«Օպերայի բակում». ուսուցողական հեքիաթ-պատումը Աստրալային գոտի կտեղափոխի գիրքն ընթերցողներին. Արմեն Գրիգորյան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Նոյեմբերի 16-ին Խնկո Ապոր անվան ազգային գրադարանում տեղի ունեցավ Արմեն Գրիգորյանի 3-րդ՝ «Օպերայի բակում» գրքի շնորհանդեսը:

Արմեն Գրիգորյանի առաջին գիրքը՝ «Կանը և կախարդական բանալու գաղտնիքը գիրքը» տպագրվել է 2015 թվականին, երբ դեռ շատ չէին մանկական գրքերը: Այն նախատեսված է 3-10 տարեկան փոքրիկների համար: Գիրքը կարդալիս փոքրիկ ընթերցողը հայտնվում է կախարդական աշխարհում և հեքիաթի գլխավոր հերոս Կանի հետ անցնում բազում փորձություններով, հանդիպում տարբեր կախարդների ու խոսող կենդանիների: Հեքիաթն  ընտրության, ճիշտ ընտրություններ կատարելու և կախարդական բանալու մասին է: Հեքիաթի ուղերձն այն է, որ աշխարհում չկա փակ դուռ, իսկ բանալին քո հոգում է:

Հեղինակի երկրորդ գիրքը՝ «Արիջան» արևելյան մոտիվներով գեղեցիկ հեքիաթ է  սիրո ու երազանքների մասին, որտեղ ընթերցողը հանդիպում է ջիների, կախարդների ու հրեշների: Գլխավոր հերոս խոհարար Լասմանը հանուն սիրո անցնում է տարբեր փորձությունների միջով, որպեսզի կարողանա գրավել գեղեցկուհի Արիջայի սիրտը: Հեքիաթը սովորեցնում է հավատալ սեփական ուժերին և սիրո կախարդանքին:

«Օպերայի բակում» ֆենթզի հեքիաթն արդեն պատանիների համար է նախատեսված: Այն ուսուցողական հեքիաթ-պատում է, որի գլխավոր հերոսներ Նարեկն ու Մարին հայտնվում են Աստրալային գոտում և փորձում փրկել իրենց ընկերոջը չար քամուց: Հեղինակը կարևորում է այն, որ գրքի միջավայրը հայկական է, հերոսները հայ մանուկներ են, սովորում են դպրոցում, հաճախում սպորտի, պարի, փորձում խաղեր ստեղծել: Գրքի օգնությամբ երեխաները կարող են ծանոթանալ հայ մեծանուն գրողների, դերասանների, կոմպոզիտորների, նկարիչների կյանքին ու գործունեությանը:

«Օպերայի բակում» գիրքը հրատարակել է DaVinci հրատարակչությունը: Գրքի խմբագիրը Ամալյա Սողոմոնյանն է,  նկարազարդումներն արել է Մերի Սարմազյանը:

Դե ինչ, սկսեք կարդալ գիրքը, իսկ մենք կհանդիպենք Աստրալային գոտում: