Փաշինյանին անվստահություն հայտնելու տարբերակը կարող է միանգամայն իրատեսական դառնալ. Չալաբյան

Եթե ​​Փաշինյանը շարունակի այս տեմպերով կորցնել իր պատգամավորներին, նրան անվստահություն հայտնելու տարբերակը կարող է միանգամայն իրատեսական դառնալ։ Դրա մասին դեկտեմբերի 26-ին NEWS.am-ի թղթակցի հետ զրույցում հայտարարել է «Հայաքվե» ազգային քաղաքացիական միավորման համակարգող Ավետիք Չալաբյանը։

Նա մատնանշել է իշխանության փոփոխության կարևորությունը՝ լինի դա ընտրությունների, հրաժարականի, թե անվստահության քվեի միջոցով։

Նրա գնահատմամբ՝ Փաշինյանն իշխանության եկավ Արցախը հանձնելու նպատակով, բայց չկարողացավ դա անել անմիջապես, ուստի որոշեց աստիճանաբար գործել, որպեսզի ժողովուրդը հաշտվի, բայց ժողովուրդը չհաշտվեց։

Նա համոզմունք է հայտնել, որ իշխանությունները գնում են ոչ թե խաղաղության, այլ կապիտուլյացիայի ճանապարհով։

«Ալիևը պահանջում է լուծարել ԵԱՀԿ Մինսկի խումբը, դիտորդներին դուրս բերել սահմանից, փոխել Սահմանադրությունը, չզինել բանակը և Հայաստանում բնակեցնել 300 հազար ադրբեջանցիների, որոնց անվտանգությունը պետք է ապահովի ադրբեջանական բանակը։ Սա Հայաստանի լուծարման ծրագիր է, և Ալիևը վստահ է, որ քանի դեռ Փաշինյանը իշխանության ղեկին է, նա կկարողանա դա անարգել իրականացնել։ Արցախի օկուպացումից հետո Ադրբեջանը նպատակ ունի յուրացնել Հայաստանի արևելյան և հարավային հատվածները՝ խոսելով 300 հազար ադրբեջանցիների մասին։ Բաքուն այդ քաղաքականությունը միջազգային հարթակներում շատ ակտիվ և ագրեսիվ է վարում։

Ընդ որում, մարդահամարի տվյալներով՝ ԽՍՀՄ փլուզումից առաջ Հայաստանում ապրում էր 80 հազար ադրբեջանցի, իսկ Ադրբեջանում՝ 350 հազար հայ։ Սակայն Հայաստանի իշխանությունները դրան չեն արձագանքում»,- հավելել է Չալաբյանը։

Նա մտահոգություն է հայտնել, որ իշխանությունները կարող են հանձնել Սյունիքը, Վայոց ձորը, Գեղարքունիքն ու Տավուշը, ինչպես հանձնեցին Արցախը։

«Կա ինչ-որ անհայտ պատճառ, որը նրանց դրդում է նման գործողությունների։ Կամ փող, կամ կախվածություն, կամ վախ, կամ բոլորը միասին: Փաշինյանն ավելի լավ կլիներ այս թեմաներով բանավիճեր Ալիևի հետ, քան Հայաստանի նախկին նախագահներին հրավիրեր բանավեճի՝ փորձելով մեղքը բարդել նրանց վրա։ Ավելին, նա պատրաստվում է բանավեճ անցկացնել՝ համոզելու համար, որ Ադրբեջանը ճիշտ էր»,- նշել է քաղաքական գործիչը։

Նրա գնահատմամբ՝ տարվա ընթացքում Ալիևն ու Փաշինյանը համատեղ փորձել են թաղել Արցախի հարցը:

«Նախկին նախագահներին բանավեճերի հրավիրելը նույնպես այս նպատակն է հետապնդում՝ փորձել հիմնավորելու, որ Արցախի հարցը վաղուց թաղված է, իսկ Փաշինյանը, իբր, դրա հետ առնչություն չունի։ Միևնույն ժամանակ, Ալիևն ու Փաշինյանը չկարողացան օրակարգից հանել այս հարցը, քանի որ աշխարհասփյուռ հայության կողմից լուրջ դիմադրություն կա։ Հայաստանում հարցված քաղաքացիների մոտ 60%-ը կարծում է, որ Ադրբեջանի կողմից Արցախի բռնազավթումը ժամանակավոր բնույթ է կրում»,-նշել է Չալաբյանը։

Նրա կարծիքով՝ Արցախի շուրջ տեղի ունեցող գործընթացները կապված են տարածաշրջանում տեղի ունեցող փոփոխությունների, մասնավորապես՝ Ռուսաստանի դիրքերի թուլացման և Թուրքիայի հզորացման հետ։

«Փաշինյանն ինչ-որ առումով այս գործընթացի օպերատորն է։ Նա դրանով զբաղվեց ամբողջ տարի՝ Արևմուտքի հետ հարաբերությունները խորացնելու քողի տակ Ռուսաստանին փոխարինելով Թուրքիայով։

Եթե ​​դուրս գանք ՀԱՊԿ-ից, ո՞ր կազմակերպությանն ենք անդամակցում, որը երաշխավորում է մեր անվտանգությունը։ ՆԱՏՕ-ի կազմ  մեզ չեն ընդգրկի, իսկ եթե ընդգրկեն էլ, Թուրքիան այստեղ «վերահսկող» կնշանակվի։ Այսինքն՝ երկիրը կհանձնեն Թուրքիայի՞ն։ Թուրքիան այսօր դարձել է Հայաստանի «գործընկերն» անվտանգության ոլորտում, որը հրամայել է հանձնել Տավուշի գյուղերը և այսպես կոչված Զանգեզուրի միջանցքը»,- ընդգծել է Չալաբյանը։