Կա՛մ մեր հետ ես, կա՛մ կեղտոտ անկողինդ դարձնելու ենք հանրային․ ՔՊ-ի «բարոյականության» աստիճանը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Երբեմնի մոլի նիկոլական Հովիկ Աղազարյանն այսօր դարձել է իր համար «Հիսուսին հավասար» Նիկոլ Փաշինյանի զոհը։ Պատգամավորն ինչ է թե համարձակվել է դեմ գնալ Փաշինյանին ու չկատարել նրա խնդրանքը, այսօր ՔՊ-ի կողմից ներկայացվում է որպես պետության համար թիվ մեկ վտանգ։ 

MediaHub-ը հիշեցնում է, որ արդեն մի քանի օր է՝ ՔՊ խմբակցության պատգամավորները բոլոր հարթակներով հայտարարում են, թե Հովիկ Աղազարյանը պետական գաղտնիք պարունակող արտահոսքեր է կազմակերպել։ Պատգամավորի քայլերն այնքան անընդունելի են «սրբի դուռ» ՔՊ-ի համար, որ պատգամավորներից մեկն ամաչում է պատմել՝ ինչեր է կարդացել Աղազարյանի չաթերում, մյուսն ուղղակի անկեղծանում է, թե այդ ամենից հետո «ցանկացել է սպանել Աղազարյանին»։ Բայց սա դեռ ամենը չէ։ Այսօր իշխանական քարոզիչ Տարոն Չախոյանի անվան հետ կապված կայքերից մեկը հրապարակում արեց՝ նշելով, թե Աղազարյանի չաթերը քրքրելիս հայտնաբերել են տղամարդկանց հետ նամակագրություններ, ու պարզվել է, որ, ցիտում ենք՝ «պատգամավորը միասեռական կապի մեջ է եղել մի քանի տղամարդու հետ»։

Փաստացի, հանուն Փաշինյանի «սիրտը շահելու», ՔՊ շրջանակը պատրաստ է ամեն քայլի, անգամ մարդու անկողինը հրապարակային դարձնելու։ Թեև ոչ ոքի խնդիրը չէ՝ ում հետ և ինչ դիրքով է քնում Հովիկ Աղազարյանը, կանա՞նց է նախընտրում, թե՞ տղամարդկանց։ Հատկապես, որ դեռ պարզ էլ չէ՝ այսօր այդ ամենը հրապարակային դարձնող ՔՊ-ական պատգամավորների անկողիններում ինչեր կհայտնաբերվեն։ Ի վերջո, չմոռանանք՝ նմանը նմանին է ձգտում...

․․․ Ու սա այն դեպքում, երբ Աղազարյանն ինքնամոռաց պաշտպանում էր Նիկոլ Փաշինյանի առաջ բերած բոլոր թեզերը՝ հասարակության հայհոյանքը, անեծքներն ու ատելությունն իր վրա վերցնելով, միայն թե Փաշինյանը գոհանա։ Ավելին, հաճախ «Հռոմի Պապից ավելի կաթոլիկ գտնվելով»՝ Աղազարյանն ավելի հակապետական, հակահայ հայտարարություններ էր անում, քան կաներ հենց ինքը՝ Փաշինյանը։ Աստծուն, Արցախը, պատմական Հայաստանը․․․ այս ամենին ուրացավ Աղազարյանը, ու սա արեց Փաշինյանին չուրանալու համար։ Իսկ այսօր ի՞նչ ունի նա․ մանդատ, որից շատ շուտով կզրկվի՝ ազատությունից զրկվելուն զուգահեռ։ Իսկ դա կլինի, քանի որ ՔՊ-ն առանց թաքցնելու, ուղիղ մեսիջներով ներկայացնում է քայլերի հաջորդականությունը․ հենց այս պահին էլ գնդակը գլխավոր դատախազ Աննա Վարդապետյանի դաշտում է։

Ինչևէ, այստեղ խնդիրն ամենևին էլ Հովիկ Աղազարյանը չէ, նրա փոխարեն կարող էր լինել ցանկացածը՝ Լուլուն, Ալեն Սիմոնյանը, Անդրանիկ Քոչարյանը, Սիսակ Գաբրիելյանը․․․ (և կլինեն), այստեղ խնդիրը բարոյականությունն է, չնայած, ինչպես դեպքերն ու հանգամանքներն են ցույց տալիս, ՔՊ-ի դեպքում բարոյականություն բառից առաջ «ան» նախածանցը միշտ ու առանց բացառությունների պետք է դրվի։ Եվ ամենակարևորը․ խնդիրն այն է, որ այս «անբարոյական» արշավի զոհը դառնալու են բոլորը՝ առանց բացառության, միայն թե ինչ-որ պահի շփոթվեն ու շեֆին դեմ գնան։ Ինչպես Աղազարյանի դեպքում, մյուսների նամակներն էլ տպվելու ու տրցակներով բաժանվելու են բոլոր ՔՊ-ականներին, իսկ օրեր անց դրանց բովանդակությունը հրապարակելու են չախոյանական կայքերը։

 Հետևեք մեզ՝ այստեղ