Իրանը հակահարված կհասցնի՞ Իսրայելին. մեկնաբանում է իրանագետը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Եթե Իսրայելը ցանկանար, կարող էր գոնե փորձ կատարել ավելի լուրջ վնաս հասցնելու Իրանին, սակայն ակնհայտ է, որ փորձ էլ չի կատարվել, քանի որ հիմնականում հեռահար հրթիռներ են օգտագործվել։ Սա ցույց է տալիս, որ գործողություն անելու լուրջ տրամադրվածություն չի եղել»։ Այս մասին այսօր՝ հոկտեմբերի 26-ին, NEWS.am–ի հետ զրույցում ասաց իրանագետ Նվեր Դավթյանը՝ խոսելով այն մասին, որ վաղ առավոտյան Իսրայելը հարվածել է Իրանի ռազմական օբյեկտներին։

«Բայց նաև պետք է հաշվի առնել որոշակի տեխնիկական խնդիրներ. ինչքանով կարող էր Իսրայելը հաղթահարել դրանք՝ հաշվի առնելով, որ արդեն մեկ տարի է՝ գտնվում է պատերազմական վիճակում»,–հավելեց իրանագետը։

Խոսելով իսրայելական հարվածների հետևանքով Իրանի կրած վնասների մասին, Նվեր Դավթյանը նշեց.

 «Ըստ հրապարակված կադրերի և տարածված տեղեկության, Թեհրանի հատվածում և հարակից շրջաններում թիրախավորված են եղել գործարաններ, և Թեհրանի միջազգային օդանավակայանի լանդշաֆտում գտնվող տարածքը։ Ըստ նախնական տեղեկությունների, նպատակ է եղել ոչնչացնել որոշ պաշտպանական ռազմական օբյեկտներ, բայց իրանական ՀՕՊ–ը աշխատել է, դրա արդյունավետությունն արձանագրվել է անգամ որոշ իսրայելական վերլուծական կենտրոնների կողմից։ Նույնիսկ կան տեղեկություններ, որ քննադատվում է այդ գործողության կա՛մ անհաջող, կա՛մ անվանական գործողության տպավորություն թողնող ընթացքը։ Այդ առումով պետք է համարել, որ վնասները շատ մեծ չեն։ Իրանը պաշտոնական հաղորդագրության մեջ նշել է, որ երկու զոհ կա ռազմական անձնակազմից, և կան նաև տեխնիկական վնասներ»։

Իրանագետի խոսքով, իսրայելական ընդդիմադիր ուժերը քննադատել են գործողության անհաջող ընթացքը, սակայն հնարավոր է, որ Իսրայելի նպատակը Իրանի ՀՕՊ–ի աշխատանքի արդյունավետությունը ստուգելն էր։ Նրա խոսքով, գործողության արդյունքում պարզվել է, որ  ՀՕՊ–ի արդյունավետությունը միջինից գուցե ավելի բարձր է եղել։

«Մեկ այլ հանգամանք ևս՝ Իրանը զգուշացրել էր, որ ինչպիսի վնաս Իսրայելը հասցնի Իրանին, նույն պատասխանն էլ կստանա։ Այսինքն եթե փորձ կատարվեր Իրանի միջուկային կամ նավթային օբյեկտներին վնաս հացնել, ապա ակնկալվում էր Իրանի կողմից ավելի լուրջ հակահարված։ Բացառված չէ, որ հենց այդ հակահարվածից խուսափելու համար Իսրայելը իր գործողություններում սահմանափակվել է այսքանով»,–ասաց Նվեր Դավթյանը։

Հարցին, թե արդյո՞ք Իրանը հակահարված կհասցնի Իսրայելին, իրանագետը պատասխանեց.

«Կարծում եմ՝ շատ հարցեր կախված են Լիբանանում և Գազայում Իսրայելի գործողություններից։ Այն, որ իրանական կողմը հայտարարել է՝ ՄԱԿ–ի 51-րդ հոդվածի համաձայն իրավունք ունի պատասխանելու իր տարածքային ամբողջականության նկատմամբ ոտնձգության համար, դա հստակ է, բայց նաև այլ հայտարարություններ են եղել, կոչեր, որ Իսրայելը պետք է դադարեցնի իր գործողությունները Գազայի և Լիբանանի հատվածում։ Այսինքն կան ակնկալիքներ, որ սրանով պետք է սահամանփակվի, և Գազայի ու Լիբանանի հատվածում գան որոշակի ընդհանրության։ Գուցե սա կարողանա որոշակիորեն զսպել լարվածության աճը։

Բացի այդ, Իրանի պատասխանելու հնարավորությունները բոլորին միանշանակ հայտնի են, և Իրանը իր կարողությունները, զսպող ուժի հնարավորությունները ցույց տալու կարիք այս պահին չունի։ Ինչ ուներ ցույց տալու, ժամանակին ցույց է տվել»։

Առավել մանրամասն` այստեղ. 

https://t.me/armenia24live