր։ Բոքս սանրվածքը հենց այդպիսին է: Այն դասական պահպանողական սանրվածք է՝ կարճ կտրած մազեր, կոկիկ քունքային և գլխի հետին մասեր: Այն իր կրողի կերպարին հաղորդում է գրավչություն, առնականություն և բրուտալություն:

Ընդգծում է հաջողակ մարդու էլեգանտ ոճը, որը վստահ է իր և իր կարողությունների վրա։ Իսկ ինչպե՞ս է առաջացել բոքս սանրվածքը: Դա թվագրվում է անցյալ դարով։ Սկզբում բոքս սանրվածք կրում էին միայն համանուն սպորտի՝ բռնցքամարտի պրոֆեսիոնալներն ու սիրահարները: Այդ փաստը կարելի է բացատրել նրանով, որ այդ սանրվածքով նախատեսված մազերի երկարությունը 3-4 սմից ոչ ավելի է, ինչը շատ հարմար է բռնցքամարտիկի համար՝ ինտենսիվ մարզումների և մենամարտերի ժամանակ, մազերը չեն շեղում մարտից և չեն փակում աչքերը։ Հետագայում ուրիշներն էլ են գնահատել նման սանրվածքի հարմարավետությունը։ Սանրվածքը գրավել է միլիոնավոր տղամարդկանց ամբողջ աշխարհով մեկ: Այժմ տղամարդիկ հաջողությամբ համադրում են այն թե՛ գործնական տեսքի, թե՛ առօրյա ոճի հետ։ Հայտնի մարդկանց շրջանում ևս կան բոքս սանրվածքի սիրահարներ։

Օրինակ՝ ամերիկացի դերասան Բրեդ Փիթը, անգլիացի ֆուտբոլիստ Դեյվիդ Բեքհեմը, իռլանդացի կինոդերասան Քոլին Ֆարելին, ամերիկացի երգիչ Ջասթին Թիմբերլեյքը, դերասան Ուենթվորթ Միլլերը և շատ այլ աստղեր։ Ըստ երևույթին, տղամարդկանց բոքս սանրվածքը երբեք դուրս չի գա նորաձևությունից: Այդ ունիվերսալ սանրվածքն ունի իր երկրպագուների հսկայական բանակն արդեն հարյուր տարուց էլ ավելի: Որպես կանոն, այն ընտրում են պահպանողականները, ովքեր ամեն ինչում նախընտրում են հակիրճությունն ու զսպվածությունը։ Այն միշտ մազերը դարձնում է կոկիկ և խնամված: Սանրվածքը ոճավորում կամ այլ խնամք չի պահանջում անգամ լվանալուց հետո: Սանրվածքում գլխի գագաթային հատվածում մազերը ավելի երկար են լինում, որի շնորհիվ սանրվածքը վիզուալ առումով դեմքը ավելի կլոր չի դարձնում։ Սանրվածքը հնարավորինս բացահայտում է իր տիրոջ դեմքը՝ ուշադրությունը կենտրոնացնելով աչքերի և շուրթերի դիմագծերի վրա։

Բացի դա, մարդիկ կարող են ինքնուրույն ստանալ այդ սանրվածքը տանը, եթե ունեն վարսահարդարման գործիք օգտագործելու հիմնական հմտություններ: Ցանկացած տարիքի տղամարդ կարող է իրեն թույլ տալ այս ոճը՝ մեկ տարեկան երեխայից մինչև ալեհեր պապիկ: Ավելորդ մանրամասների բացակայությունը և մազերի կարճությունը տղամարդու արտաքին տեսքին հաղորդում են շքեղություն, փայլ և յուրահատկություն։ Իսկ ո՞վ պետք է խուսափի բոքս սանրվածքից: Սանրվածքի ստորին հատվածը ընտրելիս պետք է զգույշ լինել, քանի որ ինչքան կարճ լինեն գլխի հետևի մազերը, այնքան ավելի հստակ կերևան գլխի սպիները, բշտիկները և անհարթությունները, եթե դրանք առկա են։ Այս սանրվածքից պետք է խուսափեն նաև շատ գեր մարդիկ, քանի որ կարճ մազերը «կոտրում» են կազմվածքը, նրանք, ըստ էության, ավելի գեր են երևում։

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում