Արմեն Բաբալարյան․ Հայաստանի առաջնությունում ինձ համար բացահայտումներ չեղան

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հայաստանի առաջնությունում ինձ համար բացահայտումներ չեղան: Մալխաս Ամոյանի քաշային կարգում ունեցանք հետաքրքիր պայքար: Վստահ կարող եմ ասել, որ Ամոյանն ունի արժանի հետնորդներ: Մյուս քաշերում եւս հետաքրքիր մրցակցություն ծավալվեց:

Այս մասին լրագրողների հետ զրույցում ասաց հունահռոմեական ոճի ըմբշամարտի Հայաստանի հավաքականի գլխավոր մարզիչ Արմեն Բաբալարյանը:

Դեկտեմբերի 23-24-ը Երեւանի «Միկա» մարզադահլիճում անցկացվեց հունահռոմեական ոճի ըմբշամարտի Հայաստանի առաջնությունը, որին մասնակցում էր շուրջ 80 ըմբիշ:

Առաջնությունից ազատված էին Փարիզի Օլիմպիական խաղերի մեդալակիրներ Արթուր Ալեքսանյանը, Մալխաս Ամոյանը եւ աշխարհի առաջնության մեդալակիրները:

Դեկտմեբերի 24-ին տեղի ունեցան եզրափակիչ գոտեմարտերը, որոնք անցան լեփ-լեցուն դահլիճով: Երկրպագուների շարքերից եզրափակիչ գոտեմարտերին էին հետեւում նաեւ Արթուր Ալեքսանյանը եւ Մալխաս Ամոյանը: Առաջնության գլխավոր մրցավարը Գեւորգ Ալեքսանյանն էր:

Ըստ հավաքականի գլխավոր մարզիչ Արմեն Բաբալարյանի, նախորդ տարվա համեմատ,  մասնակիցների թիվը մի փոքր աճել է:

«Այս առաջնությունում բացահայտումներ ինձ համար չեղան: Քաշային կարգեր կային, որ հետաքրքիր պայքար ստացվեց: 60 կգ քաշայինների պայքարում Կարապետ Մանվելյանը հաղթեց աշխարհի չեմպիոն Սուրեն Աղաջանյանին: 55 կգ քաշայինների պայքարում հաղթեց Տիգրան Մինասյանը, որը փոխել էր քաշային կարգը, 60 կգ-ից իջել 55 կգ: Կարեն Խաչատրյանը 82 կգ-ից բարձրացել էր 87 կգ եւ հաղթեց այս քաշում:

77 կգ քաշայիններում հետաքրքիր մրցակցություն ծավալվեց: Մալխաս Ամոյանի բացակայության պայմաններում այստեղ էլ լարված պայքար ստացվեց, բոլորը պատանեկան հավաքականից դուրս եկած տղաներ են: 3-4 ըմբիշ աչքի ընկան: Կարող եմ ասել, որ Մալխաս Ամոյանը ունի լավ հետնորդներ, եւ դա կօգնի թե իրեն, թե հավաքականին:

Այս տարի առաջնությանը մասնակցում էր 80-ից ավել ըմբիշ: Թույլ էինք տվել մասնակցել նաեւ 2006 եւ 2007 թվականներին ծնված տղաներին: Նախորդ տարվա համեմատությամբ մասնակիցների թիվը մի փոքր աճել է:

Ինձ գոհացրել է ոչ միայն ըմբիշների, այլեւ նրանց անձնական մարզիչների աշխատանքը: Բոլորի հետ լավ համագործակցում ենք: Անձնական մարզիչներն օգնում են մեզ հավաքների ժամանակ, այս ընթացքում էլ թողնում ենք, որ իրենք աշխատեն: Այս տղաներն ուժեղ են եւ պետք է ավելի ուժեղանան, որ առողջ մրցակցություն ունենանք:

Հայաստանի առաջնությունից հետո 2025 թվականը կսկսենք Ծաղկաձորի ուսումնամարզական հավաքով եւ կպատրաստվենք նոր մրցաշրջանին»,- ասաց Արմեն Բաբալարյանը:

10 քաշային կարգերում Հայաստանի չեմպիոններ են դարձել Տիգրան Մինասյանը (55 կգ), Կարապետ Մանվելյանը (60),  Հրաչյա Պողոսյանը (63 կգ), Սլավիկ Գալստյանը (67 կգ), Շանթ Խաչատրյանը (72 կգ), Մարտիկ Պետրոսյանը (77 կգ),  Սամվել Գրիգորյանը (82 կգ), Հայկ Խլոյանը (97 կգ) եւ Դավիթ Օվասապյանը (130 կգ):

Լուսինե Շահբազյան

Լուսանկարները՝ Էմմա Ասատրյանի

 Հետևեք մեզ՝ այստեղ