ՊԵԿ-ում ապշած են Բադասյանի ազատումից, ինքը՝ նույնպես․ ովքե՞ր են Փաշինյանի «սիրելիները»

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Պետեկամուտների կոմիտեում ապշած են Ռուստամ Բադասյանի ազատումից։ Ավելին՝ MediaHub-ին փոխանցեցին, որ Բադասյանն ինքն է նախևառաջ ապշել, երբ Փաշինյանն իրեն մեսենջերով «ծանուցել է», որ դիմում գրի, գնա՝ առանց որևէ դժգոհություն հատնելու, առանց որևէ բան բացատրելու։ Առհասարակ, այս պրակտիկայից են ապշած, թե ինչպես կարող է երկրի ղեկավարը պաշտոնյաներին նշանակի և ներկայացնի մեծ շուքով, հետո այդպես էժան ձևով, առանց որևէ բացատրություն տալու՝ նրանց ազատի պաշտոններից։ 

Ու եթե ուժայինների դեպքում այս ազատումները հասկանալի էին, ապա ՊԵԿ նախագահի դեպքում խիստ անհասկանալի է, քանզի Ռուստամ Բադասյանը Փաշինյանի կառավարության այն եզակի պաշտոնյաներից էր, որից դժգոհությունները ամենաքիչն էին, սկանդալների մեջ չէր հայտնվում, կարծես՝ լուրջ բողոք էլ չկար նրանից, ինքն էլ պրոֆեսիոնալ կադր էր։ Թեպետ՝ Բադասյանի ղեկավարած հիմնարկի թերացումներից է, օրինակ, Միհրան Պողոսյանին պատկանող «Քեթրին գրուպի» ներկրած բանանի արկղերում հայտնաբերված մոտ մեկ տոննա կոկաինը, որը, փաստացի, անարգել հատել է սահմանը, մաքսազերծվել կանաչ ուղիով և հասել ընկերության պահեստ։

Բադասյանն ընդունել էր, որ այստեղ կա իր մաքսավորների թերացումը, բայց նաև բացատրել էր, որ այդ ընկերությունը մշտապես կանաչ ուղիով է անցել՝ ըստ էության ակնարկելով, որ Պողոսյանի հիմնադրած ընկերությունը բարեխղիճ ներկրող է եղել և երբևէ կասկածելի որևէ վարքով աչքի չի ընկել։ Բայց դրանից շուրջ մեկուկես տարի է անցել, և եթե դա լիներ պատճառը, ապա Բադասյանը վաղուց պետք է ազատված լիներ պաշտոնից, ավելին՝ ԱԱԾ տնօրեն Արմեն Աբազյանին էլ հետը տարած պիտի լիներ։

Բայց Աբազյանը շարունակում է պաշտոնավարել, իսկ Բադասյանն այսօր ազատման դիմում է գրել՝ առավոտյան հրաժեշտի տեքստ մտածելով, թե ինչպես բացատրի իր հեռանալը, որին ոչ ոք չէր սպասում։ Տեքստում, սակայն, ազատման պատճառների մասին որևէ խոսք չկա, ինչից զգացվում է, որ ինքն էլ չէր սպասում դրան, իր համար էլ էր անակնկալ, դրա համար էլ ոտքի վրա մի երկու շնորհակալական խոսք է հայտնել՝ անգամ չթվարկելով իր պաշտոնավարման ընթացքում իր կատարած աշխատանքները, փոփոխությունները, որ արվել են ՊԵԿ-ում՝ ինչպես սովորաբար անում են հեռացող պաշտոնյաները։

Ինչ վերաբերում է ուժայինների հեռանալուն, ապա այստեղ ևս հարց է առաջանում, թե ինչո՞ւ նրանց մի մասը միայն՝ ՆԳ նախարարը, Քննչական կոմիտեի նախագահն ու Հակակոռուպցիոն կոմիտեի նախարարը։ Իսկ ինչո՞ւ չեն ազատվում նույն ԱԱԾ տնօրենն ու գլխավոր դատախազը՝ Աննա Վարդապետյանը, եթե հաշվի առնենք, որ ազատումների պատճառը Նիկոլ Փաշինյանի դժգոհությունն է իրավապահ համակարգում տիրող վիճակից։ Ստացվում է՝ երկրում տիրող ամենաթողության, անարխիայի, ձգձգվող դատական գործերի, հանցավորության մակարդակի էական աճի մեջ մեղավոր են ՆԳ նախարարը, ՔԿ և հակակոռուպցիոն կոմիտեի նախագահները, բայց մեղքի որևէ բաժին չունեն ԱԱԾ տնօրենն ու տիկին դատախա՞զը, որոնք իրավապահ համակարգի թերևս ամենաառանցքային կառույցների ղեկավարներն են։ Իսկ գուցե նրանք Փաշինյանի սիրելինե՞րն են, դրանով պայմանավորված՝ նաև անձեռնմխելի են, օրինակ՝ Աննա Վարդապետյանը, որ մինչ օրս իր նախկին կարգավիճակի՝ Փաշինյանի օգնականի դիրքերից է անվերապահ ծառայում իր ղեկավարին, կամ Արմեն Աբազյանը, որը գուցե այնքան բան գիտի նույն Փաշինյանի և նրա թիմակիցների մասին ու այնքան կոմպրոմատ ունի նրանց վրա, որ պաշտոնից ազատելը կարող է որևէ պահի ռիսկային լինել Փաշինյանի իշխանության համար։ 

Ի դեպ, մեզ ասացին՝ ազատված պաշտոնյաները այնպես չէ, որ անգործ և անպաշտոն կմնան։

Օրինակ՝ Գնել Սանոսյանի մասին արդեն խոսակցություն կա, որ հնարավոր է՝ այլ կառույց տեղափոխվի, Վահե Ղազարյանին նույնպես որոշ ժամանակ անց մի տեղ կնշանակի Փաշինյանը՝ ի վերջո ընկերներ են եղել, օրինակ՝ խորհրդական կամ նման մի բան։ Այս փուլում առավել անորոշ են Արգիշտի Քյարամյանի և Սասուն Խաչատրյանի ճակատագրերը:

Մի բան պարզ է, որ նրանց ազատումից վստահաբար ուրախացել է դատախազ Աննա Վարդապետյանը, քանզի տիկին դատախազը վաղուց խնդիրներ ուներ ուժային մյուս կառույցների, հատկապես՝ Քննչական կոմիտեի և դրա ղեկավար Արգիշտի Քյարամյանի հետ։

Վահե Մակարյան

Առավել մանրամասն` այստեղ. 

https://t.me/armenia24live